ନୂଆଦିଲ୍ଲୀ,୨୦।୨ : ସଫ୍ଟବ୍ୟାଙ୍କ ସମର୍ଥିତ ଓଓ୍ବାଇଓ ର ପ୍ରତିଷ୍ଠାତା ତଥା ସିଇଓ ରିତେଶ ଅଗ୍ରୱାଲ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ତାଙ୍କ ବିବାହକୁ ନିମନ୍ତ୍ରଣ କରିବା ପାଇଁ ଭେଟି ବିବାହ କାର୍ଡ ଦେଇଛନ୍ତି। ଏହି ସାକ୍ଷାତ ସମୟରେ ତାଙ୍କ ମା ଏବଂ ପ୍ରେମିକା ମଧ୍ୟ ଉପସ୍ଥିତ ଥିଲେ। ୨୯ ବର୍ଷୀୟ ଉଦ୍ୟୋଗୀ ଚଳିତ ବର୍ଷ ମାର୍ଚ୍ଚରେ ବିବାହ କରିବାକୁ ଯାଉଛନ୍ତି। ରିତେଶ ଅଗ୍ରୱାଲ ଏହାର କିଛି ଫଟୋ ଶେୟାର କରିଛନ୍ତି। ଗୋଟିଏ ଫଟୋରେ, ସେ ଆଶୀର୍ବାଦ ପାଇବାକୁ ପ୍ରଧାନମନ୍ତ୍ରୀଙ୍କ ପାଦ ଛୁଇଁଥିବାର ମଧ୍ୟ ଦେଖିବାକୁ ମିଳୁଛି।
ଫଟୋ ଶେୟାର କରି ସେ ଲେଖିଛନ୍ତି ଯେ ପ୍ରଧାନମନ୍ତ୍ରୀଙ୍କ ଆଶୀର୍ବାଦରେ ଆମେ ଏକ ନୂତନ ଆରମ୍ଭ ପାଇଁ ପ୍ରସ୍ତୁତ।
ଉଦ୍ୟୋଗୀ ରିତେଶ ଅଗ୍ରୱାଲ ହେଉଛନ୍ତି ଦେଶର ସବୁଠାରୁ କନିଷ୍ଠ କୋଟିପତି। ଯେତେବେଳେ ସେ ମାତ୍ର ୧୯ ବର୍ଷ ବୟସରେ ଓଓ୍ବାଇଓ ପ୍ରତିଷ୍ଠା କରିଥିଲେ। ଓଓ୍ବାଇଓ ବର୍ତ୍ତମାନ ୮୦ଟି ଦେଶର ୮୦୦ରୁ ଅଧିକ ସହରରେ କାର୍ଯ୍ୟ କରେ ଏବଂ ଏହା ବିଶ୍ୱର ଦ୍ରୁତତମ ବୃଦ୍ଧି ପାଉଥିବା ହୋଟେଲ ଶୃଙ୍ଖଳା ମଧ୍ୟରୁ ବିବେଚନା କରାଯାଏ।
