ନୂଆଦିଲ୍ଲୀ: ମାଲୟାଲମ୍ ଫିଲ୍ମର ପ୍ରଥମ ମହିଳା ତଥା ଦଳିତ ଅଭିନେତ୍ରୀ ପି.କେ. ରୋଜିଙ୍କ ୧୨୦ତମ ଜନ୍ମଦିନ ଅବସରରେ ଶୁକ୍ରବାର ଗୁଗୁଲ ପକ୍ଷରୁ ଏକ ଡୁଡୁଲ୍ ସମର୍ପିତ ହୋଇଛି। ରୋଜିଙ୍କ ଜନ୍ମ ୧୯୦୩ରେ କେରଳ ଥିରୁଭାନନ୍ତପୁରମ୍ର ଏକ ଦଳିତ ପରିବାରରେ ହୋଇଥିଲା। ପିଲାଦିନୁ ତାଙ୍କଠାରେ ଅଭିନୟ କରିବାର ନିଶା ଦେଖିବାକୁ ମିଳିଥିଲା। ହେଲେ ସେତେବେଳେ ତଥାକଥିତ ସମାଜ ସହଜେ ଅଭିନୟକୁ ଗ୍ରହଣ କରିପାରୁ ନ ଥିଲା। ଝିଅମାନଙ୍କୁ ଘରୁ ବାହାରିବାକୁ ଅନେକ ପ୍ରତିବନ୍ଧକର ସାମ୍ନା କରିବାକୁ ପଡ଼ୁଥିଲା। ୧୯୨୮ରେ ପ୍ରଥମ ଦଳିତ ଅଭିନେତ୍ରୀ ଭାବେ ମାଲୟାଲମ୍ ଚଳଚ୍ଚିତ୍ର ‘ଭିଗାଥାକୁମାରନ’(ଦି ଲାଷ୍ଟ ଚାଇଲ୍ଡ)ରେ ରୋଜି ମୁଖ୍ୟ ଚରିତ୍ରରେ ଅଭିନୟ କରିଥିଲେ। ଏହା ଫଳରେ ତାଙ୍କୁ ଲୋକଙ୍କ ଆକ୍ରୋଶର ସାମ୍ନା କରିବାକୁ ପଡ଼ିଥିଲା। ଲୋକେ ଏଥିରେ ଉତ୍ତ୍ୟକ୍ତ ହୋଇ ତାଙ୍କ ଘର ଜାଳି ଦେଇଥିଲେ। ଜୀବନ ବଞ୍ଚାଇବାକୁ ଯାଇ ବାଧ୍ୟହୋଇ ଏକ ଲରିରେ ବସି ତାଙ୍କୁ ରାଜ୍ୟ ଛାଡ଼ିବାକୁ ପଡ଼ିଥିଲା। ସେ ତାମିଲନାଡୁରେ ପହଞ୍ଚିବା ପରେ ସାହାଯ୍ୟ କରିଥିବା ଲରି ଚାଳକ କେଶବନ୍ ପିଲ୍ଲାଇଙ୍କୁ ବିବାହ କରି ସେଠାରେ ରହିଥିଲେ। ରୋଜିଙ୍କ ଏପରି ସଂଘର୍ଷମୟ କାହାଣୀ ପାଇଁ ତାଙ୍କୁ ଆଜି ମଧ୍ୟ ଫିଲ୍ମ ଇଣ୍ଡଷ୍ଟ୍ରିରେ ଅନେକ ସମ୍ମାନ ମିଳୁଛି। ଏପରିକି ସାଉଥ୍ରେ ତାଙ୍କ ନଁାରେ ଏକ ଫିଲ୍ମ ସୋସାଇଟି ମଧ୍ୟ ରହିଛି। ତେବେ ସେ କରିଥିବା ଫିଲ୍ମ ‘ଦି ଲାଷ୍ଟ ଚାଇଲ୍ଡ’କୁ କେହି ପ୍ରଶଂସା କରି ନ ଥିଲେ ମଧ୍ୟ ଆଜି ସେ ଅନ୍ୟମାନଙ୍କ ପାଇଁ ଏକ ପ୍ରେରଣାର ଉତ୍ସ ପାଲଟିଛନ୍ତି।