ନୂଆଦିଲ୍ଲୀ,୧୪ା୧୨(ପି.ଟି.) : ଦୁଇ ଟେନିସ୍ କିମ୍ବଦନ୍ତୀ ଲିଆଣ୍ଡର ପେସ୍ ଓ ବିଜୟ ଅମ୍ରିତରାଜଙ୍କୁ ଇଣ୍ଟରନ୍ୟାଶନାଲ ଟେନିସ୍ର ହଲ୍ ଅଫ୍ ଫେମ୍ରେ ସାମିଲ କରାଯାଇଛି। ଉଭୟ ପ୍ରଥମ ଏସୀୟ ପୁରୁଷ ଖେଳାଳି ଭାବେ ଏହି ତାଲିକାରେ ସାମିଲ ହୋଇଛନ୍ତି। ଏହି ଦୁଇ ଜଣଙ୍କ ବ୍ୟତୀତ ବରିଷ୍ଠ ସାମ୍ବାଦିକ ରିଚାର୍ଡ ଏଭାନ୍ସଙ୍କୁ ମଧ୍ୟ ଟେନିସ୍ର ଅଲ୍ଟିମେଟ୍ ଅନର ପାଇଁ ମନୋନୀତ କରାଯାଇଛି। ଡବଲ୍ସରେ ପୂର୍ବତନ ବିଶ୍ୱର ଏକ ନମ୍ବର ତଥା ୧୮ ଥର ଗ୍ରାଣ୍ଡସ୍ଲାମ ଚାମ୍ପିୟନ ପେସ୍ଙ୍କୁ ଖେଳାଳି ଭାବରେ ସାମିଲ କରାଯାଇଥିବା ବେଳେ ଅମ୍ରିତରାଜଙ୍କୁ କ୍ରୀଡା ପ୍ରତି ଥିବା ଅବଦାନ ପାଇଁ ମନୋନୀତ କରାଯାଇଛି। ୨୭ ରାଷ୍ଟ୍ରର ୨୬୪ ଖେଳାଳି ଏହି ଏଲିଟ୍ ତାଲିକାରେ ସାମିଲ ଥିବାବେଳେ ୨୮ତମ ରାଷ୍ଟ୍ର ଭାବେ ଭାରତ ଏହି ତାଲିକାରେ ସାମିଲ ହୋଇଛି।
ଦୀର୍ଘ ୩୦ ବର୍ଷ ଧରି ଦେଶ ପାଇଁ ପ୍ରତିନିଧିତ୍ୱ କରିବା ପରେ ଏହି ସମ୍ମାନ ମୋ ପାଇଁ ବେଶ୍ ସ୍ବତନ୍ତ୍ର। ଏହା କେବଳ ମୋ ପାଇଁ ନୁହେଁ ବରଂ କୋଟି କୋଟି ଭାରତୀୟଙ୍କ ପାଇଁ ସମ୍ମାନର ବିଷୟ ବୋଲି ପେସ୍ କହିଛନ୍ତି। ଜୀବନବ୍ୟାପୀ ସଂଘର୍ଷ ପାଇଁ ଏହା ପୁରସ୍କାର ବୋଲି ପେସ୍ କହିଛନ୍ତି। ଏହା ଏସିଆ ମହାଦେଶର ଅନ୍ୟ ଯୁବ ଖେଳାଳିମାନଙ୍କୁ ଟେନିସ୍ରେ କ୍ୟାରିୟର କରିବା ପାଇଁ ଆଗ୍ରହୀ କରିବ ବୋଲି ସେ କହିଛନ୍ତି। ୩୦ ବର୍ଷର ଲମ୍ବା କ୍ୟାରିୟରରେ ବିଶ୍ୱ ର଼୍ୟାଙ୍କିଙ୍ଗରେ ସେ ପ୍ରଥମ ସ୍ଥାନ ହାସଲ କରିଥିବା ବେଳେ ସମୁଦାୟ ୧୮ ଗ୍ରାଣ୍ଡ ସ୍ଲାମ ହାସଲ କରିଥିଲେ। ଏହା ମଧ୍ୟରେ ଡବଲ୍ସରେ ୮ ଓ ସିଙ୍ଗଲ୍ସରେ ୧୦ ଟାଇଟଲ୍ ସାମିଲ ରହିଛି। ବିଶ୍ୱର ମାତ୍ର ୩ ଜଣ ଖେଳାଳି କ୍ୟାରିୟର ଗ୍ରାଣ୍ଡ ସ୍ଲମ ହାସଲ କରିଥିବା ବେଳେ ପେସ୍ ଏହା ମଧ୍ୟରେ ଅନ୍ୟତମ। ମାର୍ଟିନା ନାଭ୍ରାତିଲୋଭାଙ୍କ ସହିତ ସର୍ବାଧିକ ମିକ୍ସଡ ଡବଲ୍ସ ଟାଇଟଲର ରେକର୍ଡ ପାଇଁ ହଲ୍ ଅଫ୍ ଫେମ୍ରେ ସାମିଲ ହୋଇଥିବା ବେଳେ ଓପନ ଏରାରେ କେବଳ ସେ ଓ ମାର୍ଟିନା ହିଙ୍ଗିସ୍ କ୍ୟାରିୟର ସ୍ଲାମ୍ ପୂରଣ କରିଛନ୍ତି। ପେସ୍ ଦୀର୍ଘ ୪୬୨ ସପ୍ତାହ ଟପ୍ ଟେନ୍ ମଧ୍ୟରେ ରହିଥିବା ବେଳେ ୩୭ ସପ୍ତାହ ଧରି ଏକ ନମ୍ବର ସ୍ଥାନରେ ରହିଛନ୍ତି। ଏହା ମଧ୍ୟରେ ସେ ୫୫ଟି ଡବଲ୍ସ ଟାଇଟଲ ମଧ୍ୟ ହାସଲ କରିଛନ୍ତି। ଡେଭିସ୍ କପ୍ରେ ୪୫ଟି ଡବଲ୍ସ ମ୍ୟାଚ୍ ବିଜୟର ରେକର୍ଡ ନିଜ ନାମରେ ରଖିଥିବା ବେଳେ କ୍ରମାଗତ ୭ଟି ଅଲିମ୍ପିକ୍ସରେ ଭାଗ ନେଇଛନ୍ତି। ଏପରିକି ୧୯୯୬ ଆଟଲାଣ୍ଟା ଅଲିମ୍ପିକ୍ସର ସିଙ୍ଗଲ୍ସ ଇଭେଣ୍ଟରେ ସେ ବ୍ରୋଞ୍ଜ ପଦକ ହାସଲ କରିଥିଲେ। ଆଇଟିଏଚ୍ଏଫ୍ର ସଭାପତି କିମ୍ କ୍ଲାଇଷ୍ଟର୍ସ ହଲ୍ ଅଫ୍ ଫେମ୍ରେ ସାମିଲ ହୋଇଥିବା ଲିଆଣ୍ଡର ପେସ୍, ବିଜୟ ଅମ୍ରିତରାଜ ଓ ରିଚାର୍ଡ ଏଭାନ୍ସଙ୍କୁ ଶୁଭେଚ୍ଛା ଜଣାଇଛନ୍ତି।