ଧର୍ମଶାଳା,୨୬ା୧୧(ଡି.ଏନ.ଏ.): ଧର୍ମଶାଳା ବ୍ଲକ ଜାରକା ପଞ୍ଚାୟତ ଉତ୍ତରଶାସନ ମୌଜାରେ ଲଘୁଚାପଜନିତ ଅଦିନିଆ ବର୍ଷାରେ ଧାନ ଫସଲ ନଷ୍ଟ ହୋଇଥିବା ଦେଖିବାକୁ ମିଳିଛି। ଏପରି କି ବିଲରେ ପାଚିଲା ଧାନ ପଡ଼ି ଗଜା ହୋଇଯାଇଛି। ଅନେକ ଖାଲୁଆ ଜମିରେ ବର୍ଷା ଜଳ ଏବେ ବି ଜମି ରହିଛି। ଏକର ଏକର ଚାଷ ଜମିରେ ପାଚିଲା ଧାନ ଗଜା ହେବା ଅବସ୍ଥାରେ। ବିଲରେ ପାଚିଲା ଧାନ ଗଜା ହେଉଥିବା ଦେଖି ଚାଷୀ ହତାଶ ହେବା ସହ ଚିନ୍ତାରେ ପଡ଼ିଛନ୍ତି। ଧାର କରଜ କରି ଚାଷ କରିଥିବା ଚାଷୀ କେମିତି ବଞ୍ଚତ୍ବେ ସେ ନେଇ ମୁଣ୍ଡରେ ହାତ ଦେଇଛନ୍ତି। କେତେଜଣ ଚାଷୀ ପାଚିଲା ଧାନ କାଟି ବିଲରେ ପକାଇ ଥିବା ବେଳେ ଏହା ଶୁଖୁ ନ ଥିବାରୁ ଘରକୁ ଆଣିପାରୁନହାନ୍ତି। ଏପଟେ ପାଣିପାଗ ବିଭାଗ ସୂଚନା ଅନୁଯାୟୀ ପୁଣି ଲଘୁଚାପ ଦାନା ବାନ୍ଧୁଛି। ଏପରିସ୍ଥଳେ ପୁଣି ବର୍ଷା ହେଲେ ଚାଷ ଉଜୁଡିଯିବ ବୋଲି ସ୍ଥାନୀୟ ଅଞ୍ଚଳର ଅଗ୍ରଣୀ ଚାଷୀ ହରିହର ବେହେରା, ସନ୍ତୋଷ ରାଉତ ପ୍ରମୁଖ ଆଶଙ୍କା କରିଛନ୍ତି। ଏନେଇ ସେମାନେ କୃଷି ବିଭାଗର ଦୃଷ୍ଟି ଆକର୍ଷଣ କରିବା ସହ ସରକାରୀ ସହାୟତା ପାଇଁ ନିବେଦନ କରିଛନ୍ତି। ଏ ସମ୍ପର୍କରେ ଧର୍ମଶାଳା ବ୍ଲକ କୃଷି ଅଧିକାରୀ ପ୍ରଦୀପ କୁମାର ମହାନ୍ତିଙ୍କୁ ପଚାରିବାରୁ କ୍ଷୟକ୍ଷତି ଅନୁଧ୍ୟାନ କରାଯାଇ ଆବଶ୍ୟକ ପଦକ୍ଷେପ ନିଆଯିବ ବୋଲି ସୂଚନା ଦେଇଛନ୍ତି।
