ଗଞ୍ଜାମ,୮।୨(ଡି.ଏନ୍.ଏ.): ଧାନ ଅମଳକୁ ଦୁଇ ମାସ ବିତିଗଲାଣି। ହେଲେ ମଣ୍ଡିରୁ ଧାନ ଉଠିବା ବିଳମ୍ବ ହେଉଥିବା ଯୋଗୁ ଚାଷୀଙ୍କ ମଧ୍ୟରେ ଘୋର ଅସନ୍ତୋଷ ଦେଖିବାକୁ ମିଳିଛି। ଏନେଇ ଗଞ୍ଜାମ ବ୍ଲକ ଅନ୍ତର୍ଗତ କାଇଁଚପୁର ପଞ୍ଚାୟତର ଝାଡ଼କୁଦା
ଗ୍ରାମର ଚାଷୀମାନେ ବ୍ଲକ ଯୋଗାଣ ବିଭାଗ କାର୍ଯ୍ୟାଳୟରେ ପହଞ୍ଚି ଯୋଗାଣ ନିରୀକ୍ଷକ ସନ୍ତୋଷ କୁମାର ଦାଶଙ୍କୁ ଅଭିଯୋଗ କରିଛନ୍ତି। ଗତ ଜାନୁୟାରୀ ୨୬ରୁ ୭୦ ଜଣ ଚାଷୀଙ୍କୁ ଟୋକନ ମିଳିଥିବା ବେଳେ ଆଜି ସୁଦ୍ଧା ଧାନ ଉଠିନାହିଁ । ମଣ୍ଡିର ଧାନ ବିକ୍ରି କରିବାର ଅବଧି ଆସନ୍ତା ୧୭ରେ ଶେଷ ହୋଇଯିବ। ସେଥି ମଧ୍ୟରୁ୭ ଟି ଟୋକନରୁ ହିଁ ମିଲର ଆସି ଧାନ ଉଠାଇଥିବା ଜଣାପଡ଼ିଛି। ଗ୍ରାମରେ ପ୍ରାୟ ୯୫ ପ୍ରତିଶତ ଚାଷୀ ରହିଥିବା ବେଳେ ଚାଷୀଙ୍କ ନିକଟରେ ଆହୁରି ୩ ହଜାର ଧାନ ବସ୍ତା ମହଜୁଦ ରହିଛ। ଗତ ବର୍ଷ ଚାଷୀଙ୍କ ୪୫ଟି ଟୋକନ ଅବଧି ଶେଷ ହୋଇଯାଇଥିବାରୁ ଚାଷୀ ଧାନ ବିକ୍ରି କରିପାରି ନ ଥିଲେ। ଯାହାକୁ ନେଇ ଚଳିତ ବର୍ଷ ଚାଷୀଙ୍କ ମଧ୍ୟରେ ଘୋର ଉଦ୍ବେଗ ପ୍ରକାଶ ପାଇଛି।