କେନ୍ଦୁଝର,୧୮ା୧୨(ସ୍ବ.ପ୍ର.): ଚାଷ କାମ ସରିଲା। ଧାନ ଫସଲ ଅମଳ ସରିଲା। ଏବେ ବିଲ ଖାଁ ଖାଁ ହୋଇପଡ଼ିଛି। କିନ୍ତୁ ବିଲରେ ଜମା ହୋଇଥିବା ଧାନ ଗଛର ମୂଳ, ଧାନ ଅମଳ ପରେ ରହିଯାଉଥିବା କୁଟାକୁ ସଠିକ୍ ଭାବରେ ପରିଚାଳନା କରାଯାଇ ପାରୁ ନ ଥିବାରୁ ସମସ୍ୟା ଦେଖାଦେଉଛି। ଏହାକୁ ଚାଷୀମାନେ ନିଆଁ ଲଗାଇ ଦେଉଥିବାରୁ ସମଗ୍ର ଅଞ୍ଚଳକୁ ବ୍ୟାପିବା ସହ ଧୂଆଁ ଚାରିଆଡେ ବାୟୁ ପ୍ରଦୂଷଣ କରୁଛି। ଏନେଇ କୃଷି ବିଭାଗ କିମ୍ବା ଜିଲା ପ୍ରଶାସନ ପକ୍ଷରୁ ଚାଷୀଙ୍କୁ ନ ଜଳାଇବା ପାଇଁ ସଚେତନ କରାଯାଉନାହିଁ। ବିଲରେ ଜମା ହୋଇ ରହିଯାଉଥିବା ଧାନ ଗଛ ଅବଶେଷ (କୁଟା, ମୂଳ) ଆଦି କିପରି ପରିଚାଳନା କରାଯାଇପାରିବ ସେ ନେଇ ମଧ୍ୟ ସଚେତନ କରାଯାଇପାରିବ ସେ ନେଇ ସେମାନଙ୍କୁ ଜଣାଯାଉନାହିଁ। ଫଳରେ ଅନେକ ସ୍ଥାନରେ ବିଲରେ ନିଆଁ ଲାଗି କୁଟା ପୋଡ଼ି ଯିବା ସହ ବହୁ ଅଞ୍ଚଳକୁ ବ୍ୟାପୁଛି। ନିଆଁ କରାୟତ ହୋଇ ନ ପାରିଲେ ପବନରେ ଉଡ଼ି ଆଖପାଖ ଗ୍ରାମରେ ମଧ୍ୟ ଭୟାବହ ନିଆଁ ଲାଗି ବ୍ୟାପକ କ୍ଷୟକ୍ଷତି ଘଟାଇବା ଆଶଙ୍କା ରହିଛି। ସେହିପରି ପଶୁପକ୍ଷୀ, ସରୀସୃପ ତଥା ଜଙ୍ଗଲର ଗଛଲତା ପୋଡ଼ି କ୍ଷୟକ୍ଷତି ହେବାର ଯଥେଷ୍ଟ ସମ୍ଭାବନା ରହିଛି ବୋଲି ଅବସରପ୍ରାପ୍ତ କେନ୍ଦ୍ର ସରକାର ଅଧିକାରୀ ଅଲେଖ ଚନ୍ଦ୍ର ପାତ୍ର କହିଛନ୍ତି। ଏହି ବିଲ ପୋଡ଼ି ଦ୍ୱାରା ସମଗ୍ର ଅଞ୍ଚଳ ଧୂଆଁମୟ ହୋଇ ବାୟୁ ପ୍ରଦୂଷଣ କରିଥାଏ, ଯାହାକି ଚିନ୍ତାଜନକ। ଏଣୁ ଏନେଇ ପ୍ରଶାସନ ପକ୍ଷରୁ ଉପଯୁକ୍ତ ପଦକ୍ଷେପ ଗ୍ରହଣ କରିବାକୁ ପରିବେଶବିତ୍ମାନେ ଦାବି କରିଛନ୍ତି।