ଲୋଇସିଂହା,୧୨।୧୨(ଡି.ଏନ.ଏ): ବଲାଙ୍ଗୀର ଜିଲା ଲୋଇସିଂହା ବ୍ଲକରେ ଖରିଫ ଧାନକିଣା ଆରମ୍ଭ ହୋଇଛି। ଲୋଇସିଂହା ଓ ବୁର୍ଡାକୁ ବାଦ୍ ଦେଇ ବାକି ପାକ୍ସରେ ଧାନକିଣା ଚାଲିଛି। ବ୍ଲକର ୧୦ ପାକ୍ସରୁ ୮ ପାକ୍ସରୁ ଶନିବାର ସୁଦ୍ଧା ୫ ହଜାର ୪୪୧ କୁଇଣ୍ଟାଲ ୪୬ କେଜି ଧାନ କ୍ରୟ ହୋଇଛି। ନଭେମ୍ବର ୨୫ରେ ଜିଲାରେ ଧାନକିଣାକୁ ଜିଲାପାଳ ଉଦ୍ଘାଟନ କରିଥିଲେ। ହେଲେ ଗୁରୁବାର କେତେକ ପାକ୍ସରେ ଧାନ କିଣାଯାଇଥିବାବେଳେ ଶନିବାର ଆଉ ୪ଟି ପାକ୍ସରେ ଧାନ କିଣାଯାଇଥିଲା। ଏଣୁ ଲୋଇସିଂହା ବ୍ଲକରେ ଦୁଇସପ୍ତାହ ପିଛିଲା ଧାନ କିଣାଯାଉଛି। ଶୁକ୍ରବାର ରାତି ଓ ଶନିବାର ଦିନବେଳା ମେଘୁଆ ପାଗ ସହ ଝିପିଝିପି ବର୍ଷା ହୋଇଥିଲା। ରବିବାର ଦିନତମାମ ମେଘୁଆ ପାଗ ରହିଥିଲା। ମଣ୍ଡିକୁ ଧାନ ଆଣିଥିବା ଚାଷୀ ଏବେ ବର୍ଷ ପାଇଁ ଚିନ୍ତାରେ ପଡିଛନ୍ତି।
ଲୋଇସିଂହା ବ୍ଲକରେ ୧୦ଟି ପ୍ରାଥମିକ କୃଷି ସମବାୟ ସମିତି ରହିଛି। ବ୍ଲକର ୪ ୭୯୨ ଜଣ ଚାଷୀ ଖରିଫ ଧାନ ବିକ୍ରି ପାଇଁ ନାମ ପଞ୍ଜୀକରଣ କରିଛନ୍ତି। ଇତିମଧ୍ୟରେ ବାଦିମୁଣ୍ଡା ପାକ୍ସରେ ୩୬୭ କୁଇଣ୍ଟାଲ ୧୬ କେଜି ଧାନ ଉଠିଛି। ସେହିପରି ଗଡଶଙ୍କରଡୁଙ୍ଗରିପାଲି ପାକ୍ସରୁ ୨୭୭ କୁଇଣ୍ଟାଲ, ଯୋଗୀସର୍ଡାରେ ୧ହଜାର ୧୬ କୁଇଣ୍ଟାଲ, କନ୍ଦାଜୁରୀ ୯୧୯ କୁଇଣ୍ଟାଲ, କୁଶଙ୍ଗରେ ୧୦୩୧ କୁଇଣ୍ଟାଲ, କୁଶମେଲରେ ୧୩୫୧ କୁଇଣ୍ଟାଲ,ରେଙ୍ଗାଲି ପାକ୍ସରେ ୧୫୩ କୁଇଣ୍ଟାଲ ଓ ସରଗାଡ ପାକ୍ସରେ ୩୨୫ କୁଇଣ୍ଟାଲ ଧାନ କିଣାଯାଇଛି। କୁଶମେଲ ସମେତ ବିଭିନ୍ନ ସ୍ଥାନରେ ୩କେଜିରୁ ଅଧିକ ଧାନ କଟନୀଛଟନୀ ହେଉଥିବାରୁ ଚାଷୀ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ସୋମବାର ଲୋଇସିଂହା ଓ ବୁର୍ଡା ପାକ୍ସରେ ଧାନକିଣା ଯିବ ବୋଲି ଜଣାପଡିଛି।