ବରଗଡ଼ ଅଫିସ୍/ଝାରବନ୍ଧ/ ଅମ୍ବାଭୋନା,୨୭।୧୨: ଖରିଫ ଧାନ ସଂଗ୍ରହରେ ବରଗଡ଼ ଜିଲାର ଉପାନ୍ତ ଅଞ୍ଚଳଗୁଡ଼ିକୁ ଅଣଦେଖା କରାଯାଉଛି। ମଣ୍ଡିରେ ପଡ଼ିଥିବା ଧାନ ଉଠାଯାଉନାହିଁ। ଫଳରେ ଚାଷୀମାନେ ଶୀତ, କାକରରେ ଜଗି ରହିଛନ୍ତି। ଅନ୍ୟପଟେ ଧାନ ବିକ୍ରି ହୋଇ ନ ପାରିବାରୁ ଅମଳରେ ନିୟୋଜିତ ଶ୍ରମିକଙ୍କୁ ସେମାନଙ୍କ ପାରିଶ୍ରମିକ ଦେବାରେ ଚାଷୀ ହଟହଟା ହେଉଛି। ସେହିପରି ପରବର୍ତ୍ତୀ ଫସଲ ପାଇଁ ମଧ୍ୟ ପ୍ରସ୍ତୁତି କରିପାରୁନାହିଁ। ଏହାକୁ ନେଇ ସେମାନଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି।
ନଭେମ୍ବର ୨୫ରୁ ବରଗଡ଼ ଜିଲାରେ ଧାନ କିଣାବିକା ଆରମ୍ଭ ହୋଇଛି। ସମୁଦାୟ ୧୯୩ଟି ମଣ୍ଡି ଖୋଲିଥିବା ବେଳେ ବରଗଡ଼ ନିୟନ୍ତ୍ରିତ ବଜାର କମିଟି (ଆରଏମ୍ସି) ଅଧୀନରେ ୬୭, ଅତାବିରା ଆରଏମସି ଅଧୀନରେ ୫୩ ଏବଂ ପଦ୍ମପୁର ଆରଏମ୍ସି ଅଧୀନରେ ୭୩ଟି ମଣ୍ଡି ରହିଛି। ଅନ୍ୟବର୍ଷ ତୁଳନାରେ ଏଥର ୨ସପ୍ତାହ ବିଳମ୍ବରେ ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହୋଇଥିଲା। ଏଥିପାଇଁ ଚାଷୀଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡ଼ିଛି। ଧାନ ଉଠାଣ ମନ୍ଥର ହୋଇଥିବା ବେଳେ ଟୋକନ କଟକଣା ଯୋଗୁ ଚାଷୀଙ୍କ ଧାନ ବିକ୍ରି ହୋଇ ପାରୁ ନ ଥିବା ଅଭିଯୋଗ ହୋଇଛି। ପଦ୍ମପୁର ଉପଖଣ୍ଡ କୋତନା ଗ୍ରାମର ଜଣେ ଚାଷୀ ବୀରେନ୍ଦ୍ର ପ୍ରଧାନ କହିଛନ୍ତି, ଗତ ୧୨ତାରିଖରୁ ସେ ମଣ୍ଡିକୁ ଧାନ ନେଇଛନ୍ତି। ମାତ୍ର ଏପର୍ଯ୍ୟନ୍ତ ତାହା ଉଠିନାହିଁ। ସେହିପରି ପଗାରପାଣି ଗ୍ରାମର ଅନ୍ୟ ଜଣେ ଚାଷୀ ଚକ୍ରଧର ସାଗର ଗତ ୧୨ତାରିଖରୁ ମଣ୍ଡିକୁ ଧାନ ନେଇଛନ୍ତି। କିନ୍ତୁ ସପ୍ତାହେ ବିତିଯାଇଥିବା ସତ୍ତ୍ବେ ଧାନ ଉଠି ନ ଥିବା ସେ କହିଛନ୍ତି। ଅନୁରୂପ ଭାବେ ଜିଲାର ଅମ୍ବାଭୋନା, ପାଇକମାଳ ଆଦି ବ୍ଲକର ଉପାନ୍ତ ଅଞ୍ଚଳରେ ଏହି ସମସ୍ୟା ଲାଗିରହିଛି। ଅମ୍ବାଭୋନା ବ୍ଲକ ଭୁକ୍ତା ମଣ୍ଡିରେ ୪୮,୧୮୩ ପ୍ୟାକେଟ୍ ଧାନ ପଡ଼ି ରହିଥିବା ସୂଚନା ମିଳିଛି। ସେହିପରି କଣ୍ଡପଲା ପ୍ୟାକ୍ସ ଅଧୀନ ମଣ୍ଡିଗୁଡ଼ିକରେ ୨୭ ହଜାର ପ୍ୟାକେଟ୍ ଧାନ ଖୋଲା ଆକାଶତଳେ ପଡ଼ି ରହିଛି। ଏହି ମଣ୍ଡି ଗୁଡ଼ିକ କେବଳ ଗୋଟିଏ ଲେଖାଏଁ ଦୃଷ୍ଟାନ୍ତ। ଜିଲାର ପ୍ରାୟ ସବୁ ବ୍ଲକର ମଣ୍ଡିରେ ଏଭଳି ସ୍ଥିତି ଦେଖାଯାଇଛି। ଏ ସମ୍ପର୍କରେ ମୁଖ୍ୟ ଜିଲା ଯୋଗାଣ ଅଧିକାରୀ ରଜନୀକାନ୍ତ ଦାଶଙ୍କ ମତାମତ ମିଳିପାରି ନାହିଁ।