ନୂଆଦିଲ୍ଲୀ,୮ା୬: କେନ୍ଦ୍ର ସରକାର ୨୦୨୩-୨୪ ଖରିଫ ବର୍ଷ ନିମନ୍ତେ ଧାନର ସର୍ବନିମ୍ନ ସହାୟକ ମୂଲ୍ୟ (ଏମ୍ଏସ୍ପି) କୁଇଣ୍ଟାଲ ପିଛା ୭% ଅର୍ଥାତ୍ ୧୪୩ ଟଙ୍କା ବୃଦ୍ଧି କରିଛନ୍ତି। ଫଳରେ କୁଇଣ୍ଟାଲ ପିଛା ସାଧାରଣ ଧାନର ଏମ୍ଏସ୍ପି ୨,୦୪୦ ଟଙ୍କାରୁ ୨୧୮୩ ଟଙ୍କା ଏବଂ ‘ଏ’ ଗ୍ରେଡ୍ ଧାନର ଏମ୍ଏସ୍ପି ୨୦୬୦ ଟଙ୍କାରୁ ୨୨୦୨ ଟଙ୍କାକୁ ବୃଦ୍ଧି ପାଇଛି। ଗତ ୧୦ ବର୍ଷ ମଧ୍ୟରେ ଏହା ହେଉଛି ଦ୍ୱିତୀୟ ସର୍ବାଧିକ ବୃଦ୍ଧି। ୨୦୧୮-୧୯ରେ ଧାନ ଏମ୍ଏସ୍ପି କୁଇଣ୍ଟାଲ ପିଛା ୨୦୦ ଟଙ୍କା ବଢ଼ିଥିଲା।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବୁଧବାର ଅନୁଷ୍ଠିତ ଅର୍ଥନୈତିକ ବ୍ୟାପାର ସମ୍ପର୍କିତ କ୍ୟାବିନେଟ୍ କମିଟି ବୈଠକରେ ଧାନ ସମେତ ଅନ୍ୟ କେତେକ ଫସଲର ଏମ୍ଏସ୍ପି ବୃଦ୍ଧିକୁ ଅନୁମୋଦନ ଦିଆଯାଇଛି। ତଦନୁଯାୟୀ ଏହି ଫସଲଗୁଡ଼ିକର କୁଇଣ୍ଟାଲ ପିଛା ମୂଲ୍ୟ ୫.୩%ରୁ ୧୦.୩୫% ଅର୍ଥାତ୍ ୧୨୮ ଟଙ୍କାରୁ ୮୦୫ ଟଙ୍କା ଯାଏ ବଢ଼ିଛି। ଗଣମାଧ୍ୟମକୁ ସୂଚନା ଦେଇ ଉପଭୋକ୍ତା ବ୍ୟାପାର, ଖାଦ୍ୟ ଓ ସାଧରଣ ବଣ୍ଟନ ମନ୍ତ୍ରୀ ପୀୟୂଷ ଗୋୟଲ କହିଛନ୍ତି ଯେ, ପୂର୍ବବର୍ଷ ତୁଳନାରେ ଏଥର ଏମ୍ଏସ୍ପି ବୃଦ୍ଧି ଅଧିକ କରାଯାଇଛି। ଖୁଚୁରା ମୁଦ୍ରୀସ୍ଫୀତି କମୁଥିବାବେଳେ ଏହି ଏମ୍ଏସ୍ପି ବୃଦ୍ଧି ଚାଷୀମାନଙ୍କୁ ଲାଭ ଦେବ। ଏମ୍ଏସ୍ପି ବୃଦ୍ଧି ଚାଷୀଙ୍କୁ ସେମାନଙ୍କ ଉତ୍ପାଦନ ପାଇଁ ଲାଭଜନକ ମୂଲ୍ୟ ସୁନିଶ୍ଚିତ କରିବ ଏବଂ ବିଭିନ୍ନ ଫସଲ ଚାଷ କରିବାକୁ ଉତ୍ସାହିତ କରିବ ବୋଲି ଗୋୟଲ କହିଛନ୍ତି।