ବରଗଡ଼ ଅଫିସ୍.୬।୧୧: ବରଗଡ଼ ଜିଲା ପଦ୍ମପୁର ନିର୍ବାଚନ ମଣ୍ଡଳୀ ପାଇଁ ଆସନ୍ତା ଡିସେମ୍ବର ୫ତାରିଖରେ ଉପନିର୍ବାଚନ ହେବ। ଏଥିପାଇଁ ନଭେମ୍ବର ୧୦ରେ ବିଜ୍ଞପ୍ତି ପ୍ରକାଶ ପାଇବ। ଏହା ଘୋଷଣା ହେବା ପରେ କେବଳ ପଦ୍ମପୁର ନିର୍ବାଚନ ମଣ୍ଡଳୀରେ ରାଜନୈତିକ ଉଷ୍ମତା ବୃଦ୍ଧି ପାଇଛି। କେଉଁ ଦଳ କାହା ଉପରେ ଆସ୍ଥା ରଖି ନିର୍ବାଚନ ମଇଦାନକୁ ପ୍ରାର୍ଥୀ ଛାଡ଼ିବ, ସେହି ପ୍ରାର୍ଥିତ୍ୱକୁ ନେଇ ସଭିଁଙ୍କ ମନରେ ଉତ୍କଣ୍ଠା ବଢିଯାଇଛି। ଚୂଡ଼ାନ୍ତ ହୋଇ ନ ଥିଲେ ମଧ୍ୟ କଂଗ୍ରେସରୁ ପୂର୍ବତନ ବିଧାୟକ ସତ୍ୟଭୂଷଣ ସାହୁ, ଭାଜପାରୁ ପୂର୍ବତନ ବିଧାୟକ ପ୍ରଦୀପ ପୁରୋହିତ ଦଳୀୟ ପ୍ରାର୍ଥୀ ହେବେ ବୋଲି ଏକପ୍ରକାର ସ୍ପଷ୍ଟ ହୋଇଛି। ଅନ୍ୟପକ୍ଷେ ବିଜେଡ଼ି ଉପନିର୍ବାଚନ ମଇଦାନକୁ ଜଣେ ମହିଳାଙ୍କୁ ଛାଡ଼ିବ ବୋଲି ଆଲୋଚନା ହେଉଛି। ତେବେ ବିଜେଡି ଆଶାୟୀଙ୍କ ମଧ୍ୟରେ ସ୍ବର୍ଗତ ବରିହାଙ୍କ ପୁଅ ଭୋଜରାଜ ଥିଲେ ମଧ୍ୟ ପ୍ରାର୍ଥିତ୍ୱରେ ତାଙ୍କୁ ବୟସ ବାଧକ ସାଜୁଥିବା ସୂଚନା ମିଳିଛି।
ହାଇକମାଣ୍ଡ ନେବେ ନିଷ୍ପତ୍ତି
ଆମ ଦଳ ମଜବୁତ୍ ଅଛି। ଲୋକାଭିମୁଖୀ ଯୋଜନା କରିଛି। ଯୋଜନାଗୁଡ଼ିକ ଲୋକଙ୍କ ପାଖକୁ ପହଞ୍ଚତ୍ଛି। ଲୋକଙ୍କୁ ମୌଳିକ ସେବା ଯୋଗାଇବାରେ ଦଳ ସବୁବେଳେ କାର୍ଯ୍ୟ କରିଆସିଛି। ପଦ୍ମପୁର ଉପନିର୍ବାଚନରେ ବିଜେଡ଼ିର ବିଜୟ ଅନିବାର୍ଯ୍ୟ। ତେବେ ଉପନିର୍ବାଚନରେ ଦଳ କାହାକୁ ଟିକେଟ ଦେବ, ସେ ନେଇ ହାଇକମାଣ୍ଡ ହିଁ ନିଷ୍ପତ୍ତି ନେବେ। ବିଜେଡି ଏକ ଶୃଙ୍ଖଳିତ ଦଳ ଏବଂ ସେହି ନିଷ୍ପତ୍ତିକୁ ଦଳର ସମସ୍ତେ ନିଶ୍ଚୟ ମାନିବେ।
– ପ୍ରସନ୍ନ ଆଚାର୍ଯ୍ୟ, ରାଜ୍ୟ ଉପସଭାପତି, ବିଜେଡି
ପ୍ରଦୀପଙ୍କ ନାମରେ ମୋହର
ଭାଜପା ଏକ ଜାତୀୟ ଦଳ। କିଏ ଲଢ଼ିବ, କିଏ ନ ଲଢ଼ିବ, ତାହା କେନ୍ଦ୍ରୀୟ କମିଟି ନିଷ୍ପତ୍ତି ନେବ। କିନ୍ତୁ ୨୦୦୯, ୨୦୧୪ ଏବଂ ୨୦୧୯ ସାଧାରଣ ନିର୍ବାଚନରେ ଦଳ ପ୍ରଦୀପ ପୁରୋହିତଙ୍କୁ ପ୍ରାର୍ଥୀ କରିଥିଲା। ପୁରୋହିତ ୨୦୧୪ ନିର୍ବାଚନରେ ଜିତିଥିଲେ। ୨୦୧୯ ନିର୍ବାଚନରେ ସେ ହାରିଥିଲେ ମଧ୍ୟ ଲୋକଙ୍କ ସାଙ୍ଗରେ ଅଛନ୍ତି। ଫଳରେ ଦଳ ତାଙ୍କ ଉପରେ ମୋହର ମାରିପାରେ। କେନ୍ଦ୍ରୀୟ କମିଟିର ଘୋଷଣା କେବଳ ବାକି ଅଛି।
– ଅଶ୍ୱିନୀ ଷଡ଼ଙ୍ଗୀ, ଜିଲା ସଭାପତି, ଭାଜପା
ସତ୍ୟଭୂଷଣଙ୍କୁ ମିଳିପାରେ ଟିକେଟ
ସତ୍ୟଭୂଷଣ ସାହୁ ଆମ ଦଳର ଜଣେ ବରିଷ୍ଠ ନେତା। ସେ ପଦ୍ମପୁର ନିର୍ବାଚନ ମଣ୍ଡଳୀର ବିକାଶ ପାଇଁ ନିଜ ଉଦ୍ୟମ ଜାରି ରଖିଛନ୍ତି। ସେ ଲୋକଙ୍କ ସାଙ୍ଗରେ ଥିଲେ ଏବଂ ଏବେ ମଧ୍ୟ ଅଛନ୍ତି। ପଦ୍ମପୁର ନିର୍ବାଚନ ମଣ୍ଡଳୀ ଲୋକେ ତାଙ୍କୁ ଚାହୁଁଛନ୍ତି। ଫଳରେ ଦଳ ତାଙ୍କୁ ପ୍ରାର୍ଥୀ କରିପାରେ ବୋଲି ସମ୍ଭାବନା ରହିଛି। ରବିବାର ଦଳର ଏକ ପର୍ଯ୍ୟବେକ୍ଷକ ଟିମ୍ ପହଞ୍ଚତ୍ ସ୍ଥିତି ଅନୁଧ୍ୟାନ କରିବେ। ଏହାପରେ ଦଳ ଯାହାକୁ ଯୋଗ୍ୟ ମନେ କରିବ, ସେ ହିଁ ଉପନିର୍ବାଚନରେ ଦଳୀୟ ପ୍ରାର୍ଥୀ ହେବେ।
– ନୀହାର ରଞ୍ଜନ ମହାନନ୍ଦ, ଜିଲା କଂଗ୍ରେସ ସଭାପତି
ପ୍ରେମାନନ୍ଦ ଖମାରୀ