ଢେଙ୍କାନାଳ,୨୬ା୫(ରତନ ନାୟାର): ଢେଙ୍କାନାଳର ବିଶିଷ୍ଟ ସାହିତି୍ୟକ, ଗବେଷକ ଓ ଭାଷାବିତ୍ ପଦ୍ମଶ୍ରୀ ପଣ୍ଡିତ ଅନ୍ତର୍ଯ୍ୟାମୀ ମିଶ୍ର ଶନିବାର ଭୋଟଦାନରୁ ବଞ୍ଚିତ ହୋଇଛନ୍ତି। ସେ ଓ ତାଙ୍କ ସ୍ତ୍ରୀ ଛାୟାରାଣୀ ମିଶ୍ର ଏବଂ ପୁତ୍ର ଅସିତ କୁମାର ମିଶ୍ର ଭୋଟ ପରିଚୟପତ୍ର ନେଇ ଢେଙ୍କାନାଳ ସହର କାଠଗଡ଼ା ସେବାଶ୍ରମ ବିଦ୍ୟାଳୟରେ ଥିବା ୧୬୯ନଂ. ବୁଥ୍କୁ ଯାଇଥିଲେ। ହେଲେ ଭୋଟର ତାଲିକାରେ ପଦ୍ମଶ୍ରୀ ମିଶ୍ରଙ୍କ ସହିତ ତାଙ୍କ ସ୍ତ୍ରୀ ଓ ପୁଅଙ୍କ ନାମ ନ ଥିଲା। ହୁଇଲ ଚେୟାରରେ ଯାଇ ବୁଥ୍ରେ ପହଞ୍ଚିଥିବା ପଦ୍ମଶ୍ରୀର ମିଶ୍ର ଭୋଟର ଲିଷ୍ଟରେ ନାମ ନ ଥିବା ଜାଣି ନିରାଶ ହୋଇ ଫେରିଥିଲେ। ଏହାକୁ ନେଇ ସେ ତୀବ୍ର ଅସନ୍ତୋଷ ବ୍ୟକ୍ତ କରିବା ସହିତ ଦାୟିତ୍ୱରେ ଥିବା ଅଧିକାରୀ ଓ କର୍ମଚାରୀମାନେ ଚରମ ବିଶୃଙ୍ଖଳା କରିଥିବା ଅଭିଯୋଗ କରିଥିଲେ। ଏ ସଂକ୍ରାନ୍ତରେ ସେ ଜାତୀୟ ନିର୍ବାଚନ କମିଶନର, ରାଜ୍ୟ ନିର୍ବାଚନ ଅଧିକାରୀ, ଜିଲା ନିର୍ବାଚନ ଅଧିକାରୀ ତଥା ଜିଲାପାଳଙ୍କୁ ଜଣାଇଛନ୍ତି। ତାଙ୍କୁ ମତଦାନ କରିବାକୁ ସୁଯୋଗ ଦିଆଯାଉ ବୋଲି ସେ ନିବେଦନ କରିଛନ୍ତି। ଏହି ଘଟଣା ସହରରେ ଆଲୋଚନାର ବିଷୟ ହୋଇଛି।