କେନ୍ଦୁଝର,୨୬ା୧(ସ୍ବ.ପ୍ର.): ବିଶିଷ୍ଟ କଣ୍ଢେଇ ନୃତ୍ୟଗୁରୁ ମାଗୁଣି ଚରଣ କୁଅଁରଙ୍କୁ ପଦ୍ମଶ୍ରୀ ପ୍ରଦାନ ପାଇଁ ଘୋଷଣା କରାଯାଇଛି। କାଠି କଣ୍ଢେଇକୁ ନିଜର କୌଶଳରେ ଜୀବନ୍ତ କରି ଲୋକଙ୍କୁ ମନୋରଞ୍ଜନ କରିଥାନ୍ତି। କେନ୍ଦୁଝର ପୁରୁଣା ସହରର ବୈଦ୍ୟରାଜ ସାହି ବାସିନ୍ଦା ମାଗୁଣି ପିଲା ବେଳରୁ କାଠରେ ନିର୍ମିତ କଣ୍ଢେଇ ତିଆରି କରି ଏହାକୁ ଏକାଧିକ ସ୍ବରରେ ନିଜେ ପରିବେଷଣ କରିଥାନ୍ତି। ଏହା ସହିତ ସେ ଜଣେ ଉଚ୍ଚମାନର ମୂର୍ତ୍ତି ଶିଳ୍ପୀ। ୧୨ ଫେବୃୟାରୀ ୧୯୩୭ରେ ତାଙ୍କ ଜନ୍ମ। ତାଙ୍କ ପିତା ବୈଷ୍ଣବ ଚରଣ କୁଅଁର ଜଣେ ମୁକ୍ତି ଯୋଦ୍ଧା। ସେ ପୂର୍ବରୁ କେନ୍ଦ୍ର ସଙ୍ଗୀତ ନାଟକ ଏକାଡେମୀ ଦ୍ୱାରା ପୁରସ୍କୃତ ମଧ୍ୟ ହୋଇଛନ୍ତି। ରାବଣ ବଧ, ଦାନବୀର ହରିଶ୍ଚନ୍ଦ୍ର ପରି ବିଷୟକୁ ସେ କଣ୍ଢେଇ ମାଧ୍ୟମରେ ବେଶ୍ ସୁନ୍ଦର ଭାବେ ପ୍ରଦର୍ଶନ କରିଥାନ୍ତି। ଏହା ସହିତ ମହିଷାସୁର ବଧ, ସାପୁଆ କେଳା, ଭୋଗିଆ ରହସ୍ୟ ଆଦି ପରିବେଷଣ କରିଥାନ୍ତି। ତାଙ୍କୁ ପଦ୍ମଶ୍ରୀ ଘୋଷଣା ପରେ କେନ୍ଦୁଝର ଜିଲାରେ ଆନନ୍ଦ ଖେଳିଯାଇଛି। ସେ କେନ୍ଦ୍ର ସଙ୍ଗୀତ ନାଟକ ଏକାଡେମୀ ଦ୍ୱାରା କଳା କ୍ଷେତ୍ରରେ ସର୍ବୋଚ୍ଚ ପୁରସ୍କୃତ ହୋଇଥିବା ବେଳେ ଓଡ଼ିଶା ସଙ୍ଗୀତ ନାଟକ ଏକାଡେମୀରୁ କବି ସମ୍ରାଟ ଉପେନ୍ଦ୍ର ଭଞ୍ଜ ପୁରସ୍କାର ପାଇଁ ସତନ୍ତ୍ର ପରିଚୟ ସୃଷ୍ଟି କରିଥିଲେ। ତାଙ୍କୁ ବିଧାୟକ ମୋହନ ମାଝି ତାଙ୍କ ପୁରୁଣା ବଜାର ବୈଦରାଜ ସାହି ବାସଭବନଙ୍କୁ ଯାଇ ସମ୍ବର୍ଦ୍ଧିତ କରିଛନ୍ତି।