ସୋସିଆଲ ମିଡିଆରେ ଏକ ଫଟୋ ଭାଇରାଲ ହେଉଛି, ଯାହାକି ଲୋକଙ୍କ ହୃଦୟ ଜିତୁଛି। ରାଜନେତାଠାରୁ ଆରମ୍ଭ କରି ସେଲିବ୍ରିଟି ସମସ୍ତେ ଫଟୋରେ ଥିବା ମହିଳାଙ୍କ ପ୍ରଶଂସାରେ ଶତମୁଖ ହେଉଛନ୍ତି। ଏବେ ଆପଣଙ୍କ ମନରେ ପ୍ରଶ୍ନ ଉଠୁଥାଇପାରେ ମହିଳାଜଣଙ୍କ କିଏ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କ ସମ୍ମୁଖରେ ହାତ କାହିଁକି ଯୋଡ଼ିଛନ୍ତି? ତେବେ କହିରଖିବୁ ମହିଳାଜଣଙ୍କ ହେଲେ ତୁଳସୀ ଗୌଡ଼ା। ତାଙ୍କୁ ସୋମବାର ରାଷ୍ଟ୍ରପତି ଭବନରେ ଆୟୋଜିତ ସ୍ବତନ୍ତ୍ର ସମାରୋହରେ ପଦ୍ମଶ୍ରୀ ସମ୍ମାନରେ ସମ୍ମାନିତ କରାଯାଇଛି।
ତୁଳସୀ କର୍ନାଟକର ଜଣେ ଆଦିବାସୀ ମହିଳା। ତାଙ୍କୁ ଏବେ ୭୨ ବର୍ଷ ବୟସ ହୋଇଥିବା ବେଳେ ‘ଜଙ୍ଗଲର ଏନ୍ସାଇକ୍ଲୋପିଡ଼ିଆ’ ବୋଲି ମଧ୍ୟ କୁହାଯାଏ। ସମାରୋହରେ ପଦ୍ମଶ୍ରୀ ନେବାକୁ ପହଞ୍ଚିଥିବା ତୁଳସୀ ପାରମ୍ପରିକ ପୋଷାକରେ ନଜର ଆସିଥିଲେ। ପାଦରେ ତାଙ୍କର ଜୋତା ନ ଥିଲା। ତୁଳସୀଙ୍କ ସରଳତାକୁ ଦେଖି ଲୋକମାନେ କିଛି ସମୟ ପାଇଁ ଆଶ୍ଚର୍ଯ୍ୟ ହୋଇଯାଇଥିଲେ। ଏପରିକି ପ୍ରଧାନମନ୍ତ୍ରୀ ମୋଦି ମଧ୍ୟ ତାଙ୍କୁ ଦେଖି ପ୍ରଭାବିତ ହୋଇଥିଲେ। ମୋଦି ଏବଂ ଅମିତ ଶାହାଙ୍କ ସମ୍ମୁଖରେ ଯେତେବେଳେ ସେ ପହଞ୍ଚିଥିଲେ, ଉଭୟ ନେତା ତାଙ୍କୁ ସମ୍ମାନ ଦେଇ ନମସ୍କାର କରିଥିଲେ।
ଏବେ ତାଙ୍କର ଏହି ଫଟୋ ସୋସିଆଲ ମିଡିଆରେ ବେଶ ଭାଇରାଲ ହେଉଛି। ଲୋକମାନେ ପରିବେଶର ସୁରକ୍ଷା ପାଇଁ ତାଙ୍କର ଯୋଗଦାନକୁ ପ୍ରଶଂସା କରୁଛନ୍ତି। ଦୀର୍ଘ ୬ ଦଶନ୍ଧି ଧରି ତାଙ୍କର ବୃକ୍ଷରୋପଣ ଏବଂ ଅନ୍ୟାନ୍ୟ କାର୍ଯ୍ୟ ଅନ୍ୟପାଇଁ ମାର୍ଗଦର୍ଶକ ପାଲଟିବ ବୋଲି କୁହାଯାଉଛି।