ନୂଆଦିଲ୍ଲୀ,୭।୧ : କେନ୍ଦ୍ର ସରକାର ଜୈଶ-ଇ-ମହମ୍ମଦ ସହ ଜଡିତ ପିପୁଲ୍ସ ଆଣ୍ଟି ଫାସିଷ୍ଟ ଫ୍ରଣ୍ଟ (ପିଏଏଫଏଫ) ଏବଂ ଏହାର ସମସ୍ତ ଅନୁବନ୍ଧିତ ଗୋଷ୍ଠୀକୁ ଆତଙ୍କବାଦୀ ସଂଗଠନ ବୋଲି ଘୋଷଣା କରିଛନ୍ତି। ବେଆଇନ କାର୍ଯ୍ୟକଳାପ ପ୍ରତିରୋଧ ଅଧିନିୟମ ୧୯୬୭ ଅନୁଯାୟୀ ସ୍ବରାଷ୍ଟ୍ର ମନ୍ତ୍ରଣାଳୟ ଏହି ପଦକ୍ଷେପ ନେଇଛି।
ଗତ ବର୍ଷ ଜମ୍ମୁ-କଶ୍ମୀରର ରାଜୌରୀରେ ଏକ ସେନା ଶିବିରରେ ହୋଇଥିବା ଆତଙ୍କବାଦୀ ଆକ୍ରମଣ ପାଇଁ ପିଏଏଫଏଫ ଦାୟୀ ବୋଲି ଦାବି କରିଥିଲା। ଏହି ଆକ୍ରମଣରେ ୪ଜଣ ଯବାନ ଶହୀଦ ହୋଇଥିଲେ। ସୁରକ୍ଷା ବାହିନୀ ମଧ୍ୟ ଦୁଇ ଆତଙ୍କବାଦୀଙ୍କୁ ଏନକାଉଣ୍ଟର କରିଥିଲେ।
ଏହାପୂର୍ବରୁ ଗୁରୁବାର ଦିନ ସ୍ବରାଷ୍ଟ୍ର ମନ୍ତ୍ରଣାଳୟ ଲଶ୍କର ସହ ଜଡିତ ଏକ ସଂଗଠନ ଟିଆରଏଫକୁ ମଧ୍ୟ ନିଷିଦ୍ଧ ଘୋଷଣା କରିଥିଲେ। ଏହି ସଂଗଠନ ଜମ୍ମୁ-କଶ୍ମୀରରେ ଅନେକ ଟାର୍ଗେଟ ହତ୍ୟାକାଣ୍ଡରେ ଜଡିତ ଅଛି। ଟିଆରଏଫ ଏବଂ ପିଏଏଫଏଫ ପୂର୍ବରୁ ଅନ୍ୟ ୪୨ ସଂଗଠନ ଗୋଷ୍ଠୀ ଆତଙ୍କବାଦୀ ସଂଗଠନ ତାଲିକାରେ ଅନ୍ତର୍ଭୁକ୍ତ ହୋଇଛନ୍ତି। ଫଳରେ ନିଷିଦ୍ଧ ଆତଙ୍କବାଦୀ ସଂଗଠନଗୁଡିକ ସଂଖ୍ୟା ଏବେ ୪୪କୁ ବୃଦ୍ଧି ପାଇଛି।
