ଖୋର୍ଦ୍ଧା ଅଫିସ,୮ା୧୨: ପୁଣି ପାଇକ ମାଟିରେ ତେଜିଲା ଆନ୍ଦୋଳନ। ପାଇକ ବିଦ୍ରୋହକୁ ପ୍ରଥମ ସ୍ବାଧୀନତା ସଂଗ୍ରାମର ମାନ୍ୟତା, ପାଇକ ରେଜିମେଣ୍ଟ ଗଠନ, ପାଇକବୀରଙ୍କୁ ପେନସନ୍ ବ୍ୟବସ୍ଥା, ସ୍ମାରକୀ ନିର୍ମାଣ କାର୍ଯ୍ୟ ତ୍ୱରାନ୍ବିତ ନିମନ୍ତେ ଦାବି ଜୋର୍ ହୋଇଛି। ବୁଧବାର ବରୁଣେଇ ପାହାଡ଼ ପାଦଦେଶରେ ପାଇକମାନେ ଏସବୁ ଦାବି ନେଇ ଏକାଠି ହୋଇଛନ୍ତି। ସେମାନେ ଖଣ୍ଡା, ଢାଲ ଧରି ଯୋଦ୍ଧା ବେଶରେ ନାଚି ନାଚି ପ୍ରସ୍ତାବିତ ସ୍ମାରକୀସ୍ଥଳରେ ପହଞ୍ଚିଥିଲେ।
ଓଡ଼ିଶା ରାଜ୍ୟ ପାଇକ ଆଖଡ଼ା ମହାସଂଘ ଏବଂ ଖୋର୍ଦ୍ଧା ବିକାଶ ମଞ୍ଚର ମିଳିତ ଆନୁକୂଲ୍ୟରେ ବିଭିନ୍ନ ଅଞ୍ଚଳରୁ ଆସିଥିବା ପାଇକ ସଙ୍ଗଠନର ସଦସ୍ୟମାନେ ବରୁଣେଇ ପୀଠରେ ଏକାଠି ହୋଇଥିଲେ। ମା’ ବରୁଣେଇ ଏବଂ କରୁଣେଇଙ୍କ ଆଶୀର୍ବାଦ ନେଇ ବୀରବେଶରେ ସଜେଇ ହୋଇ ହାତରେ ଖଣ୍ଡା, ଢାଲ, ତୁରି ଧରି ସେମାନଙ୍କ ଦାବି ପ୍ରତି କେନ୍ଦ୍ର ଓ ରାଜ୍ୟ ସରକାରଙ୍କ ଦୃଷ୍ଟି ଆକର୍ଷଣ କରିବାକୁ ଚେଷ୍ଟା କରିଥିଲେ। ଏହି ସମାବେଶରେ ଜଟଣୀ ବିଧାୟକ ସୁରେଶ କୁମାର ରାଉତରାୟ, ମହାସଂଘ ସଭାପତି ପ୍ରକାଶ ଶ୍ରୀଚନ୍ଦନ, ସମ୍ପାଦକ ଦିଲୀପ ଶ୍ରୀଚନ୍ଦନ, ବିକାଶ ମଞ୍ଚ ସଭାପତି ନରେନ୍ଦ୍ର ପୃଷ୍ଟିଙ୍କ ସମେତ ସ୍ଥାନୀୟ ଶିକ୍ଷାବିତ, ବୁଦ୍ଧିଜୀବୀ ଓ ପାଇକ ସଙ୍ଗଠନ ସାମିଲ ହୋଇଥିଲେ। ପ୍ରସ୍ତାବିତ ପାଇକ ସ୍ମାରକୀ ନିର୍ମାଣ ସ୍ଥଳରେ ପହଞ୍ଚି ବୀରବାଦ୍ୟ ତାଳେ ତାଳେ ପାଇକ ସଙ୍ଗଠନର ସଦସ୍ୟମାନେ ଜଣକ ପରେ ଜଣେ ପାଇକ ଆଖଡ଼ା ପରିବେଷଣ କରି ପାଇକ ବିଦ୍ରୋହର ସ୍ମୃତିକୁ ତାଜା କରିଥିଲେ। ବିଧାୟକ ରାଉତରାୟ ହାତରେ ଖଣ୍ଡା ଧରି ଓ ଢୋଲ ବଜାଇ ବୀରବାଦ୍ୟ ତାଳେ ତାଳେ ପାଇକ ଆଖଡ଼ା ଦଳ ସହ ନାଚି ନାଚି ଶୋଭାଯାତ୍ରାରେ ପାଇକ ବିଦ୍ରୋହକୁ ପ୍ରଥମ ସ୍ବାଧୀନତା ସଂଗ୍ରାମ ମାନ୍ୟତା ପାଇଁ ଦାବି କରିଥିଲେ। ରାଉତରାୟ କହିଥିଲେ, ଖୋର୍ଦ୍ଧା ହେଉଛି ବୀର ମାଟି। ୧୮୫୭ର ସିପାହି ବିଦ୍ରୋହ ପୂର୍ବରୁ ଖୋର୍ଦ୍ଧାରେ ୧୮୦୪ରେ ଜୟୀ ରାଜଗୁରୁ ଏବଂ ୧୮୧୭ରେ ବକ୍ସି ଜଗବନ୍ଧୁଙ୍କ ନେତୃତ୍ୱରେ ବ୍ରିଟିଶ ବିରୋଧରେ ପାଇକମାନେ ସଶସ୍ତ୍ର ସଂଗ୍ରାମ କରିଥିଲେ। ପାଇକ ବିଦ୍ରୋହ ଓଡ଼ିଆ ଜାତିର ଅସ୍ମିତା। ପାଇକ ବିଦ୍ରୋହର ଦ୍ୱିଶତ ବାର୍ଷିକୀ ଅବସରରେ ପ୍ରଥମ ସ୍ବାଧୀନତା ମାନ୍ୟତା ଦେଇ ଏବେ କେନ୍ଦ୍ର ସଂସ୍କୃତି ମନ୍ତ୍ରଣାଳୟ ଏହାକୁ ପ୍ରତ୍ୟାଖ୍ୟାନ କରିବା ନିନ୍ଦନୀୟ। କେନ୍ଦ୍ରର ଏହି ନିଷ୍ପତ୍ତିକୁ ତୃଣମୂଳସ୍ତରରେ ବିରୋଧ କରାଯିବ। ଆଗାମୀ ଦିନରେ ଖୋର୍ଦ୍ଧାରୁ ଦିଲ୍ଲୀ ପର୍ଯ୍ୟନ୍ତ ଆନ୍ଦୋଳନକୁ ବ୍ୟାପକ କରାଯିବ। ୨୦୧୯ ଡିସେମ୍ବର ୮ରେ ତତ୍କାଳୀନ ରାଷ୍ଟ୍ରପତିଙ୍କ ଦ୍ୱାରା ଶିଳାନ୍ୟାସ ହୋଇଥିବା ପାଇକ ସ୍ମାରକୀ ନିର୍ମାଣ କାର୍ଯ୍ୟ ତ୍ୱରାନ୍ବିତ ଲାଗି ଦାବି କରାଯାଇଥିଲା।