ଯୋଡ଼ା,୨୬।୭ (ଡି.ଏନ.ଏ.) କେନ୍ଦୁଝର ଜିଲାରେ ଏକାଧିକ ଖଣି ଖାଦାନ ଓ କାରଖାନା ରହିଥିବା ବେଳେ ସରକାର ହଜାର ହଜାର କୋଟି ଟଙ୍କା ରାଜସ୍ବ ଲାଭ କରୁଛନ୍ତି। ଏହା ବ୍ୟତୀତ ଜିଲା ଖଣିଜ ପାଣ୍ଠି ( ଡିଷ୍ଟ୍ରିକ୍ଟ ମିନେରାଲ ଫାଉଣ୍ଡେଶନ )ରେ ବହୁ ଟଙ୍କା ଗଚ୍ଛିତ ହୋଇ ରହିଥିଲେ ସୁଦ୍ଧା ଏବେ ବି ବିକଶିତ ଅଞ୍ଚଳରେ ଜନନୀ ଯନ୍ତ୍ରଣା ଭଳି ଘଟଣା ଦେଖିବାକୁ ମିଳିଛି। ପକ୍କା ସଡ଼କ ନ ଥିବାରୁ ସ୍ବାସ୍ଥ୍ୟସେବା ପାଇବାକୁ ଗର୍ଭବତୀଙ୍କୁ ଖଟିଆରେ ବୁହାଯାଉଛି। ଏଭଳି ଘଟଣା ଘଟିଛି ଯୋଡ଼ା ବ୍ଲକ ବଲାଣି ପଞ୍ଚାୟତ ଲୋଟାପାଣି ଗ୍ରାମରେ।
ପକ୍କା ସଡକ ନ ଥିବାରୁ ଗ୍ରାମକୁ ଜନନୀ ଏକ୍ସପ୍ରେସ ପହଞ୍ଚି ପାରିଲାନି। ପ୍ରାୟ ଏକ ସପ୍ତାହ ତଳେ ଜଣେ ଗର୍ଭବତୀଙ୍କୁ ଦୀର୍ଘ ୨ କି.ମି. ଖଟିଆରେ ବୁହା ହେବା ପରେ ଆମ୍ବୁଲାନ୍ସର ସୁବିଧା ଯୋଗାଇ ଦିଆଯାଇଥିଲା ବୋଲି ରବିବାର ଏବିଷୟରେ ଜଣାପଡ଼ିଛି। ସୂଚନା ଅନୁସାରେ ଲୋଟାପାଣି ଗ୍ରାମର ବିପିନ ମୁଣ୍ଡାଙ୍କ ସ୍ତ୍ରୀଙ୍କର ଯନ୍ତ୍ରଣା ଆରମ୍ଭ ହେବା ପରେ ସେ ଜନନୀ ଏକ୍ସପ୍ରେସର ସହାୟତା ଲୋଡ଼ିଥିଲେ। ତେବେ କଚ୍ଚା ଓ କାଦୁଅ ରାସ୍ତାରେ ଆମ୍ବୁଲାନ୍ସ ତାଙ୍କ ଘର ପର୍ଯ୍ୟନ୍ତ ପହଞ୍ଚି ପାରି ନ ଥିଲା। ଶେଷରେ ଗାଁ ମୁଣ୍ଡରେ ଆମ୍ବୁଲାନ୍ସଟି ଅଟକି ଯାଇଥିଲା। ଗ୍ରାମବାସୀ ଗର୍ଭବତୀଙ୍କୁ ଖଟିଆରେ ବୋହିକି ସେଠାରେ ପହଞ୍ଚାଇବାପରେ ସେ ସ୍ବାସ୍ଥ୍ୟ ସେବା ପାଇପାରିଥିଲେ। ନିର୍ବାଚିତ ଜନ ପ୍ରତିନିଧି ନିଜ ଅଞ୍ଚଳ ପ୍ରତି ଆନ୍ତରିକତା ଦେଖାଇଲେ ଓ ଜିଲା ପ୍ରଶାସନ ଅଧିକାରୀ ନିଜର କର୍ତ୍ତବ୍ୟ ସମ୍ପାଦନ କଲେ ବାସ୍ତବରେ ଅଞ୍ଚଳ ବିକଶିତ ହୋଇ ପାରିବ ବୋଲି ଜନ ସାଧାରଣରେ ମତ ପ୍ରକାଶ ପାଇଛି।