କଟକ ଅଫିସ, ୨୪।୭: ଚଳିତବର୍ଷ ଟୋକିଓ ଅଲିମ୍ପିକ୍ସରେ ଓଡ଼ିଶା ଚିତ୍ରଶିଳ୍ପୀଙ୍କ ଚିତ୍ରକଳା ପ୍ରଦର୍ଶନ ହେବ। ଏ ନେଇ ଇଣ୍ଡିଆନ କଣ୍ଟେମ୍ପୋରାରୀ ଆର୍ଟିଷ୍ଟ ଆସୋସିଏସନ ପକ୍ଷରୁ ଆନ୍ତର୍ଜାତିକ ଭର୍ଚୁଆଲ ଚିତ୍ରକଳା ପ୍ରଦର୍ଶନୀ ‘ଅଲିମ୍ପିଆ’ ମାଧ୍ୟମରେ ଟୋକିଓର ମେମୋରିଆଲ ହଲରେ ଚିତ୍ରଗୁଡିକର ଭିଡିଓ ପ୍ରଦର୍ଶନ କରାଯିବ। କଟକର ଆଇସିଏଏ ପ୍ରାଙ୍ଗଣରେ ଶୁକ୍ରବାର ଉକ୍ତ ଭର୍ଚୁଆଲ ଚିତ୍ରକଳା ପ୍ରଦର୍ଶନୀ ‘ଅଲିମ୍ପିଆ’କୁ କ୍ରୀଡାବିତ୍ ଦିଲୀପ ତିର୍କୀ ଉଦ୍ଘାଟନ କରିଥିଲେ। ଓଡ଼ିଶାରୁ ୭୦ ଜଣ ଜାତୀୟ ଓ ଆନ୍ତର୍ଜାତୀୟ ଚିତ୍ରଶିଳ୍ପୀ ଏଥିରେ ଭାଗ ନେଇଛନ୍ତି। ଅନ୍ତର୍ଜାତୀୟ ଅଲିମ୍ପିକ ପରିଚାଳନା କମିଟିରୁ ସ୍ବୀକୃତି ମିଳିବା ପରେ ଏହି ଚିତ୍ରଗୁଡିକ ଭିଡିଓ ମାଧ୍ୟମରେ ଟୋକିଓ ଅଲିମ୍ପିକ୍ସକୁ ପଠାଯାଇଛି। ଏହି କାର୍ଯ୍ୟକ୍ରମରେ ସଙ୍ଗଠନ ସମ୍ପାଦକ ତଥା ଚିତ୍ରଶିଳ୍ପୀ ସଞ୍ଜୀବ ପଟ୍ଟନାୟକ ଅଧ୍ୟକ୍ଷତା କରିଥିଲେ। ଏହି ଚିତ୍ରକଳା ପ୍ରଦର୍ଶନରେ ଓଡ଼ିଶାରୁ ଚିତ୍ରଶିଳ୍ପୀ ମିନକେତନ ପଟ୍ଟନାୟକ, ଶ୍ରୀହର୍ଶ ଶୁକ୍ଲା, ରାଜୀବ ଲୋଚନ ସାହୁ, ମମତା ସାମନ୍ତରାୟ, ଦୀପ୍ତିମୟୀ ପାଢ଼ୀ, ମହମ୍ମଦ ଅନୁୱାର, ଡ. ରଞ୍ଜନ ମଲ୍ଲିକ, ମନୋଜ ମହାନ୍ତି ପ୍ରମୁଖ ଅଂଶଗ୍ରହଣ କରିଛନ୍ତି।