ନୂଆଦିଲ୍ଲୀ,୧୪।୧: ଜମ୍ମୁ-କଶ୍ମୀରରେ ଆତଙ୍କବାଦୀ କାର୍ଯ୍ୟକଳାପ ବଢ଼ାଇବା ପାଇଁ ପାକିସ୍ତାନ ଉଦ୍ୟମ ଚଳାଇଥିବାବେଳେ ଏହାକୁ ରୋକିବା ଲାଗି ଭାରତୀୟ ସେନା ଅପରେଶନ ‘ସର୍ବଶକ୍ତି’ ଆରମ୍ଭ କରିଛି। ଏହି ଅଭିଯାନରେ ସେନା ପିର୍ ପଞ୍ଜଲ ପର୍ବତମାଳାର ଉଭୟ ପାର୍ଶ୍ୱରେ ରହିଥିବା ଆତଙ୍କବାଦୀଙ୍କୁ ଟାର୍ଗେଟ କରିବ। ପାକିସ୍ତାନୀ ପ୍ରକ୍ସି ଆତଙ୍କବାଦୀ ଗୋଷ୍ଠୀ ପିର୍ ପଞ୍ଜଲର ଦକ୍ଷିଣ ପାର୍ଶ୍ୱ ବିଶେଷ କରି ରାଜୌରୀ ପୁଞ୍ଚ୍ ସେକ୍ଟରରେ ଆତଙ୍କବାଦ ବଢ଼ାଇବାକୁ ଉଦ୍ୟମ କରୁଛି। ଗତ କିଛି ମାସ ମଧ୍ୟରେ ଉକ୍ତ ଅଞ୍ଚଳରେ ଆତଙ୍କବାଦୀଙ୍କ ଆକ୍ରମଣରେ ପ୍ରାୟ ୨୦ ଜଣ ଯବାନଙ୍କ ଜୀବନ ଗଲାଣି। ଗତ ମାସ ୨୧ରେ ଡେରା କି ଗଲି ଅଞ୍ଚଳରେ ଆତଙ୍କବାଦୀ ଆକ୍ରମଣରେ ୪ ଯବାନ ଶହୀଦ ହୋଇଥିଲେ। ପାକିସ୍ତାନର ଆତଙ୍କବାଦ ଯୋଜନାକୁ ପଣ୍ଡ କରିବା ପାଇଁ ଜମ୍ମୁ-କଶ୍ମୀର ପୋଲିସ, ସିଆର୍ପିଏଫ୍, ସ୍ପେଶାଲ ଅପରେଶନ ଗ୍ରୁପ୍ ଓ ଗୋଇନ୍ଦା ସଂସ୍ଥା ଏକାଠି କାମ କରୁଛନ୍ତି।
