ବଡ଼ବିଲ,୨୦।୩ (ସ୍ବ.ପ୍ର.): ମାର୍ଚ୍ଚ ୨୦ ତାରିଖରେ ପାଳନ ହେଉଛି ବିଶ୍ୱ ପଖାଳ ଦିବସ। ଏହି ପରିପ୍ରେକ୍ଷୀରେ କେନ୍ଦୁଝର ଜିଲା ବଡ଼ବିଲର ଅଗ୍ରଣୀ ସାଂସ୍କୃତିକ ଅନୁଷ୍ଠାନ ନୀଳାଦ୍ରି ପକ୍ଷରୁ ଏହି ଦିବସକୁ ସୋମବାର ବେଶ୍ ଜାକଜମକରେ ପାଳନ କରାଯାଇଛି। କାର୍ଯ୍ୟକ୍ରମରେ ଅଞ୍ଚଳର ବିଭିନ୍ନ ଅଣ ଓଡ଼ିଆଙ୍କୁ ସାମିଲକରି ନୀଳାଦ୍ରି ଭ୍ରାତୃତ୍ୱଭାବ ସୃଷ୍ଟି କରିବାରେ ସଫଳ ହୋଇଛି।
ପଖାଳ ଭୋଜନ ପୂର୍ବରୁ ଏକ ସଭାର ଆୟୋଜନ ହୋଇଥିଲା। ସଭାରେ ନୀଳାଦ୍ରିର ବରିଷ୍ଠ ସଦସ୍ୟ ତଥା ଟ୍ରଷ୍ଟି ରମେଶ ଚନ୍ଦ୍ର ମିଶ୍ର କହିଥିଲେ, ଓଡ଼ିଆଙ୍କ ପ୍ରିୟ ଏହି ପଖାଳରେ ଭରପୂର ପରିମାଣରେ ରୋଗ ପ୍ରତିରୋଧକ ଶକ୍ତି ରହିଛି । ଅନ୍ୟତମ ଅତିଥି ଭାବେ ଜୟରାମ ପରିଡ଼ା ଯୋଗଦେଇ ପଖାଳ ସ୍ବାସ୍ଥ୍ୟ ପ୍ରତି ହିତକର। ନିୟମିତ ପଖାଳ ଖାଉଥିବା ବ୍ୟକ୍ତି ବହୁତ କମ୍ ରୋଗରେ ପଡ଼ିଥାନ୍ତି ବୋଲି ମତବ୍ୟକ୍ତ କରିଛନ୍ତି।
ଏପରିକି ପଖାଳ ଓ ତୋରାଣିରେ କାର୍ବୋହାଇଡ୍ରେଟ୍ ସହ ରୋଗ ପ୍ରତିରୋଧ ଶକ୍ତି ପ୍ରଚୁର ପରିମାଣରେ ରହିଥାଏ, ଯାହାକି ଶକ୍ତିବର୍ଦ୍ଧକ ଓ କ୍ଷୀଣ ଶରୀରକୁ ସୁସ୍ଥ ସବଳ, ମୋଟା କରିବାରେ ସହାୟକ ହୋଇଥାଏ ବୋଲି ଉପସ୍ଥିତ ଅନ୍ୟ ଅତିଥିମାନେ ମତବ୍ୟକ୍ତ କରିଥିଲେ। ପଖାଳ ସାଙ୍ଗକୁ ଭେଣ୍ଡିଭଜା, ଆଳୁ ବାଇଗଣ ଭର୍ତା, ଶାଗବଡ଼ି, ଛୁଇଁଭଜା, ଫୁଲ ବଡ଼ି ଭଜା, ବାଇଗଣ ଭଜା, କଲରା ଭଜା, ଧନିଆପତ୍ର ଚଟଣି, ଚିଙ୍ଗୁଡ଼ି ଛେଚା, ରୋହିମାଛ ଭଜା, ଚୂନାମାଛ ଭଜା ଖାଇ ଆନନ୍ଦିତ ହୋଇଥିଲେ ନିମନ୍ତ୍ରିତ ଅତିଥି। ନୀଳାଦ୍ରିର ଏହି ଆୟୋଜନରେ ମାରୱାଡି, ଗୁଜରାଟୀ, ପଞ୍ଜାବୀ, ମୁସଲମାନ ସମ୍ପ୍ରଦାୟର ଅନେକ ଅତିଥି ସାମିଲହୋଇ ପଖାଳ ଖାଇବାର ମଜା ନେଇଥିଲେ।