କରାଚି,୧୦।୧୨: ଅଡ଼ୁଆରେ ପାକିସ୍ତାନ କ୍ରିକେଟ ବୋର୍ଡ(ପିସିବି)। ପୂର୍ବ ଦ୍ରୁତ ବୋଲର ମହମ୍ମଦ ଅକ୍ରମ ବର୍ତ୍ତମାନର ଚୟନ ବ୍ୟବସ୍ଥାରେ କାମ କରିବାକୁ ମନା କରି ତାଙ୍କ ନାମ ପ୍ରତ୍ୟାହାର କରି ନେଇଛନ୍ତି। ଫଳରେ ପିସିବିକୁ ନୂଆ ମୁଖ୍ୟ ଚୟନକର୍ତ୍ତା ମିଳିପାରୁନାହିଁ। ଅକ୍ରମ ଏହି ପଦ ପାଇଁ ପ୍ରଥମ ପସନ୍ଦ ଥିଲେ। ହେଲେ ଚୟନ ପାଇଁ ପୁରୁଣା ବ୍ୟବସ୍ଥା ଲାଗୁ କରାଯାଉ ବୋଲି ସେ ସର୍ତ୍ତ ରଖିଥିଲେ। ହେଲେ ତାହା ନ ହେବାରୁ ସେ ଏଭଳି ନିଷ୍ପତ୍ତି ନେଇଛନ୍ତି।
ପୁରାତନ ବ୍ୟବସ୍ଥାରେ ବୋର୍ଡ ମୁଖ୍ୟ ଚୟନକର୍ତ୍ତାଙ୍କ ଅଧ୍ୟକ୍ଷତାରେ ତିନି ଅଥବା ପାଞ୍ଚ ସଦସ୍ୟ ବିଶିଷ୍ଟ ଜାତୀୟ ଚୟନ କମିଟି ଗଠନ କରାଯାଇଥାଏ। ବୋର୍ଡ ସଭାପତି ଏହାକୁ ଅନୁମୋଦନ କରିଥାନ୍ତି। ଅକ୍ଟୋବର ୨୦୧୯ରୁ ଜାତୀୟ ଦଳର ମୁଖ୍ୟ ପ୍ରଶିକ୍ଷକ ମିସବାହ ଉଲ ହକ ଏହି ନୁତନ ବ୍ୟବସ୍ଥା କାର୍ଯ୍ୟକାରୀ କରିଥିଲେ। ନିକଟରେ ସେ ନିଜ ପଦରୁ ଇସ୍ତଫା ଦେବା ପରେ ଏହି ପଦ ଖାଲି ରହିଛି।