ଦୁବାଇ,୩୦।୧୧: ଆସନ୍ତା ବର୍ଷ ପାକିସ୍ତାନରେ ଖେଳାଯିବାକୁ ଥିବା ଆଇସିସି ଚାମ୍ପିୟନ୍ସ ଟ୍ରଫି ଆୟୋଜନକୁ ନେଇ ଲାଗି ରହିଥିବା ଦ୍ୱନ୍ଦ୍ୱରେ ପଡିଛି ପୂର୍ଣ୍ଣଚ୍ଛେଦ। ଆଇସିସି ମଧ୍ୟସ୍ଥତାରେ ଅନୁଷ୍ଠିତ ବୈଠକରେ ହାଇବ୍ରିଡ ମଡେଲ ପାଇଁ ସହମତି ପ୍ରକାଶ କରିଛନ୍ତି ପାକିସ୍ତାନ କ୍ରିକେଟ ବୋର୍ଡ(ପିସିବି) ମୁଖ୍ୟ ମୋହସିନ୍ ନକ୍ଭି। ଆସନ୍ତା ଫେବୃଆରୀ-ମାର୍ଚ୍ଚ ମାସରେ ହେବାକୁ ଥିବା ଏହି ଟୁର୍ନାମେଣ୍ଟ ପାଇଁ ଯିବାକୁ ମନା କରିଥିଲା ଭାରତ। ସୁରକ୍ଷା ଦୃଷ୍ଟି କୋଣରୁ ଭାରତ ସରକାର ଯିବା ପାଇଁ ଅନୁମତି ଦେଇ ନ ଥିଲେ। ଦୀର୍ଘ ଦିନର ବୈଠକ ପରେ ନକ୍ଭି ଶେଷରେ ହାଇବ୍ରିଡ ମଡେଲ ପାଇଁ ସହମତି ପ୍ରକାଶ କରିଥିଲେ ମଧ୍ୟ ଏକ ସର୍ତ୍ତ ରଖିଛନ୍ତି। ୨୦୩୧ ଯାଏ ଭାରତରେ ହେବାକୁ ଥିବା କୌଣସି ଟୁର୍ନାମେଣ୍ଟରେ ପାକିସ୍ତାନ ଅଂଶଗ୍ରହଣ କରିବ ନାହିଁ ବୋଲି ନକ୍ଭି କହିଛନ୍ତି।
ଉଭୟ ପକ୍ଷଙ୍କ ସମ୍ମାନକୁ ଦୃଷ୍ଟିରେ ରଖିବା ସହ କ୍ରିକେଟ୍ ଦୃଷ୍ଟିକୋଣକୁ ମଧ୍ୟ ଗୁରୁତ୍ୱ ଦେଇ ପିସିବି ହାଇବ୍ରିଡ ମଡେଲ ପାଇଁ ରାଜି ହୋଇଥିବା ନକ୍ଭି ମତ ରଖିଥିଲେ। କ୍ରିକେଟର ସ୍ବାର୍ଥ ସହିତ ପାକିସ୍ତାନର ସମ୍ମାନ ମଧ୍ୟ ଆମ ପାଇଁ ଗୁରୁତ୍ୱପୂର୍ଣ୍ଣ। ତେଣୁ ୨୦୩୧ ଯାଏ ଭାରତରେ ହେବାକୁ ଥିବା ସମସ୍ତ ଟୁର୍ନାମେଣ୍ଟ ହାଇବ୍ରିଡ ମୋଡରେ ଖେଳିବା ପାଇଁ ପିସିବି ନିଷ୍ପତ୍ତି ନେଇଥିବା କହିଛନ୍ତି ନକ୍ଭି। ଆଇସିସି ଏହି ନିଷ୍ପତ୍ତିକୁ ଗ୍ରୀନ୍ ସିଗ୍ନାଲ ଦେବା ପରେ ହାଇବ୍ରିଡ ମଡେଲ ପାଇଁ ପିସିବି ରାଜି ହେବ ବୋଲି ସେ କହିଛନ୍ତି। ଏହା ସହ ଚଳିତ ଆର୍ଥିକ ବର୍ଷରେ ପାକିସ୍ତାନର ରେଭିନ୍ୟୁରେ ୫.୭୫ ପ୍ରତିଶତ ବୃଦ୍ଧି କରିବା ପାଇଁ ନକ୍ଭି ଅନୁରୋଧ କରିଛନ୍ତି।
ଦୁବାଇରେ ଅନୁଷ୍ଠିତ ଆଇସିସି ବୈଠକରେ ମୋହସିନ୍ ନକ୍ଭି ଓ ବିସିସିଆଇ ସମ୍ପାଦକ ଜୟ ଶାହା ଅଂଶଗ୍ରହଣ କରିଥିଲେ। ମୋହସିନ୍ ଏହି ବୈଠକରେ ଉପସ୍ଥିତ ଥିବା ସମୟରେ ଶାହା ଭର୍ଚୁଆଲରେ ଯୋଗ ଦେଇଥିଲେ। ୨୦୩୧ ମଧ୍ୟରେ ଭାରତରେ ୩ଟି ଆଇସିସି ଟୁର୍ନାମେଣ୍ଟ ଖେଳାଯିବ। ଶ୍ରୀଲଙ୍କା ସହ ମିଳିତ ଭାବରେ ୨୦୨୬ ଟି୨୦ ବିଶ୍ୱକପ, ୨୦୨୯ ଚାମ୍ପିୟନ୍ସ ଟ୍ରଫି ଓ ବାଂଲାଦେଶ ସହ ମିଳିତ ଭାବରେ ୨୦୩୧ ଦିନିକିଆ ବିଶ୍ୱକପ ଆୟୋଜନ କରିବାକୁ ଯାଉଛି ଭାରତ।