ମାଞ୍ଚେଷ୍ଟର, ୩୦।୮: ଘରୋଇ ଇଂଲଣ୍ଡ ବିପକ୍ଷରେ ଏଠାରେ ଅନୁଷ୍ଠିତ ୨ୟ ଟି୨୦ ମ୍ୟାଚ୍ ଅବସରରେ ପାକିସ୍ତାନ ଅଧିନାୟକ ବାବର ଆଜାମ ଏକ ଦର୍ଶନୀୟ ଅର୍ଦ୍ଧଶତକୀୟ ଇନିଂସ ଖେଳିଛନ୍ତି। ଟସ୍ ହାରି ବ୍ୟାଟିଂ ସୁଯୋଗ ପାଇଥିବା ପାକିସ୍ତାନ ନିର୍ଦ୍ଧାରିତ ୨୦ ଓଭରରେ ୪ ଉଇକେଟ୍ ହରାଇ ୧୯୫ ରନ୍ ସଂଗ୍ରହ କରିଛି। ଓପନର୍ ତଥା ଟି୨୦ କ୍ରିକେଟ୍ର ଏକ ନମ୍ବର ମାନ୍ୟତାପ୍ରାପ୍ତ ବ୍ୟାଟ୍ସମ୍ୟାନ ବାବର୍ ୪୪ ବଲରୁ ୫୬ ରନ୍ ସଂଗ୍ରହ କରିଛନ୍ତି। ଇତ୍ୟବସରରେ ସେ ଟି୨୦ କ୍ରିକେଟ୍ରେ ୧୫୦୦ ରନ୍ ପୂରଣ କରିଛନ୍ତି। ଟି୨୦ କ୍ରିକେଟ୍ରେ କମ୍ ଇନିଂସରେ ୧୫ ଶହ ରନ୍ ପୂରଣ କରିବାରେ ସେ ଭାରତୀୟ ଅଧିନାୟକ ବିରାଟ କୋହଲି ଓ ଅଷ୍ଟ୍ରେଲିଆର ଆରୋନ ଫିଞ୍ଚ୍ଙ୍କ ସମକକ୍ଷ ହୋଇଛନ୍ତି। ଆଜମ ମାତ୍ର ୩୯ ଇନିଂସରୁ ୧୫୦୦ ରନ୍ ପୂରଣ କରିଛନ୍ତି। ଏଥିପୂର୍ବରୁ କୋହଲି ଓ ଫିଞ୍ଚ୍ ମଧ୍ୟ ସମାନ ସଂଖ୍ୟକ ଇନିଂସ ସହାୟତାରେ ଏହି ମାଇଲଷ୍ଟୋନ୍ ଛୁଇଁଥିଲେ। ଫଳରେ ଏହି ୩ ବ୍ୟାଟ୍ସମ୍ୟାନ ମିଳିତ ଭାବେ ଏହି ତାଲିକାର ଶୀର୍ଷରେ ରହିଛନ୍ତି। ଏହି ତାଲିକାର ୨ୟ ସ୍ଥାନରେ କ୍ରିସ୍ ଗେଲ୍ (୪୪ ଇନିଂସ) ରହିଛନ୍ତି।
