ସାଉଥାମ୍ପଟନ, ୧ା୭ (ଏପି): ସର୍ବଶେଷ କରୋନା ଭାଇରସ ଟେଷ୍ଟରେ ଉଭୟ ପାକିସ୍ତାନ ଓ ଇଂଲଣ୍ଡ କ୍ରିକେଟ ଖେଳାଳି ଉତ୍ତୀର୍ଣ୍ଣ ହୋଇଛନ୍ତି। ରବିବାର ଇଂଲଣ୍ଡରେ ପହଞ୍ଚତ୍ଥିବା ପାକିସ୍ତାନ ଦଳର ସମସ୍ତ ୨୦ ଖେଳାଳି ଓ ୧୧ ଷ୍ଟାଫ୍ଙ୍କ ରିପୋର୍ଟ ନେଗେଟିଭ୍ ଆସିଛି। ଇଂଲଣ୍ଡ ଆଣ୍ଡ ଓ୍ବେଲ୍ସ କ୍ରିକେଟ ବୋର୍ଡ ପକ୍ଷରୁ ମଙ୍ଗଳବାର ଏହା ପ୍ରକାଶ କରାଯାଇଛି। ଅଗଷ୍ଟରେ ଟେଷ୍ଟ ଓ ଟି୨୦ ସିରିଜ ଖେଳିବାକୁଥିବା ପାକିସ୍ତାନ ଏବେ ଓ୍ବର୍ସେଷ୍ଟରରେ ୨ ସପ୍ତାହପାଇଁ କ୍ୱାରାଣ୍ଡାଇନରେ ରହିବ। ସେହିପରି ଇଂଲଣ୍ଡ ଖେଳାଳିଙ୍କ ତୃତୀୟ ରାଉଣ୍ଡ ଟେଷ୍ଟ ମଧ୍ୟ ନେଗେଟିଭ୍ ଆସିଛି। ସେମାନେ ସାଉଥାମ୍ପଟନଠାରେ ଆସନ୍ତା ସପ୍ତାହରୁ ଓ୍ବେଷ୍ଟଇଣ୍ଡିଜ ବିପକ୍ଷ ପ୍ରଥମ ଟେଷ୍ଟ ଖେଳିବାକୁ ପ୍ରସ୍ତୁତ ହେଉଛନ୍ତି। ଇଂଲଣ୍ଡ ଟୁର୍ରେ ଆସିବାକୁଥିବା ଅନ୍ୟ ୬ ଜଣ ପାକିସ୍ତାନ ଖେଳାଳିଙ୍କ ରିପୋର୍ଟ ଗତ ସପ୍ତାହରେ ପଜିଟିଭ୍ ଆସିଥିଲା। ଫଳରେ ସେମାନେ ଘରେ ରହିଥିଲେ। ୩ ଦିନପରେ ହୋଇଥିବା ଟେଷ୍ଟରେ ସେମାନଙ୍କ ରିପୋର୍ଟ ନେଗେଟିଭ୍ ଆସିଛି। ତେଣୁ ଏହି ଖେଳାଳିମାନେ ଇଂଲଣ୍ଡରେ ଦଳସହ ଯୋଗଦେବାପାଇଁ ଅନୁମତି ପାଇଛନ୍ତି। ଏହି ୬ ଖେଳାଳିହେଲେ ଓପନିଂ ବ୍ୟାଟ୍ସମ୍ୟାନ ଫକର ଜମନ, ଅଲରାଉଣ୍ଡର ମହମ୍ମଦ ହାଫିଜ, ଲେଗ୍ ସ୍ପିନର ଶାଦବ ଖାଁ, ଉଇକେଟ କିପର ମହମ୍ମଦ ରିଜଓ୍ବାନ ଏବଂ ଫାଷ୍ଟ ବୋଲର ଓ୍ବାହାବ ରିଆଜ ଓ ମହମ୍ମଦ ହସନିନ।