ମାଞ୍ଚେଷ୍ଟର, ୪।୮- ଇଂଲଣ୍ଡ ଓ ପାକିସ୍ତାନ ମଧ୍ୟରେ ୩ ମ୍ୟାଚ ବିଶିଷ୍ଟ ଟେଷ୍ଟ କ୍ରିକେଟ ସିରିଜ ବୁଧବାରଠାରୁ ଆରମ୍ଭ ହେବାକୁ ଯାଉଛି। ସ୍ଥାନୀୟ ଓଲ୍ଡ ଟ୍ରାଫୋର୍ଡ ଗ୍ରାଉଣ୍ଡରେ ଜୈବ-ସୁରକ୍ଷିତ ପରିବେଶରେ ବିନା ଦର୍ଶକରେ ସିରିଜର ପ୍ରଥମ ଟେଷ୍ଟ ଅନୁଷ୍ଠିତ ହେବ। ଏହା ପୂର୍ବରୁ ଓ୍ବେଷ୍ଟଇଣ୍ଡିଜ ବିପକ୍ଷରେ ଇଂଲଣ୍ଡ ୩ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳି ୨-୧ରେ ବିଜୟୀ ହୋଇଛି। ଘରୋଇ ଦଳ ସେହି ପ୍ରଦର୍ଶନ ଦୋହରାଇବା ଲକ୍ଷ୍ୟରେ ଥିବାବେଳେ ପାକିସ୍ତାନ ନିଜ ଦକ୍ଷତା ଦେଖାଇବାକୁ ପ୍ରସ୍ତୁତ। ନିକଟ ଅତୀତରେ ଇଂଲଣ୍ଡ ମାଟିରେ ପାକିସ୍ତାନର ରେକର୍ଡ ବହୁତ ଭଲ ରହିଛି। ୨୦୧୦ ପରଠାରୁ ଇଂଲଣ୍ଡ ମାଟିରେ ପାକିସ୍ତାନ କେବେହେଲେ ଟେଷ୍ଟ ସିରିଜ ହାରିନାହିଁ। ଶେଷଥର ପାଇଁ ଦଳ ୨୦୧୦ରେ ୪ ମ୍ୟାଚ ବିଶିଷ୍ଟ ସିରିଜରେ ୧-୩ରେ ଇଂଲଣ୍ଡଠାରୁ ହାରିଥିଲା। ୨୦୧୧-୧୨ରେ ଏବଂ ୨୦୧୫-୧୬ରେ ଉଭୟ ଦେଶ ମଧ୍ୟରେ ୟୁନାଇଟେଡ ଆରବ ଏମିରେଟ୍ସ(ୟୁଏଇ)ରେ ୩ ମ୍ୟାଚ ବିଶିଷ୍ଟ ସିରିଜ ଅନୁଷ୍ଠିତ ହୋଇଥିଲା। ଏଥିରେ ପାକିସ୍ତାନ ଯଥାକ୍ରମେ ୩-୦ ଓ ୨-୦ରେ ସିରିଜ ଜିତିଥିଲା। ୨୦୧୬ ଓ ୨୦୧୮ରେ ଇଂଲଣ୍ଡ ଗସ୍ତରେ ୨ ଥର ଆସିଥିବା ପାକିସ୍ତାନ ସିରିଜକୁ ଯଥାକ୍ରମେ ୨-୨ ଏବଂ ୧-୧ରେ ଡ୍ର ରଖିବାକୁ ସକ୍ଷମ ହୋଇଥିଲା। ଏଥର ମଧ୍ୟ ପାକିସ୍ତାନ ଜୋ ରୁଟ୍ଙ୍କ ଦଳକୁ ଅସୁବିଧାରେ ପକାଇବାର ଦକ୍ଷତା ରଖିଛି।
ଗତମାସରେ ଏଠାରେ ଅନୁଷ୍ଠିତ ଓ୍ବେଷ୍ଟଇଣ୍ଡିଜ ବିପକ୍ଷ ୨ଟି ଟେଷ୍ଟ ବର୍ଷାଯୋଗୁ ବାଧାପ୍ରାପ୍ତ ହୋଇଥିଲା। ଏଥର ପ୍ରଥମ ଦିବସରେ ବର୍ଷା ହେବାର ସମ୍ଭାବନା ଥିଲେ ହେଁ ପରେ ପାଗ ଶୁଖିଲା ରହିବା ପୂର୍ବାନୁମାନ କରାଯାଇଛି। ଓଲ୍ଡ ଟ୍ରାଫୋର୍ଡ ପିଚ୍ରୁ ଟର୍ନ ଏବଂ ବାଉନ୍ସ ମିଳୁଥିବାରୁ ଏବଂ ପାଗ ଶୁଖିଲା ରହିବା ଆଶା ଥିବାରୁ ପାକିସ୍ତାନ ୨ ସ୍ପିନରଙ୍କୁ ନେଇ ପଡ଼ିଆକୁ ଓହ୍ଲାଇବାକଥା ଚିନ୍ତା କରୁଥିବା ଏହାର କୋଚ୍ ମିସ୍ବା-ଉଲ୍-ହକ୍ ପ୍ରକାଶ କରିଛନ୍ତି। ମିସ୍ବାଙ୍କ କଥା ଅନୁସାରେ ଯଦି ପାକିସ୍ତାନ ୨ ସ୍ପିନରଙ୍କୁ ନେଇ ଖେଳେ ତେବେ ଚୂଡ଼ାନ୍ତ ଏକାଦଶରେ ହାରିସ ସୋହେଲଙ୍କୁ ସ୍ଥାନ ମିଳିବ ନାହିଁ। ଲେଗ୍ ସ୍ପିନର ଶାଦବ ଖାଁ ଦଳକୁ ଆସିବେ ଏବଂ ୭ ନମ୍ବର ସ୍ଥାନରେ ବ୍ୟାଟିଂ କରିବେ। ଏ କ୍ଷେତ୍ରରେ ଉଇକେଟ କିପର ମହମ୍ମଦ ରିଜଓ୍ବାନ ୬ ନମ୍ବର ସ୍ଥାନକୁ ଉନ୍ନୀତ ହେବେ। ଓ୍ବାର୍ମଅପ୍ ମ୍ୟାଚରେ ସୋହେଲ ଖାଁ ୨ ଥର ୫ ଉଇକେଟ ନେଇଥିଲେ ହେଁ ପଡ଼ିଆ ବାହାରେ ବସିବା ସମ୍ଭାବନା ରହିଛି।
ଓ୍ବେଷ୍ଟଇଣ୍ଡିଜ ବିପକ୍ଷ ୩ୟ ଟେଷ୍ଟରେ ବେନ୍ ଷ୍ଟୋକ୍ସ କେବଳ ବ୍ୟାଟିଂ କରିଥିଲେ। ଫଳରେ ଇଂଲଣ୍ଡ ୪ ପେସ୍ ଓ ଜଣେ ସ୍ପିନରଙ୍କୁ ନେଇ ଖେଳିଥିଲା। ମାତ୍ର ଏବେ ଷ୍ଟୋକ୍ସ ଫିଟ୍ ଥିବାରୁ ଘରୋଇ ଦଳ ୪ ବୋଲର ଏବଂ ଅଲରାଉଣ୍ଡରଭାବେ ଷ୍ଟୋକ୍ସଙ୍କୁ ବ୍ୟବହାର କରିବ। ଏ କ୍ଷେତ୍ରରେ ଜ୍ୟାକ କ୍ରଲି ୩ ନମ୍ବର ସ୍ଥାନରେ ବ୍ୟାଟିଂ କରିବେ। ପାଗକୁ ଦୃଷ୍ଟିରେ ରଖି ସ୍ପିନର ଡବ୍ ବେସ୍ ଖେଳିବା ସମ୍ଭାବନା ଥିବାରୁ ଇଂଲଣ୍ଡ ପାଇଁ ୩ ପେସର ଜେମ୍ସ ଆଣ୍ଡରସନ, ଷ୍ଟୁଆର୍ଟ ବ୍ରଡ୍ ଓ ଜୋଫ୍ରା ଆର୍ଚର ଫେଭରାଇଟ ରହିବେ। ତେବେ କ୍ରିସ୍ ଓ୍ବକ୍ସଙ୍କୁ ବାଦ୍ ଦେବା ନିଷ୍ପତ୍ତି ସହଜ ହେବନାହିଁ।
ସମ୍ଭାବ୍ୟ ଇଂଲଣ୍ଡ ଏକାଦଶ: ଜୋ ରୁଟ୍(ଅଧିନାୟକ), ରୋରି ବନର୍ସ, ଡୋମିନିକ୍ ସିବ୍ଲେ, ଜ୍ୟାକ କ୍ରଲି, ବେନ୍ ଷ୍ଟୋକ୍ସ, ଓଲି ପୋପ୍, ଜୋସ୍ ବଟଲର, ଡୋମିନିକ୍ ବେସ୍, ଜୋଫ୍ରା ଆର୍ଚର, ଷ୍ଟୁଆର୍ଟ ବ୍ରଡ୍, ଜେମ୍ସ ଆଣ୍ଡରସନ।
ସମ୍ଭାବ୍ୟ ପାକିସ୍ତାନ ଦଳ: ଆଝାର ଅଲୀ(ଅଧିନାୟକ), ଶାନ ମାସୁଦ, ଅବିଦ ଅଲୀ, ବାବର ଆଜମ, ଅସଦ ଶାଫିକ୍, ମହମ୍ମଦ ରିଜଓ୍ବାନ, ଶାଦବ ଖାଁ ୟାସିର ଶାହ, ମହମ୍ମଦ ଆବାସ, ଶାହିନ ଶାହ ଆଫ୍ରିଦୀ, ନସିମ ଶାହ।
ମ୍ୟାଚ ଆରମ୍ଭ: ଅପରାହ୍ନ ୩ଟା ୩୦
ପ୍ରସାରଣ: ସୋନି ସିକ୍ସ