ଇସଲାମାବାଦ,୭ ।୨: ପାକିସ୍ତାନରେ ଅନଲାଇନ ନଲେଜ ପ୍ଲାଟଫର୍ମ ୱିକିପିଡିଆ ଉପରେ ଲଗାଯାଇଥିବା ପ୍ରତିବନ୍ଧକକୁ ହଟାଇ ଦିଆଯାଇଛି । ପ୍ରଧାନମନ୍ତ୍ରୀ ଶହବାଜ ଶରିଫଙ୍କ ନିର୍ଦ୍ଦେଶକ୍ରମରେ ତୁରନ୍ତ ୱିକିପିଡିଆ ସଂଚାଳନ ପୁନର୍ବାର ଆରମ୍ଭ କରାଯାଇଛି । କିଛିଦିନ ପୂର୍ବରୁ ସାରା ବିଶ୍ୱରେ ଚର୍ଚ୍ଚିତ ୱିକିପିଡିଆ ଉପରେ ପାକିସ୍ତାନ ସରକାର ପ୍ରତିବନ୍ଧକ ଲଗାଇଥିଲେ ।
ୱିକିପିଡିଆ ଉପରେ ଲାଗିଥିବା ପ୍ରତିବନ୍ଧକକୁ ହଟାଇବାକୁ ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ୩ ସଦସ୍ୟ ବିଶିଷ୍ଟ ମିନିଷ୍ଟରିୟାଲ କମିଟି ନିଷ୍ପତ୍ତି ନେଇଛନ୍ତି । ଏଥିରେ ପ୍ରଧାନମନ୍ତ୍ରୀ ଶହବାଜ ଶରିଫଙ୍କ ବ୍ୟତୀତ ଆଇନ ମନ୍ତ୍ରୀ ଆଜମ ନଜିର ତରାର, ଇକନୋମିକ ଆଫେୟାର ଆଣ୍ଡ ପଲିଟିକାଲ ଆଫେୟାର ମନ୍ତ୍ରୀ ଅୟାଜ ସାଦିକ ଓ ସୂଚନା ଓ ପ୍ରସାରଣ ମନ୍ତ୍ରୀ ମରିୟମ ଔରଙ୍ଗଜେବ ସାମିଲ ଅଛନ୍ତି । ମନ୍ତ୍ରୀଙ୍କ ଏହି ପରିଷଦ ୱିକିପିଡିଆ ଉପରୁ ତୁରନ୍ତ ପ୍ରତିବନ୍ଧ ହଟାଇବାକୁ ଉପଦେଶ ଦେଇଥିଲେ । ଜିଓ ନ୍ୟୁଜର ରିପୋର୍ଟ ଅନୁଯାୟୀ, ପାକିସ୍ତାନ ଟେଲିକମ୍ୟୁନିକେଶନ ଅଥରିଟି(ପିଟିଏ) ୧ ଫେବୃୟାରୀରେ ୱିକିପିଡିଆରେ କିଛି ବିବାଦୀୟ କଣ୍ଟେଣ୍ଟସକୁ ହଟାଇବାକୁ କହିଥିଲେ । ହେଲେ, ସେତେବେଳେ ୱିକିପିଡିଆ ବିବାଦୀୟ କଣ୍ଟେଣ୍ଟକୁ ହଟାଇପାରି ନ ଥିଲା । ଏହାର ୨ ଦିନ ପରେ ପାକିସ୍ତାନ ସରକାର ୱିକିପିଡିଆକୁ ବ୍ୟାନ କରିଦେଇଥିଲେ ।