ଜୋହାନ୍ସବର୍ଗ,୧୧।୪: ଦକ୍ଷିଣ ଆଫ୍ରିକା ଗସ୍ତରେ ଥିବା ପାକିସ୍ତାନୀ କ୍ରିକେଟ ଦଳ ଇତିହାସ ସୃଷ୍ଟି କରିଛି। ବାବର ଆଜାମଙ୍କ ନେତୃତ୍ୱରେ ପାକିସ୍ତାନୀ ଦଳ ବିଶ୍ୱର ପ୍ରଥମ ଦଳ ଭାବେ ୧୦୦ଟି ଅନ୍ତର୍ଜାତୀୟ ଟି -୨୦ ମ୍ୟାଚ ଜିତିଛି। ଚାରି ମ୍ୟାଚ ବିଶିଷ୍ଟ ଟି -୨୦ ସିରିଜର ପ୍ରଥମ ମ୍ୟାଚ ଜିତିବା ମାତ୍ରେ ପଡୋଶୀ ଦେଶ ଏହି ସଫଳତା ହାସଲ କରିଛି। ଏପର୍ଯ୍ୟନ୍ତ ଖେଳାଯାଇଥିବା ୧୬୫ ଟି-୨୦ ମଧ୍ୟରୁ ପାକିସ୍ତାନ ୧୦୦ଟି ଜିତିଥିବାବେଳେ ମାତ୍ର ୫୯ଟି ମ୍ୟାଚ ହାରିଛି। ଦୁଇଟି ମ୍ୟାଚ୍ ବାତିଲ ହୋଇଥିବାବେଳେ ଦଳ ଟାଇରେ ୩ଟି ମ୍ୟାଚ ହାରିଛି।
ଏହି ପ୍ରସଙ୍ଗରେ ପାକିସ୍ତାନର ଚିରପ୍ରତିଦ୍ୱନ୍ଦ୍ୱୀ ଭାରତ ବହୁ ପଛରେ ଥିବା ଜଣାପଡିଛି। ଟିମ ଇଣ୍ଡିଆ ୧୪୨ଟି ମ୍ୟାଚ ମଧ୍ୟରୁ ୮୮ଟି ଜିତିଛି। ତାକୁ ୪୭ଟି ମ୍ୟାଚରେ ପରାଜୟର ସମ୍ମୁଖୀନ ହେବାକୁ ପଡିଛି। ତିନୋଟି ମ୍ୟାଚ ଟାଇ ହୋଇଛି। ଅଷ୍ଟ୍ରେଲିଆ (୧୩୬ ମ୍ୟାଚ), ଦକ୍ଷିଣ ଆଫ୍ରିକା (୧୨୮ ମ୍ୟାଚ) ଏବଂ ନ୍ୟୁଜିଲ୍ୟାଣ୍ଡ (୧୪୫ ମ୍ୟାଚ) ୭୧ଟି ବିଜୟ ସହ ସମାନ ର଼୍ୟାଙ୍କରେ ଅଛନ୍ତି।
