ଓ୍ବାଶିଂଟନ୍,୯।୩: ଭାରତ ଉପରେ ବଡ଼ ଆତଙ୍କବାଦୀ ଆକ୍ରମଣ କରିପାରେ ବୋଲି ଆମେରିକା ଗୋଇନ୍ଦା ରିପୋର୍ଟରେ ଦାବି କରାଯାଇଛି। ଆମେରିକା ଇଣ୍ଟେଲିଜେନ୍ସ କମ୍ୟୁନିଟିର ବାର୍ଷିକ ରିପୋର୍ଟ ଉପସ୍ଥାପନ କରିଛି। ଏଥିରେ ଭାରତ ଏବଂ ପାକିସ୍ତାନ ମଧ୍ୟରେ ବଢୁଥିବା ତିକ୍ତତାକୁ ନେଇ ଚିନ୍ତା ପ୍ରକଟ କରାଯାଇଛି। ଏହି ରିପୋର୍ଟରେ ପାକିସ୍ତାନ ଭାରତ ଭିତରେ ଏକ ବଡ ଆତଙ୍କବାଦୀ ଆକ୍ରମଣ ଯୋଜନା କରୁଛି ବୋଲି ଚେତାବନୀ ଦିଆଯାଇଛି।
ରିପୋର୍ଟରେ କୁହାଯାଇଛି ଯେ, ଭାରତ ଏବଂ ପାକିସ୍ତାନ ମଧ୍ୟରେ ଲାଇନ ଅଫ କଣ୍ଟ୍ରୋଲ (ଏଲ୍ଓସି) ଉପରେ ବିବାଦ ବଢିପାରେ। ସାମରିକ ବଳ ସହିତ ପାକିସ୍ତାନରୁ ଆସିଥିବା କୌଣସି ଉତ୍ତେଜନାକୁ ମୋଦି ସରକାର ଜବାବ ଦେବାର ସମ୍ଭାବନା ଅଧିକ ରହିଛି।
ସେହିପରି ଭାରତ-ଚାଇନା ସମ୍ପର୍କକୁ ନେଇ ଏହି ରିପୋର୍ଟରେ କୁହାଯାଇଛି ଯେ, ଭାରତ-ଚାଇନା ସମ୍ପର୍କ ତିକ୍ତ ରହିବ। ବିବାଦୀୟ ସୀମାର ଉଭୟ ପାର୍ଶ୍ୱରେ ସାମରିକ ଉପସ୍ଥିତି ଦୁଇ ପରମାଣୁ ଶକ୍ତି ମଧ୍ୟରେ ବିପଦକୁ ବଢାଇଥାଏ। ଭାରତ ଏବଂ ଚାଇନା ମଧ୍ୟରେ ଏକ ସଶସ୍ତ୍ର ବିବାଦ ଆମେରିକାର ସ୍ବାର୍ଥ ଏବଂ ନାଗରିକଙ୍କ ପାଇଁ ସିଧାସଳଖ ବିପଦ ସୃଷ୍ଟି କରିପାରେ।
