କରାଚୀ,୪।୬: ଆଗକୁ ହେବାକୁ ଥିବା ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ଗସ୍ତ ପାଇଁ ପିସିବି ପକ୍ଷରୁ ଘୋଷଣା କରାଯାଇଛି ପାକିସ୍ତାନ ଟି୨୦ ଦଳ। ଏହି ଦଳରେ ସ୍ଥାନ ପାଇଛନ୍ତି ପୂର୍ବତନ ଅଧିନାୟକ ମୋଇନ ଖାଁଙ୍କ ପୁଅ ଆଜାମ। ମୋଇନଙ୍କ ୨୨ ବର୍ଷୀୟ ପୁଅଙ୍କୁ ଜାତୀୟ ଦଳରେ ସ୍ଥାନ ଦେଇ ପିସିବି ଚୟନକର୍ତ୍ତା ସଭିଙ୍କୁ ଚକିତ କରି ଦେଇଛନ୍ତି। ଆଜାମ ଘରୋଇ କ୍ରିକେଟରେ ମାତ୍ର ଗୋଟିଏ ପ୍ରଥମଶ୍ରେଣୀ ମ୍ୟାଚ୍ ଓ ୩୬ଟି ଘରୋଇ ଟି୨୦ ମ୍ୟାଚ୍ ଖେଳିଛନ୍ତି।
ତେବେ ବଡ଼ ବଡ଼ ଛକା ମାରିବା ପାଇଁ ସେ ଜଣାଶୁଣା। ପାକିସ୍ତାନ ସୁପର ଲିଗ୍ (ପିଏସ୍ଏଲ୍) ଓ ଶ୍ରୀଲଙ୍କା ପ୍ରିମିୟର ଲିଗ୍ରେ ଆଜାମ ତାଙ୍କ ସିକ୍ସ ହିଟିଂ ପାଓ୍ବାର ଦେଖାଇ ସାରିଛନ୍ତି। ତାଙ୍କ ଚୟନ ପଛରେ ଏହା ହିଁ କାରଣ ହୋଇଥାଇପାରେ।
୧୯୯୦ରୁ ୨୦୦୪ ପର୍ଯ୍ୟନ୍ତ ଖେଳିଥିବା ମୋଇନ ପାକିସ୍ତାନ କ୍ରିକେଟ ଇତିହାସର ଅନ୍ୟତମ ଶ୍ରେଷ୍ଠ ଉଇକେଟକିପର। ନିଜ ସମୟରେ ବଡ଼ ବଡ଼ ଛକା ମାରିବା ପାଇଁ ସେ ବେଶ୍ ଜଣାଶୁଣା ଥିଲେ। କ୍ୟାରିୟରରେ ୬୯ ଟେଷ୍ଟ ଓ ୨୧୯ ଦିନିକିଆ ମ୍ୟାଚ୍ ଖେଳିଥିବା ଉଇକେଟକିପର ବ୍ୟାଟ୍ସମ୍ୟାନଙ୍କ ନାମରେ ମୋଟ ୬,୦୦୭ ରନ୍ ରହିଛି।