ଦୁବାଇ,୧୨।୧୧: ଚଳିତ ଟି୨୦ ବିଶ୍ୱକପ୍ ସେମିଫାଇନାଲରୁ ବିଦାୟ ପରେ ବାବର ଆଜାମଙ୍କ ନେତୃତ୍ୱାଧୀନ ପାକିସ୍ତାନ ଦଳକୁ ସାନ୍ତ୍ୱନା ଦେଇଛନ୍ତି ୧୯୯୨ ବିଶ୍ୱକପ୍ ଚାମ୍ପିୟନ ଦଳର ଅଧିନାୟକ ତଥା ପ୍ରଧାନମନ୍ତ୍ରୀ ଇମ୍ରାନ ଖାନ। ସୁପର-୧୨ ପର୍ଯ୍ୟାୟରେ ଅପରାଜେୟ ରହିଥିବା ପାକିସ୍ତାନ ଦଳର ଖେଳାଳିମାନେ ଅଷ୍ଟ୍ରେଲିଆ ବିପକ୍ଷ ସେମିଫାଇନାଲରେ ଅନେକ ତ୍ରୁଟି କରିଥିଲେ।
”ବାବର ଆଜାମଙ୍କ ଦଳର ପ୍ରତ୍ୟେକ ଖେଳାଳି ଏବେ କେଉଁ ଭଳି ଅନୁଭବ କରୁଛନ୍ତି, ତାହା ମୁଁ ବୁଝିପାରୁଛି। କାରଣ କ୍ରିକେଟ ଫିଲ୍ଡରେ ମୁଁ ମଧ୍ୟ ସମାନ ପ୍ରକାର ନିରାଶର ସମ୍ମୁଖୀନ ହୋଇଛି। କିନ୍ତୁ ପୂରା ଟୁର୍ନାମେଣ୍ଟରେ ତୁମେମାନେ ଯେଉଁଭଳି ଖେଳିଲ ଓ ବିଜୟ ପରେ ପ୍ରଦର୍ଶିତ କରିଥିବା ମାନବିକତା ପାଇଁ ଗର୍ବିତ ହେବା ଉଚିତ୍। ଟିମ୍ ଅଷ୍ଟ୍ରେଲିଆକୁ ଶୁଭେଚ୍ଛା“ ବୋଲି ଇମ୍ରାନ ଟୁଇଟ୍ କରିଛନ୍ତି। ତାଙ୍କ ଭଳି ପୂର୍ବତନ ଅଧିନାୟକ ତଥା ବର୍ତ୍ତମାନ ପାକିସ୍ତାନ କ୍ରିକେଟ ବୋର୍ଡ (ପିସିବି) ମୁଖ୍ୟ ରମିଜ ରାଜା ମଧ୍ୟ ଦଳକୁ ପ୍ରଶଂସା କରିଛନ୍ତି।
ମ୍ୟାଚ୍ରେ ୪ ଓଭରରେ ୪୪ ରନ୍ ଖର୍ଚ୍ଚ କରିବା ସତ୍ତ୍ୱେ ଉଇକେଟ ପାଇ ନ ଥିବା ହାସନ ଅଲି ଛାଡ଼ିଥିଲେ ମାଥ୍ୟୁ ଓ୍ବେଡଙ୍କ କ୍ୟାଚ୍। ଏଥିଯୋଗୁ ତାଙ୍କୁ ସୋସିଆଲ ମିଡିଆରେ ପ୍ରବଳ ସମାଲୋଚନା କରାଯାଉଛି। ତାଙ୍କ ସପକ୍ଷରେ ବାହାରିଛନ୍ତି କିମ୍ବଦନ୍ତୀ ପେସର ଓ୍ବାସିମ ଆକ୍ରମ। ଏଭଳି ପରିସ୍ଥିତିରେ ହାସନଙ୍କୁ ସମାଲୋଚନା କରିବା ବଦଳରେ ସମର୍ଥନ କରିବା ଉଚିତ ବୋଲି ସେ କହିଛନ୍ତି।