ଇସଲାମାବାଦ,୨୦।୩: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫଙ୍କ ପୁଅ ଦେବାଳିଆ ହୋଇଯାଇଛନ୍ତି। ଲଣ୍ଡନ ପ୍ରଶାସନ ନୱାଜ ସରିଫଙ୍କ ପୁଅ ହାସନ ନୱାଜଙ୍କୁ 2025 ବର୍ଷର ଋଣ ଖିଲାପୀ ଘୋଷଣା କରିଛି। ଏବେ ତାଙ୍କ ବିରୋଧରେ ଆସନ୍ତା ମାସରୁ ଦେବାଳିଆ ମାମଲା ଆରମ୍ଭ ହୋଇପାରିବ। ସୂଚନାଯୋଗ୍ୟ, ହାସନ ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫଙ୍କ ପୁତୁରା। ଏହି ସମୟରେ, ହାସନଙ୍କ ଭଉଣୀ ପାକିସ୍ତାନର ପଞ୍ଜାବ ପ୍ରଦେଶର ମୁଖ୍ୟମନ୍ତ୍ରୀ।
ଲଣ୍ଡନ ପ୍ରଶାସନ ଗେଜେଟ ଅନୁଯାୟୀ, ହାସନ ନୱାଜଙ୍କ ଉପରେ ପ୍ରାୟ ୧ କୋଟି ପାଉଣ୍ଡ ଆୟକର ଦେବାକୁ ଅଛି। ୧୦ ନିୟୁତ ପାଉଣ୍ଡ ପ୍ରାୟ ୧,୧୨,୧୩,୬୪,୦୦୦ ଭାରତୀୟ ଟଙ୍କା। ହାସନଙ୍କ ବିରୋଧରେ ଜାଣିଶୁଣି ଟିକସ ରାଶି ପୈଠ ନକରିବାର ଅଭିଯୋଗ ରହିଛି। ଆସନ୍ତା ମାସରୁ ହାସନଙ୍କ ସମ୍ପତ୍ତି ନିଲାମ ପ୍ରକ୍ରିୟା ଆରମ୍ଭ ହେବ। ଗଣମାଧ୍ୟମ ରିପୋର୍ଟ ଅନୁସାରେ, ହାସନଙ୍କ ଟିକସ ରାଶି ୨୦୧୫-୧୬ ମସିହାରୁ ବିଚାରାଧୀନ ଅଛି। ଏବେ ତାଙ୍କ ଉପରେ ଜରିମାନା ସହିତ ମୋଟ ପରିମାଣ ୧୦ ନିୟୁତ ପାଉଣ୍ଡରେ ପହଞ୍ଚିଛି।
ସୂଚନା ଅନୁସାରେ, ପାନାମା ପେପର ଲିକ ମାମଲାରେ ହାସନ ନୱାଜଙ୍କ ନାମ ମଧ୍ୟ ଆସିଛି। ହାସନ ଏବଂ ତାଙ୍କ ପରିବାର କଳାଧନ ମାଧ୍ୟମରେ ବେଆଇନ ସମ୍ପତ୍ତି ଅର୍ଜନ କରିଥିବା ଅଭିଯୋଗ ହୋଇଛି। ଏହା ପରେ, ହାସନ ଲଣ୍ଡନରେ ତାଙ୍କର ଏକ ସମ୍ପତ୍ତି ଅଲି ରିଆଜ ନାମକ ଜଣେ ପାକିସ୍ତାନୀ ବ୍ୟକ୍ତିଙ୍କୁ ୩୮ନିୟୁତ ପାଉଣ୍ଡରେ ବିକ୍ରି କରିଦେଇଥିଲେ। ଅଲି ରିଆଜ ନିଜେ ଜଣେ ସନ୍ଦିଗ୍ଧ ବ୍ୟକ୍ତି। କୁହାଯାଏ ଯେ ଅଲି ରିଆଜ ନୱାଜ ସରିଫ ଏବଂ ତାଙ୍କ ପରିବାରକୁ ସେମାନଙ୍କର କଳାଧନକୁ ଧଳା ଟଙ୍କାରେ ପରିଣତ କରିବାରେ ସାହାଯ୍ୟ କରନ୍ତି।
