ମାଞ୍ଚେଷ୍ଟର, ୨।୯: ପାକିସ୍ତାନ କ୍ରିକେଟ୍ ଦଳର ପୂର୍ବତନ ଅଧିନାୟକ ସର୍ଫରାଜ ଅହମ୍ମଦ ପୁଣିଥରେ ଖବରର ଶିରୋନାମାରେ ରହିଛନ୍ତି। ନିଜର ବ୍ୟାଟିଂ କିମ୍ବା ଉଇକେଟ୍ କିପିଂ ପାଇଁ ନୁହେଁ ବରଂ ପୁଣିଥରେ ହାଇ ମାରି ଚର୍ଚ୍ଚାକୁ ଆସିଛନ୍ତି ସର୍ଫରାଜ। ଇଂଲଣ୍ଡ ଗସ୍ତରେ ଯାଇଥିବା ପାକିସ୍ତାନ ଦଳ ସେଠାରେ ପ୍ରଥମେ ୩ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଓ ପରେ ଟି୨୦ ସିରିଜ ଖେଳିଛି। ଏହି ପୁରା ଗସ୍ତରେ ସର୍ଫରାଜ ପାକିସ୍ତାନ ଦଳ ସହିତ ଥିଲେ ମଧ୍ୟ ଗୋଟିଏ ହେଲେ ମ୍ୟାଚ୍ ଖେଳିବାର ସୁଯୋଗ ପାଇ ନ ଥିଲେ। ଏହି ଅବସରରେ ମାଞ୍ଚେଷ୍ଟରରେ ଖେଳାଯାଇଥିବା ୨ୟ ଟି୨୦ ମ୍ୟାଚ୍ ପରେ ସୋସିଆଲ ମିଡିଆରେ ସର୍ଫରାଜଙ୍କ ଏକ ଫଟୋ ଭାଇରାଲ ହୋଇଛି। ଯେଉଁଥିରେ ରିଜର୍ଭ ଖେଳାଳି ଭାବେ ପଡ଼ିଆ ବାହାରେ ବସିଥିବା ସର୍ଫରାଜ ହାଇ ମାରୁଥିବା ଦେଖିବାକୁ ମିଳିଛି। ଏହି ଫଟୋକୁ ନେଇ ଏବେ ସର୍ଫରାଜଙ୍କୁ ସୋସିଆଲ ମିଡିଆରେ ଟ୍ରୋଲର ସମ୍ମୁଖୀନ ହେବାକୁ ପଡ଼ିଛି। ଏଠାରେ ଉଲ୍ଲେଖଯୋଗ୍ୟ ଯେ, ସର୍ଫରାଜ ହାଇ ମାରୁଥିବା ଫଟୋ ସୋସିଆଲ ମିଡିଆରେ ଭାଇରାଲ୍ ହେବା ଏହା ପ୍ରଥମ ଘଟଣା ନୁହେଁ। ପୂର୍ବରୁ ମଧ୍ୟ ଗତବର୍ଷ ଇଂଲଣ୍ଡରେ ଅନୁଷ୍ଠିତ ବିଶ୍ୱକପ୍ରେ ଭାରତ ବିପକ୍ଷ ଗୁରୁତ୍ୱପୂର୍ଣ୍ଣ ମ୍ୟାଚ୍ରେ ଉଇକେଟ୍ କିପିଂ କରୁଥିବାବେଳେ ସର୍ଫରାଜ ହାଇ ମାରି ଚର୍ଚ୍ଚାକୁ ଆସିଥିଲେ। ଏହି ଘଟଣାକୁ ନେଇ ସେତେବେଳେ ତାଙ୍କୁ ବେଶ୍ ସମାଲୋଚନାର ଶିକାର ହେବାକୁ ପଡ଼ିଥିଲା। ସେହିଭଳି ଚଳିତ ଇଂଲଣ୍ଡ ଗସ୍ତର ପ୍ରଥମ ଟେଷ୍ଟ ମ୍ୟାଚ୍ରେ ମଧ୍ୟ ସେ ବାହାରେ ବସିଥିବାବେଳେ ହାଇ ମାରୁଥିବା ଦେଖିବାକୁ ମିଳିଥିଲା। ସୋସିଆଲ ମିଡିଆରେ ଜଣେ ପ୍ରଶଂସକ ଟ୍ରୋଲ୍ କରି କହିଛନ୍ତି ଯେ, ୩ ଫର୍ମାଟ୍ରେ ହାଇ ମାରିବାରେ ସେ ପ୍ରଥମ କ୍ରିକେଟର୍ ହୋଇଛନ୍ତି।