କରାଚୀ,୧।୪: ପାକିସ୍ତାନ ଦଳ ଦିନିକିଆ ଇତିହାସରେ ସର୍ବାଧିକ ଟାର୍ଗେଟ ୩୪୯ ରନ୍ର ପିଛା କରି ବିଜୟ ହାସଲ କରିଛି। ଅଧିନାୟକ ବାବାର ଆଜାମ (୧୧୪) ଏବଂ ଓପନର ଇମାମ ଉଲ ହକ୍ (୧୦୬)ଙ୍କ ଶତକ ଯୋଗୁ ଦ୍ୱିତୀୟ ଦିନିକିଆରେ ଅଷ୍ଟ୍ରେଲିଆକୁ ୬ ଉଇକେଟରେ ହରାଇ ଦେଇଛି ଘରୋଇ ପାକିସ୍ତାନ ଦଳ। ଫଳରେ ୧-୧ର ବରାବର ସ୍ଥିତିରେ ପହଞ୍ଚିଛି ୩ ମ୍ୟାଚ୍ ବିଶିଷ୍ଟ ସିରିଜ୍।
ଇମାମ ଓ ଫାଖର ଜାମନ (୬୭)ଙ୍କ ଓପନିଂ ଯୋଡ଼ି ପାକିସ୍ତାନକୁ ୧୧୮ ରନ୍ର ଭଲ ଆରମ୍ଭ ଦେଇଥିଲେ। ତା’ ପରେ ଇମାମଙ୍କ ସହ ମିଶି ଆଉ ଏକ ଶତକୀୟ ଭାଗିଦାରୀ କରିଥିଲେ ଅଧିନାୟକ ବାବର। ଦୁହେଁ ଦ୍ୱିତୀୟ ଉଇକେଟ ପାଇଁ ୧୧୧ ରନ୍ ଯୋଡ଼ିଥିଲେ।
ଶେଷ ଆଡ଼କୁ କ୍ରମାଗତ ଓଭରରେ ବାବର ଏବଂ ମହମ୍ମଦ ରିଜଓ୍ବାନ (୨୩)ଙ୍କ ଉଇକେଟ ପଡ଼ିଯିବାରୁ ଅଷ୍ଟ୍ରେଲିଆକୁ ପ୍ରତ୍ୟାବର୍ତ୍ତନ ସୁଯୋଗ ମିଳିଥିଲା। କିନ୍ତୁ ଖୁଶଦିଲ ଶାହା (୨୭) ଏବଂ ଇଫତିକର ଅହମ୍ମଦ (୧୧)ଙ୍କ ଯୋଗୁ ଗୋଟିଏ ଓଭର ପୂର୍ବରୁ ୩୫୨ ରନ୍ କରି ପାକିସ୍ତାନ ମ୍ୟାଚ୍ ଜିତି ସିରିଜ୍କୁ ଫେରିଛି। ପୂର୍ବରୁ ବେନ ମ୍ୟାକଡରମୋଟ (୧୦୪) ଏବଂ ଟ୍ରାଭିସ ହେଡ୍ (୮୯)ଙ୍କ ଇନିଂସ ଯୋଗୁ ପ୍ରଥମେ ବ୍ୟାଟିଂ କରିଥିବା ଅଷ୍ଟ୍ରେଲିଆ ୫୦ ଓଭରରେ ୮ ଉଇକେଟ ହରାଇ ୩୪୮ ରନ୍ କରିଥିଲା।