କରାଚୀ,୪।୩ : ଚଳିତ ପାକିସ୍ତାନ ସୁପର ଲିଗ୍ (ପିଏସ୍ଏଲ)କୁ ଗୁରୁବାର ବାତିଲ କରିଦିଆଯାଇଛି। ୩ ଖେଳାଳିଙ୍କ ରିପୋର୍ଟ ପଜିଟିଭ ଆସିବା ପରେ ଏହି ଟି୨୦ ଇଭେଣ୍ଟରେ କରୋନା ଆକ୍ରାନ୍ତଙ୍କ ସଂଖ୍ୟା ୭କୁ ବୃଦ୍ଧି ପାଇଛି। ଏହାକୁ ଦୃଷ୍ଟିରେ ରଖି ଚଳିତ ଲିଗ୍କୁ ସ୍ଥଗିତ ରଖିବାକୁ ନିଷ୍ପତ୍ତି ନେଇଛି ପାକିସ୍ତାନ କ୍ରିକେଟ ବୋର୍ଡ (ପିସିବି)। ପଜିଟିଭ ଆସିଥିବା ରିପୋର୍ଟ ମଧ୍ୟରେ ଜଣେ ଖେଳାଳି ଓ ୬ ସପୋର୍ଟ ଷ୍ଟାଫ ରହିଛନ୍ତି।
ଅଂଶଗ୍ରହଣକାରୀ ଖେଳାଳିଙ୍କ ସ୍ବାସ୍ଥ୍ୟାବସ୍ଥା ଓ ସୁରକ୍ଷାକୁ ଦୃଷ୍ଟିରେ ରଖି ଫ୍ରାଞ୍ଚାଇଜ ମାଲିକଙ୍କ ସହ ଆଲୋଚନା ପରେ ଏହି ନିଷ୍ପତ୍ତି ନେଇଛି ପିସିବି। ୩୪ ମ୍ୟାଚ୍ ବିଶିଷ୍ଟ ଟି୨୦ ଇଭେଣ୍ଟରେ କେବଳ ୧୪ଟି ମ୍ୟାଚ୍ ଖେଳାଯାଇଛି। ପିସିବିର ଏହି ନିଷ୍ପତ୍ତି ପରେ ଅଷ୍ଟ୍ରେଲିଆର ଡାନିଏଲ କ୍ରିଷ୍ଟିଆନଙ୍କ ସମେତ କିଛି ବିଦେଶୀ ଖେଳାଳି ତୁରନ୍ତ ସ୍ବଦେଶ ଫେରିବାକୁ ଇଚ୍ଛା ପ୍ରକଟ କରିଛନ୍ତି। ଉଲ୍ଲେଖଥାଉ କି, ପିଏସ୍ଏଲର ଗତ ସଂସ୍କରଣ ମଧ୍ୟ ମହାମାରୀ ଯୋଗୁ ପ୍ରଭାବିତ ହୋଇଥିଲା। ଲିଗ୍ ମ୍ୟାଚ୍ ଖେଳାଯିବାର କିଛି ମାସ ପରେ ଖେଳାଯାଇଥିଲା ନକଆଉଟ୍ ପର୍ଯ୍ୟାୟ।
