ପେଶାଓ୍ବାର, ୭।୧୨- ସରକାରୀ ମେଡିକାଲରେ ଅକ୍ସିଜେନ ଅଭାବରୁ ଜଣେ କୋଭିଡ୍-୧୯ ଆକ୍ରାନ୍ତଙ୍କ ମୃତ୍ୟୁ ମାମଲାରେ ୭ ଜଣ ଷ୍ଟାଫଙ୍କୁ ନିଲମ୍ବିତ କରାଯାଇଛି। କୋଭିଡ୍ ଆଇସୋଲେସନ ଓ୍ବାର୍ଡରେ ୫ ଜଣ ଆକ୍ରାନ୍ତ ଥିବାବଳେ ଜଣେ ଆଇସିୟୁରେ ଭର୍ତ୍ତି ଥିଲେ। ଯଥେଷ୍ଟ ଅକ୍ସିଜେନ ନ ଥିବାରୁ ଆଇସିୟୁରେ ଥିବା ଆକ୍ରାନ୍ତଙ୍କ ମୃତ୍ୟୁ ହୋଇଥିବା ପ୍ରାଥମିକ ରିପୋର୍ଟରେ ସ୍ପଷ୍ଟ କରାଯାଇଛି।
ଅକ୍ସିଜେନର ଅଭାବ ପ୍ରତି କେହି ଧ୍ୟାନ ଦେଇ ନ ଥିଲେ। ଏହାକୁ ଯାଞ୍ଚ ମଧ୍ୟ କରାଯାଇ ନ ଥିବା ରିପୋର୍ଟରେ କୁହାଯାଇଛି। ଆଉ ବ୍ୟାକଅପ୍ ଅକ୍ସିଜେନ ଯୋଗାଇବାର କୌଣସି ବ୍ୟବସ୍ଥା କରାଯାଇ ନ ଥିଲା। ନିଲମ୍ବିତ କର୍ମଚାରୀଙ୍କ ମଧ୍ୟରେ ରହିଛନ୍ତି ମେଡିକାଲ ନିର୍ଦ୍ଦେଶକ। ଆଗାମୀ ୫ ଦିନ ମଧ୍ୟରେ ଏହି ଘଟଣାର ଦ୍ୱିତୀୟ ତଦନ୍ତ ରିପୋର୍ଟ ଆସିବ। ଘଟଣା ଦିନ କିଛି ଷ୍ଟାଫ ଛୁଟିରେ ଥିବାବେଳେ ଆଉ କିଛି ଅନୁପସ୍ଥିତ ଥିଲେ। ସେଠାରେ ଅନ୍ୟ କୌଣସି ବ୍ୟବସ୍ଥା ମଧ୍ୟ ନ ଥିଲା। ଜରୁରୀକାଳିନ ଓ୍ବାର୍ଡରେ ମଧ୍ୟ ଅତିରିକ୍ତ ଅକ୍ସିଜେନ ନ ଥିଲା ବୋଲି ଆଞ୍ଚଳିକ ସ୍ବାସ୍ଥ୍ୟମନ୍ତ୍ରୀ ତୈମୁର ସଲିମ ଝାଗ୍ରା କହିଛନ୍ତି।