![](https://www.dharitri.com/wp-content/uploads/2024/03/9-1.jpg)
ମୁମ୍ବାଇ,୩।୩: ଚାଇନାରୁ ପାକିସ୍ତାନକୁ ଯାଉଥିବା ଏକ ଜାହାଜକୁ ଭାରତୀୟ ସୁରକ୍ଷା ଏଜେନ୍ସି ମୁମ୍ବାଇର ନାଭା ଶେଭା ବନ୍ଦରରେ ଅଟକାଇଥିଲା। ଜାହାଜରେ ଦ୍ୱୈତ ବ୍ୟବହାର୍ଯ୍ୟ ସାମଗ୍ରୀ ଥିଲା, ଯାହା ପାକସ୍ତାନର ଅଣୁଅସ୍ତ୍ର ଏବଂ ବାଲିଷ୍ଟିକ୍ ମିଶାଇଲ୍ ପ୍ରୋଗ୍ରାମରେ ବ୍ୟବହାର କରାଯାଇପାରିବ ବୋଲି ସୀମାଶୁଳ୍କ ବିଭାଗର ଜଣେ ଅଧିକାରୀ ଶନିବାର କହିଛନ୍ତି। ମାଲ୍ଟାର ସିଏମ୍ଏ ସିଜିଏମ୍ ଆଟ୍ଟିଲା ଜାହାଜ ଆଣବିକ ସାମଗ୍ରୀ ନେଇ କରାଚୀ ବନ୍ଦର ଅଭିମୁଖେ ଯାଉଥିବାବେଳେ ଗତ ଜାନୁଆରୀ ୨୩ରେ ଗୋଇନ୍ଦା ସୂଚନା ପାଇବା ପରେ ସୀମାଶୁଳ୍କ ଅଧିକାରୀମାନେ ଉକ୍ତ ଜାହାଜକୁ ଅଟକାଇଥିଲେ। ଜାହାଜରେ ଇଟାଲୀ କମ୍ପାନୀ ନିର୍ମିତ ଏକ କମ୍ପ୍ୟୁଟର ନ୍ୟୁମେରିକାଲ କଣ୍ଟ୍ରୋଲ (ସିଏନ୍ସି) ମେଶିନ୍ ରହିଥିଲା। ବିଶେଷଜ୍ଞମାନଙ୍କ କହିବା ଅନୁଯାୟୀ ଉକ୍ତ ଉପକରଣ ପାକିସ୍ତାନର କ୍ଷେପଣାସ୍ତ୍ର ବିକାଶ କାର୍ଯ୍ୟକ୍ରମରେ ଗୁରୁତ୍ୱପୂର୍ଣ୍ଣ ଯନ୍ତ୍ରାଂଶ ନିର୍ମାଣରେ ବ୍ୟବହାର ହୋଇଥାନ୍ତା। ୧୯୯୬ରୁ ସିଏନ୍ସି ମେଶିନ୍କୁ ଅନ୍ତର୍ଜାତୀୟ ଯୁଦ୍ଧାସ୍ତ୍ର ନିୟନ୍ତ୍ରଣ ବ୍ୟବସ୍ଥା ଓ୍ବାସେନାର ଆରେଞ୍ଜମେଣ୍ଟରେ ରଖାଯାଇଛି। ଆଣବିକ ଅସ୍ତ୍ର ପ୍ରସାର ରୋକିବା ଲକ୍ଷ୍ୟରେ ଏହା କରାଯାଇଥିଲା। ଉତ୍ତର କୋରିଆ ଏହାର ଆଣବିକ କାର୍ଯ୍ୟକ୍ରମରେ ସିଏନ୍ସି ମେଶିନ୍ର ବ୍ୟବହାର କରିଥିଲା। ପ୍ରତିରକ୍ଷା ଗବେଷଣା ଓ ବିକାଶ ସଂଗଠନ (ଡିଆର୍ଡିଓ)ର ଏକ ଟିମ୍ ଜାହାଜରେ ଥିବା ଉକ୍ତ ସାମଗ୍ରୀଗୁଡ଼ିକୁ ଅନୁଧ୍ୟାନ କଲାପରେ ଏହା ପାକିସ୍ତାନର ଆଣବିକ କାର୍ଯ୍ୟକ୍ରମରେ ବ୍ୟବହାର ହୋଇପାରେ ବୋଲି କହିଥିଲା। ଗୋଇନ୍ଦା ଅଧିକାରୀମାନେ ସତର୍କ କରାଇବା ପରେ ବନ୍ଦର କର୍ତ୍ତୃପକ୍ଷ ଭାରତୀୟ ପ୍ରତିରକ୍ଷା କର୍ତ୍ତୃପକ୍ଷଙ୍କୁ ଏ ସମ୍ପର୍କରେ ଜଣାଇଥିଲେ। ଯାଞ୍ଚ ପରେ ସନ୍ଦିଗ୍ଧ ସାମଗ୍ରୀକୁ ଜବତ କରାଯାଇଛି। ପାକିସ୍ତାନ ଏବଂ ଚାଇନା ଦ୍ୱାରା ଅଣୁଅସ୍ତ୍ରର ସମ୍ଭାବ୍ୟ ପ୍ରସାର ରୋକିବା ପାଇଁ ଏଭଳି ପଦକ୍ଷେପ ନିଆଯାଇଥିବା କୁହାଯାଇଛି। ସାଙ୍ଘାଇ ଜେଏକ୍ସଇ ଗ୍ଲୋବାଲ ଲଜିଷ୍ଟିକ୍ସ କମ୍ପାନୀ ଲିଃ ପାକିସ୍ତାନ ଓ୍ବିଙ୍ଗ୍ସ ପ୍ରା.ଲିଃ ନିକଟକୁ ସାମଗ୍ରୀଗୁଡ଼ିକୁ ପଠାଉଥିଲା। ଅଧିକ ତଦନ୍ତ କରାଯିବା ପରେ ୨୨,୧୮୦ କେଜି ସାମଗ୍ରୀକୁ ତାଇୟୁନ ମାଇନିଂ ଇମ୍ପୋର୍ଟ ଆଣ୍ଡ ଏକ୍ସପର୍ଟ କମ୍ପାନୀ ସାମଗ୍ରୀଗୁଡ଼ିକୁ ପାକିସ୍ତାନର କସ୍ମସ୍ ଇଞ୍ଜିନିୟରିଂ ଉଦ୍ଦେଶ୍ୟରେ ପଠାଇଥିବା ଜଣାପଡ଼ିଥିଲା। ପାକିସ୍ତାନ ଚାଇନାକୁ ମାଧ୍ୟମ ଭାବେ ବ୍ୟବହାର କରି ଆମେରିକା ଏବଂ ୟୁରୋପରୁ ପ୍ରତିବନ୍ଧିତ ବସ୍ତୁ ସଂଗ୍ରହ କରିବାରେ ସଫଳ ହେବା ଚିନ୍ତାର ବିଷୟ ବୋଲି ଅଧିକାରୀମାନେ କହିଛନ୍ତି।