କରାଚୀ,୧୪।୧୦: ବିନା ଚାପ ଓ ବିନା ଡରରେ ଖେଳିଲେ ତାରକା ଖଚ୍ଚିତ ଟିମ୍ ଇଣ୍ଡିଆକୁ ଆମେ ହରାଇପାରିବା। ଏଭଳି ମତ ରଖିଛନ୍ତି ପୂର୍ବତନ ପାକିସ୍ତାନ ଅଧିନାୟକ ଜାଭେଦ ମିଆଁଦାଦ।
ଦୁଇ ଚିରପ୍ରତିଦ୍ୱନ୍ଦ୍ୱୀ ପଡୋଶୀ ଆସନ୍ତା ୨୪ ତାରିଖରେ ଆଗାମୀ ଟି୨୦ ବିଶ୍ୱକପ୍ରେ ପରସ୍ପରକୁ ଭେଟିବାକୁ ଯାଉଛନ୍ତି। ୫୦ ଓଭର ବିଶିଷ୍ଟ ବିଶ୍ୱକପ୍ ହେଉ କି, ଟି୨୦ ବିଶ୍ୱକପ୍ରେ ଭାରତ କଦାପି ପାକିସ୍ତାନଠାରୁ ପରାସ୍ତ ହୋଇନାହିଁ।
ଟୁର୍ନାମେଣ୍ଟ ଆରମ୍ଭରୁ ଭାରତ ବିପକ୍ଷ ମ୍ୟାଚ୍ ପାକିସ୍ତାନ ପାଇଁ ବେଶ୍ ଗୁରୁତ୍ୱପୂର୍ଣ୍ଣ। ଭାରତ ଏକ ଶକ୍ତିଶାଳୀ ଦଳ ଓ ସେମାନଙ୍କ ପାଖରେ ଅନେକ ଶ୍ରେଷ୍ଠ ଖେଳାଳି ଅଛନ୍ତି। କିନ୍ତୁ ଯଦି ଆମେ ବିନା ଭୟ ଓ ଚାପରେ ଖେଳିବା ଏବଂ ପ୍ରତ୍ୟେକ ଖେଳାଳି ନିଜ ନିଜ ଯୋଗଦାନ ଦିଅନ୍ତି, ତେବେ ଆମେ ସେମାନଙ୍କୁ ନିଶ୍ଚିତ ହରାଇପାରିବା। ଟି୨୦ ଏଭଳି ଏକ ଫର୍ମାଟ, ଯେଉଁଥିରେ ଜଣେ କିମ୍ବା ଦୁଇ ଜଣ ଖେଳାଳି ମ୍ୟାଚ୍ ଜିତାଇପାରିବେ। କିନ୍ତୁ ମୋ ମତରେ ଜିତିବା ପାଇଁ ପ୍ରତ୍ୟେକ ଖେଳାଳିଙ୍କୁ କୌଣସି ନା କୌଣସି ବାଟରେ ଯୋଗଦାନ କରିବାକୁ ପଡ଼ିବ ବୋଲି ମିଆଁଦାଦ କହିଛନ୍ତି।