ନୂଆଦିଲ୍ଲୀ,୨୭।୨: ଗୁରୁବାର ପାକିସ୍ତାନର ଚାମ୍ପିଅନ୍ସ ଟ୍ରଫି ଅଭିଯାନ ଏକ ଖରାପ ପରିସମାପ୍ତି କରିଛି, ଯେତେବେଳେ ରାୱଲପିଣ୍ଡିରେ ବାଂଲାଦେଶ ବିପକ୍ଷରେ ସେମାନଙ୍କର ଶେଷ ଗ୍ରୁପ ମ୍ୟାଚ ଗୋଟିଏ ବି ବଲ ନ ପକାଇ ନ ମ୍ୟାଚ ରଦ୍ଦ ହୋଇଯାଇଥିଲା। ଉଭୟ ଦଳକୁ ବିଜୟ ବିନା ଏହି ଟୁର୍ଣ୍ଣାମେଣ୍ଟରୁ ବିଦାୟ ନେବାକୁ ପଡିଲା। ସେହିପରି, ଗ୍ରୁପ ବିରେ ମଧ୍ୟ, ଇଂଲଣ୍ଡ ଟୁର୍ଣ୍ଣାମେଣ୍ଟରୁ ବାଦ ପଡ଼ିଥିବା ତୃତୀୟ ଦଳ ହୋଇଛି।
ରାୱଲପିଣ୍ଡିରେ ଲଗାତାର ବର୍ଷା ଯୋଗୁଁ ପଡିଆ ଭିଜି ଯାଇଥିଲା, ପିଚ୍କୁ ଘୋଡ଼ାଇ ରଖାଯାଇଥିଲା ଏବଂ ଫିଲ୍ଡ ଚାରିପାଖରେ ପାଣି ଜମା ହୋଇଯାଇଥିଲା। ପାଗରେ ଉନ୍ନତି ନହେବାରୁ, ଅମ୍ପାୟାର ନିର୍ଦ୍ଧାରିତ ସମୟର ପ୍ରାୟ ଦୁଇ ଘଣ୍ଟା ପରେ ଖେଳକୁ ବାତିଲ କରିଥିଲେ। ଖରାପ ପାଗ ଯୋଗୁଁ ଟସ ହୋଇପାରିଲା ନାହିଁ। ଫଳସ୍ବରୂପ, ଉଭୟ ଦଳକୁ ଗୋଟିଏ ଲେଖାଏଁ ପଏଣ୍ଟ ବାଣ୍ଟିବାକୁ ପଡିଲା।
ପାକିସ୍ତାନ ୨୩ ବର୍ଷ ମଧ୍ୟରେ ପ୍ରଥମ ଦଳ ଭାବରେ ୫୦ ଓଭର ବିଶିଷ୍ଟ ଟୁର୍ଣ୍ଣାମେଣ୍ଟରୁ ଗୋଟିଏ ବି ମ୍ୟାଚ ନ ଜିତି ବାଦ ପଡ଼ିଛି। ପ୍ରଥମ ଦୁଇଟି ଗ୍ରୁପ ମ୍ୟାଚରେ ନ୍ୟୁଜିଲାଣ୍ଡ ଏବଂ ଭାରତଠାରୁ ପରାସ୍ତ ହୋଇଥିବା ମହମ୍ମଦ ରିଜୱାନଙ୍କ ନେତୃତ୍ୱାଧୀନ ଦଳ -୧.୦୮୭ ନେଟ ରନ ରେଟ ସହିତ ଗ୍ରୁପ A ଟେବୁଲର ସବୁଠାରୁ ତଳେ ଥିଲା। ପାକିସ୍ତାନ, ବାଂଲାଦେଶ ଏବଂ ଇଂଲଣ୍ଡ କେତେ ଟଙ୍କା ପାଇବେ ତାହା ଦଳର ସ୍ଥିତି ଉପରେ ନିର୍ଭର କରି ନିଷ୍ପତ୍ତି ନିଆଯିବ।
ସୂଚନାଯୋଗ୍ୟ, ଚାମ୍ପିଅନ୍ସ ଟ୍ରଫିରେ ୮ଟି ଦଳ ଅଂଶଗ୍ରହଣ କରିଥିଲେ। ମୋଟ ପୁରସ୍କାର ରାଶି ହେଉଛି ୬.୯ ନିୟୁତ ଆମେରିକୀୟ ଡଲାର (ପ୍ରାୟ ୬୦ କୋଟି ଟଙ୍କା)। ୨୦୧୭ରେ ଶେଷ ସଂସ୍କରଣ ତୁଳନାରେ ପୁରସ୍କାର ରାଶି ୫୩ ପ୍ରତିଶତ ବୃଦ୍ଧି ପାଇଛି। ଚାମ୍ପିଅନ୍ସ ଟ୍ରଫି ୨୦୨୫ରେ ଅଂଶଗ୍ରହଣ କରୁଥିବା ସମସ୍ତ ଆଠଟି ଦଳକୁ ୧୨୫,୦୦୦ଡଲାର (ପ୍ରାୟ ୧.୦୮ କୋଟି ଟଙ୍କା) ନଗଦ ପୁରସ୍କାର ମିଳିବ।
ସେହିପରି, ପାକିସ୍ତାନ ସମେତ ନକଆଉଟ ପର୍ଯ୍ୟାୟରେ ପ୍ରବେଶ କରିପାରି ନ ଥିବା ଦଳଗୁଡ଼ିକୁ ୧୪୦,୦୦୦ ଡଲାର(୧.୨୨ କୋଟି ଟଙ୍କା) ମିଳିବ। ଏହା ବ୍ୟତୀତ, ସମସ୍ତ ଦଳକୁ ୧୨୫,୦୦୦ଡଲାର (୧.୦୮ କୋଟି ଟଙ୍କା) ଗ୍ୟାରେଣ୍ଟି ରାଶି ମିଳିବ। ତେଣୁ, ଆୟୋଜକ ଦେଶ ୨୬୫,୦୦ଡଲାର ପାଇବେ।
