ଇସଲାମାବାଦ,୨୯।୩ : ଦେଶର ପ୍ରଧାନ ବିଚାରପତିଙ୍କ କ୍ଷମତାକୁ ହ୍ରାସ କରିବା ଉଦ୍ଦେଶ୍ୟରେ ପାକିସ୍ତାନ ସରକାର ସଂସଦରେ ଏକ ପ୍ରସ୍ତାବ ଆଗତ କରିଛନ୍ତି। ଏହାପୂର୍ବରୁ ପ୍ରଧାନମନ୍ତ୍ରୀ ଶେହବାଜ ସରିଫ କହିଥିଲେ ଯେ ଯଦି ପ୍ରଧାନ ବିଚାରପତିଙ୍କ କ୍ଷମତାକୁ ହ୍ରାସ କରିବାକୁ ସଂସଦ ଆଇନ ନ କରେ ତେବେ ଇତିହାସ ଆମକୁ କ୍ଷମା କରିବ ନାହିଁ। ଆଇନ ମନ୍ତ୍ରୀ ଆଜମ ନାଜିର ତାରାର କ୍ୟାବିନେଟ ଅନୁମୋଦନ ପରେ ସଂସଦରେ ଦ ସୁପ୍ରିମକୋର୍ଟ ପ୍ରାକ୍ଟିସ ଆଣ୍ଡ ପ୍ରୋସେଜର ଆକ୍ଟ-୨୦୨୩ ଉପସ୍ଥାପନ କରିଛନ୍ତି।
ଉଲ୍ଲେଖନୀୟ କଥା ହେଉଛି, ସଂସଦରେ ଏହି ବିଲ ଆଗତ ହେବା ଏବଂ ପ୍ରଧାନମନ୍ତ୍ରୀ ସରିଫଙ୍କ ଏହି ବିବୃତ୍ତି ଏକ ସମୟରେ ଆସିଥିଲା ଯେତେବେଳେ ପାକିସ୍ତାନ ସୁପ୍ରିମକୋର୍ଟର ଦୁଇ ଜଣ ବିଚାରପତି ଦେଶର ସର୍ବୋଚ୍ଚ ବିଚାରପତିଙ୍କ କ୍ଷମତା ଉପରେ ପ୍ରଶ୍ନ ଉଠାଇଥିଲେ।
ସଂସଦର ମିଳିତ ଅଧିବେଶନକୁ ସମ୍ବୋଧିତ କରି ସରିଫ ସୁପ୍ରିମକୋର୍ଟର ଜଷ୍ଟିସ ମାନସୁର ଅଲି ଶାହା ଏବଂ ଜଷ୍ଟିସ ଜମାଲ ଖାନ ମାଣ୍ଡୋଖେଲଙ୍କ ଅସନ୍ତୋଷପୂର୍ଣ୍ଣ ବିଚାର ବିଷୟରେ କହିଥିଲେ, ଯାହା ପ୍ରଧାନ ବିଚାରପତିଙ୍କୁ ସ୍ବତଃପ୍ରବୃତ୍ତ ଭାବେ କୌଣସି ପ୍ରସଙ୍ଗରେ କାର୍ଯ୍ୟ କରିବାକୁ ଅନୁମତି ଦେଇଥିଲା।
