ମାଞ୍ଚେଷ୍ଟର,୩।୯(ଏପି): ଚଳିତ ଇଂଲଣ୍ଡ ଗସ୍ତରେ ପାକିସ୍ତାନ ତା’ର ପ୍ରଥମ ବିଜୟ ହାସଲ କରିଛି। ସ୍ଥାନୀୟ ଓଲ୍ଡ ଟ୍ରାଫୋର୍ଡ ଗ୍ରାଉଣ୍ଡରେ ମଙ୍ଗଳବାର ଅନୁଷ୍ଠିତ ତୃତୀୟ ତଥା ଅନ୍ତିମ ଟି୨୦ ମ୍ୟାଚ୍ରେ ପାକିସ୍ତାନ ୫ ରନରେ ଘରୋଇ ଇଂଲଣ୍ଡକୁ ପରାସ୍ତ କରିଛି। ଫଳରେ ୩ ମ୍ୟାଚ୍ବିଶିଷ୍ଟ ଏହି ସିରିଜ ୧-୧ରେ ଅମୀମାଂସିତ ରହିଛି। ଟସ୍ ଜିତି ଇଂଲଣ୍ଡ ପାକିସ୍ତାନକୁ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲା। ପାକିସ୍ତାନ ପ୍ରଥମେ ବ୍ୟାଟିଂ କରି ଅଭିଜ୍ଞ ମହମ୍ମଦ ହାଫିଜ୍ ଓ ପଦାର୍ପଣ କରିଥିବା ହାଇଦର ଅଲୀ ଦମ୍ଦାର ପ୍ରଦର୍ଶନ ବଳରେ ନିର୍ଦ୍ଧାରିତ ୨୦ ଓଭରରେ ୪ ଉଇକେଟ ହରାଇ ୧୯୦ ରନ ସଂଗ୍ରହ କରିଥିଲା। ଜବାବରେ ଇଂଲଣ୍ଡ ୮ ଉଇକେଟ ହରାଇ ୧୮୫ ରନରେ ସୀମିତ ରହି ବିଜୟଠାରୁ ୬ ରନ ଦୂରରେ ରହିଯାଇଥିଲା। ୫୨ ବଲରୁ ୪ ଚୌକା ଓ ୬ ଛକା ବଳରେ ଦ୍ରୁତ ଅପରାଜିତ ୮୬ ରନ କରିଥିବା ହାଫିଜ୍ ପ୍ଲେୟର ଅଫ୍ ଦି ମ୍ୟାଚ ଓ ପ୍ଲେୟର ଅଫ୍ ଦି ସିରିଜ ବିବେଚିତ ହୋଇଥିଲେ।
୧୯୧ରନ ଟାର୍ଗେଟର ପିଛା କରି ଇଂଲଣ୍ଡ ନିୟମିତ ବ୍ୟବଧାନରେ ଉଇକେଟ ହରାଇ ଚାପର ବଶବର୍ତ୍ତୀ ହୋଇଥିଲା। ଓପନର ଟମ୍ ବାଣ୍ଟନ ୪୬, ମୋଇନ ଅଲୀ ୬୧, ସାମ ବିଲିଙ୍ଗ୍ସ ୨୬, ଅଧିନାୟକ ଇଅନ ମୋର୍ଗାନ ୧୦, ଲୁଇସ୍ ଗ୍ରେଗୋରୀ ୧୨ ରନ ସଂଗ୍ରହ କରି ଆଉଟ ହୋଇଥିଲେ। ବୋଲିଂରେ ପାକିସ୍ତାନ ତରଫରୁ ଶାହିନ ଶାହ ଆଫ୍ରିଦି ଓ ଓ୍ବାହାବ ରିୟାଜ ୨ଟି ଲେଖାଏ, ଇମାଦ ଓ୍ବାସିମ ଓ ହାରିସ ରୌଫ ଗୋଟିଏ କରି ଉଇକେଟ ହାସଲ କରିଥିଲେ।
ପ୍ରଥମେ ବ୍ୟାଟିଂ କରିଥିବା ପାକିସ୍ତାନ ତରଫରୁ ଓପନର ତଥା ବାବର ଆଜମ ୨୧ ରନ କରି ଆଉଟ ହୋଇଥିଲେ। ପ୍ରଥମେ ଫଖର ଜମାନ ୧ ରନ କରି ଆଉଟ ହୋଇଥିଲେ ଓ ପାକିସ୍ତାନ ପ୍ରାରମ୍ଭିକ ଝଟ୍କା ଖାଇଥିଲା। ୧୯ ବର୍ଷୀୟ ନବାଗତ ହାଇଦର ଅଲୀ ୩୩ ବଲରୁ ୫ ଚୌକା ଓ ୨ ଛକା ସହ ୫୪ ରନର ଅର୍ଦ୍ଧଶତକୀୟ ପାଳି ଖେଳିଥିଲେ। ସେହିପରି ଅଭିଜ୍ଞତାରୁ ଫାଇଦା ଉଠାଇ ହାଫିଜ୍ ୮୬ ରନର ଉପଯୋଗୀ ପାଳି ଖେଳି ଅପରାଜିତ ରହିବା ସହ ପାକସ୍ତାନକୁ ଚ୍ୟାଲେଞ୍ଜିଂ ସ୍କୋର ପ୍ରଦାନ କରିଥିଲେ। ତୃତୀୟ ଉଇକେଟରେ ହାଫିଜ୍ ଓ ହାଇଦର ୬୧ ବଲରୁ ୧୦୦ ରନ ସଂଗ୍ରହ କରିଥିଲେ। ଅନ୍ୟମାନଙ୍କ ମଧ୍ୟରେ ସଦାବ ଖାନ ୧୫ ରନ କରି ଆଉଟ ହୋଇଥିବା ବେଳେ ଇମାଦ ଓ୍ବାସିମ ୬ ରନ କରି ଅପରାଜିତ ରହିଥିଲେ। ବୋଲିଂରେ ଇଂଲଣ୍ଡ ତରଫରୁ କ୍ରିସ୍ ଜୋର୍ଡାନ ୨, ମୋଇନ ଅଲି ଓ ଟମ୍ କୁରାନ ଗୋଟିଏ ଲେଖାଏ ଉଇକେଟ ହାସଲ କରିଥିଲେ। ପ୍ରଥମ ଟି୨୦ରେ ବର୍ଷା କାରଣରୁ ଫଳାଫଳ ମିଳି ନ ଥିଲା। ତେବେ ଦ୍ୱିତୀୟ ଟି୨୦ରେ ଇଂଲଣ୍ଡ ୫ ଉଇକେଟରେ ବିଜୟ ହାସଲ କରିଥିଲା।
