ହାରାରେ,୨୬।୪: ସ୍ଥାନୀୟ ହାରାରେ ସ୍ପୋଟର୍ସ କ୍ଲବ ଗ୍ରାଉଣ୍ଡରେ ରବିବାର ଖେଳାଯାଇଥିବା ତୃତୀୟ ତଥା ଅନ୍ତିମ ଟି୨୦ ମ୍ୟାଚ୍ରେ ପାକିସ୍ତାନ ଘରୋଇ ଜିମ୍ବାଓ୍ବେକୁ ୨୪ ରନରେ ପରାସ୍ତ କରିଛି। ଫଳରେ ୩ ମ୍ୟାଚ୍ ବିଶିଷ୍ଟ ଏହି ସିରିଜରେ ପାକିସ୍ତାନ ୨-୧ରେ ବିଜୟୀ ହୋଇଛି। ପାକିସ୍ତାନର ହାସନ ଅଲୀ ପ୍ଲେୟର ଅଫ୍ ଦି ମ୍ୟାଚ୍ ଓ ମହମ୍ମଦ ରିଜଓ୍ବାନ ପ୍ଲେୟର ଅଫ୍ ଦି ସିରିଜ ବିବେଚିତ ହୋଇଛନ୍ତି।
ଟସ୍ ଜିତି ପାକିସ୍ତାନ ପ୍ରଥମେ ବ୍ୟାଟିଂ କରି ୨୦ ଓଭରରେ ୩ ଉଇକେଟ ହରାଇ ୧୬୫ ରନ ସଂଗ୍ରହ କରିଥିଲା। ଦଳ ତରଫରୁ ଓପନର ମହମ୍ମଦ ରିଜଓ୍ବାନ ୯୧ (୬୦ ବଲ, ୫ ଚୌକା, ୩ ଛକା), ଅଧିନାୟକ ବାବର ଆଜମ ୫୨ (୪୬ ବଲ, ୫ ଚୌକା), ସର୍ଜିଲ ଖାଁ ୧୮ ରନକରି ଆଉଟ ହୋଇଥିଲେ। ଜିମ୍ବାଓ୍ବେ ପାଇଁ ବୋଲିଂରେ ଲୁକ୍ ଜଙ୍ଗଓ୍ବେ ୩ଟି ଯାକ ଉଇକେଟ ଅକ୍ତିଆର କରିଥିଲେ।
୧୬୬ ରନ ଟାର୍ଗେଟର ପିଛା କରି ଜିମ୍ବାଓ୍ବ ଏକଦା ୪ ଉଇକେଟ ହରାଇ ୧୩୩ ରନକରି ସୁବିଧାଜନକ ସ୍ଥିତିରେ ରହିଥିଲେ ମଧ୍ୟ ମ୍ୟାଚ୍ ହାତଛଡ଼ା କରିଥିଲା। ଦଳ ତରଫରୁ ଓପନର ଓ୍ବେସଲି ମାଧେଭେରେ ୫୯, ତାଡିଓ୍ବାନାଶେ ମାରୁମାନି ୩୫, ବ୍ରେଣ୍ଟନ ଟେଲର ୨୦, ତାରିସାଇ ମୁସାକାଣ୍ଡା ୧୦ ରନକରି ଆଉଟ ହୋଇଥିବା ବେଳେ ଅନ୍ୟମାନେ ଦୁଇଅଙ୍କ ଛୁଇଁପାରି ନ ଥିଲେ। ବୋଲିଂରେ ପାକିସ୍ତାନ ତରଫରୁ ହାସନ ଅଲୀ ସର୍ବାଧିକ ୪, ହାରିସ ରୌଫ ୨ ଓ ମହମ୍ମଦ ହାସନେନ ଗୋଟିଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ପାକିସ୍ତାନ ୨୦ ଓଭରରେ ୧୬୫/୩
(ରିଜଓ୍ବାନ- ୯୧*, ବାବର- ୫୨, ସର୍ଜିଲ- ୧୮, ଜଙ୍ଗଓ୍ବେ- ୩/୩୭)
ଜିମ୍ବାଓ୍ବେ ୨୦ ଓଭରରେ ୧୪୧/୭
(ମାଧେଭେରେ- ୫୯, ମାରୁମାନି- ୩୫, ଟେଲର- ୨୦, ହାସନ ଅଲୀ- ୪/୧୮, ହାରିସ- ୨/୩୪, ହାସନେନ- ୧/୨୬)।