ଅମୃତସର,୭।୪: ପଞ୍ଜାବର ଅମୃତସରରେ ଥିବା ଭାରତ-ପାକିସ୍ତାନ ସୀମାରେ ଏକ ଅନୁପ୍ରବେଶ ଉଦ୍ୟମ ପଣ୍ଡ ହୋଇଛି। ବିଏସ୍ଏଫ୍ ଗୁଳିରେ ପାକିସ୍ତାନୀ ଅନୁପ୍ରବେଶକାରୀ ନିହତ ହୋଇଛନ୍ତି। ସ୍ଥାନୀୟ ଲୋପୋକେ ଥାନା ଅଞ୍ଚଳରେ କାକ୍କାର ଫରଓ୍ବାର୍ଡ ପୋଷ୍ଟ ନିକଟରେ ମଙ୍ଗଳବାର-ବୁଧବାର ରାତ୍ରରେ ପାଟ୍ରୋଲିଂ ସମୟରେ ସମ୍ପୃକ୍ତ ଅନୁପ୍ରବେଶକାରୀଙ୍କୁ ବିଏସ୍ଏଫ୍ ଟିମ୍ ଦେଖିଥିଲେ। ଟିମ୍ ପକ୍ଷରୁ ସତର୍କ ସୂଚନା ଜାରି କରାଯାଇଥିଲେ ମଧ୍ୟ ଅନୁପ୍ରବେଶକାରୀ ଏହାକୁ ଖାତିର କରି ନ ଥିଲେ। ଶେଷରେ ବିଏସ୍ଏଫ୍ ପକ୍ଷରୁ ଗୁଳି ଚାଳନା କରାଯାଇଥିଲା। ଅନୁପ୍ରବେଶକାରୀଙ୍କଠାରୁ ୨ଟି ଏକେ-୪୭, ୨ ମାଗାଜିନ୍, ୨୨ କିଲୋଗ୍ରାମ୍ ହେରୋଇନ୍, ଗୋଟିଏ ମୋବାଇଲ ଫୋନ୍, ପ୍ଲାଷ୍ଟିକ୍ ପାଇପ୍, ପାକିସ୍ତାନୀ ମୁଦ୍ରା ଜବତ କରାଯାଇଛି। ଏହି ଘଟଣାରେ ଗୁରୁଦାସପୁରର ୨ ଜଣ ସ୍ମଗଲରଙ୍କ ବିରୋଧରେ ଲୋପୋକେ ଥାନାରେ ମାମଲା ଦାଏର କରାଯାଇଛି। ସୀମା ଅଞ୍ଚଳରେ ସର୍ଚ୍ଚ ଅପରେଶନ୍ ଜାରି ରହିଛି।