ତ୍ରିନିଦାଦ୍, ୨୬।୮: ପାକିସ୍ତାନ କ୍ରିକେଟ୍ ଖେଳାଳି କୌଣସି ଟୁର୍ନାମେଣ୍ଟ କିମ୍ବା ସିରିଜରେ ଖେଳୁଥିବେ ଏବଂ ଏଥିରେ ବିବାଦୀୟ ଘଟଣା ନ ଘଟିବ ଏହା କେବେ ହୋଇପାରିବ ନାହିଁ। ଯାହାର ଏକ ଜ୍ୱଳନ୍ତ ଉଦାହରଣ ଓ୍ବେଷ୍ଟଇଣ୍ଡିଜରେ ଚାଲିଥିବା କାରବୀୟାନ ପ୍ରିମିୟର ଲିଗ୍ (ସିପିଏଲ୍)ରେ ଦେଖିବାକୁ ମିଳିଛି। ଜାମାଇକା ତଲ୍ଓ୍ବାସ ଓ ଗୁୟାନା ଆମାଜନ ଓ୍ବାରିୟର୍ସ ମଧ୍ୟରେ ଅନୁଷ୍ଠିତ ମ୍ୟାଚ୍ରେ ଏଭଳି ଏକ ବିବାଦୀୟ ଘଟଣା ଦେଖିବାକୁ ମିଳିଥିଲା। ଜାମାଇକା ପକ୍ଷରୁ ପ୍ରତିନିଧିତ୍ୱ କରୁଥିବା ଆସିଫ୍ ଅଲି ଆଉଟ୍ ହେବାପରେ ପ୍ରତିପକ୍ଷ ଗୁୟାନା ବୋଲର କେମୋ ପଲ୍ଙ୍କୁ ବ୍ୟାଟ୍ରେ ମାରିବାକୁ ଉଦ୍ୟମ କରିଥିଲେ। ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ୍ ହୋଇଛି। ଏହି ଘଟଣା ଜାମାଇକା ଇନିଂସର ୮ମ ଓଭରରେ ଘଟିଥିଲା। ଗୁୟାନା ପକ୍ଷରୁ ଧାର୍ଯ୍ୟ ୧୦୯ ରନର ଟାର୍ଗେଟ୍କୁ ପିଛା କରୁଥିବାବେଳେ ଜାମାଇକାର ୩ୟ ବ୍ୟାଟ୍ସମ୍ୟାନ ଭାବେ ଆଉଟ୍ ହୋଇଥିଲେ ଆସିଫ୍। ଗୁୟାନାର ୮ମ ଓଭର ବୋଲିଂ କରୁଥିବା ଦ୍ରୁତ ବୋଲର କେମୋ ପଲ୍ ୩ ବଲଟି ଏକ ବାଉନ୍ସର ପକାଇଥିଲେ। ଏହାକୁ ପୁଲ୍ ମାରିବାକୁ ଯାଉ ଆସିଫ୍ ଡିପ୍ ମିଡ୍ଉଇକେଟ୍ରେ କ୍ୟାଚ୍ ଆଉଟ୍ ହୋଇଥିଲେ। ଏହାପରେ ପଲ୍ ଉତ୍ସାହିତ ହୋଇ ଆସିଫ୍ଙ୍କ ନିକଟରେ ଆସି ସେଲିବ୍ରେସନ କରିଥିଲେ। ଏଥିରେ କିନ୍ତୁ ଉତ୍କ୍ଷିପ୍ତ ହୋଇ ଅଲି ବ୍ୟାଟ୍କୁ ଜୋର୍ରେ ବୁଲାଇ ଦେଇଥିଲେ। ବ୍ୟାଟଟି ପଲ୍ଙ୍କ ମୁହଁରୁ କିଛି ସେଣ୍ଟିମିଟର ଦୂରରେ ପଳାଇଥିଲା। ଫଳରେ ପଲ୍ ଆଘାତ ପାଇବାରୁ ରକ୍ଷା ପାଇଯାଇଥିଲେ। କେମୋ ପଲ୍ ମଧ୍ୟ ରାଗିଯାଇ ଆସିଫ୍ଙ୍କୁ କିଛି ଖରାପ ଶବ୍ଦ ପ୍ରୟୋଗ କରିଥିବା ଦେଖିବାକୁ ମିଳିଥିଲା। ଏହି ଘଟଣାରେ ଆସିଫ୍ଙ୍କ ବିରୋଧରେ ମ୍ୟାଚ୍ ରେଫରୀ କାର୍ଯ୍ୟାନୁଷ୍ଠାନ ଗ୍ରହଣ କରିବା ଏକପ୍ରକାର ନିଶ୍ଚିତ ହୋଇଛି। ମ୍ୟାଚ୍ରେ ଜାମାଇକା ତଲ୍ଓ୍ବାସ ୫ ଉଇକେଟ୍ରେ ବିଜୟୀ ହୋଇଥିଲା।
