ନୂଆଦିଲ୍ଲୀ, ୨୨।୦୭: ପାକିସ୍ତାନୀ ଗାୟକ ରାହତ ଫତେହ ଅଲି ଖାନଙ୍କୁ ଦୁବାଇ ବିମାନବନ୍ଦରରେ ପୋଲିସ ଗିରଫ କରିଛି। ସୂଚନା ଅନୁଯାୟୀ, ଦୁବାଇରେ ତାଙ୍କ ପୂର୍ବତନ ମ୍ୟାନେଜର ତଥା ପ୍ରସିଦ୍ଧ ଶୋବିଜ ପ୍ରମୋଟର ସଲମାନ ଅହମ୍ମଦଙ୍କ ଦ୍ୱାରା ରାହତ ଫତେହ ଅଲି ଖାନଙ୍କ ବିରୋଧରେ ଏକ ମାମଲା ଦାୟର କରାଯାଇଥିଲା। ଏହି ମାମଲାରେ ବର୍ତ୍ତମାନ ଦୁବାଇ ପୋଲିସ ରାହତଙ୍କୁ ପଚରାଉଚରା କରୁଛି। ରାହତ ତାଙ୍କ ଗୀତ ଶୋ ପାଇଁ ଲାହୋରରୁ ଦୁବାଇରେ ପହଞ୍ଚିଥିଲେ ବୋଲି ଜଣାପଡ଼ିଛି ।
ଗିରଫ ଖବର ମଧ୍ୟରେ ରାହତ ଫତେହ ଅଲି ଖାନ ଏକ ଭିଡିଓ ଜାରି କରି ଗିରଫ ଖବରକୁ ଅସୱୀକାର କରିଛନ୍ତି। ଗିରଫ ପ୍ରସଙ୍ଗକୁ ଅଣଦେଖା କରି ସେ କହିଛନ୍ତି ଯେ ମୁଁ ମୋର ଗୀତ ରେକର୍ଡିଂ କରିବାକୁ ଦୁବାଇ ଆସିଛି ଏବଂ ଏଠି ସବୁକିଛି ଠିକ ଅଛି। ମୁଁ ଆପଣମାନଙ୍କୁ ଅନୁରୋଧ କରିବି ଯେ ଏପରି ଖରାପ ଗୁଜବ ପ୍ରତି ଧ୍ୟାନ ଦିଅନ୍ତୁ ନାହିଁ । ମୁଁ ଶୀଘ୍ର ମୋ ଦେଶକୁ ଫେରିବି ଏବଂ ଏକ ନୂତନ ଗୀତରେ ଆପଣଙ୍କୁ ସର୍ପ୍ରାଇଜ୍ ଦେବି ।
ତେବେ କିଛି ମାସ ପୂର୍ବରୁ ଏକ ବିବାଦକୁ ନେଇ ରାହତ, ଅହମ୍ମଦଙ୍କୁ ଚାକିରିରୁ ବାହାର କରିଦେଇଥିଲେ । ଏହା ବ୍ୟତୀତ ଉଭୟ ରାହତ ଏବଂ ଅହମ୍ମଦ ପରସ୍ପର ବିରୋଧରେ ମାମଲା ଦାୟର କରିଥିବା ଜଣାପଡିଛି । ରାହତ ଭାରତରେ ବହୁତ ନାମ ଅର୍ଜନ କରିଛନ୍ତି। ବଲିଉଡରେ ତାଙ୍କର ଏପରି ଅନେକ ଗୀତ ଅଛି, ଯାହାକି ଲୋକମାନେ ବହୁତ ପସନ୍ଦ କରନ୍ତି ।