ଇସଲାମାବାଦ,୪।୩ : ପାକିସ୍ତାନରେ ଜାରି ରହିଥିବା ଆର୍ଥିକ ସଙ୍କଟ ପାଇଁ ଏହାର ଜନସଂଖ୍ୟା ଦାୟୀ ବୋଲି ଶନିବାର ପୂର୍ବତନ ଅର୍ଥମନ୍ତ୍ରୀ ମିଫତାହ ଇସମାଇଲ କହିଛନ୍ତି। ଦେଶର ଜନସଂଖ୍ୟା ନିୟୋଜନ ଠିକ ଭାବେ କାର୍ଯ୍ୟ କରୁ ନ ଥିବାରୁ ସ୍ଥିତି ଉତ୍କଟ ହେବାରେ ଲାଗିଛି। ପ୍ରଥମେ ଦେଶକୁ ସାମ୍ପ୍ରତିକ ସ୍ଥିତିରୁ ମୁକ୍ତି ପାଇବାର ରାସ୍ତା ଖୋଜିବାକୁ ପଡ଼ିବ। ଏହାପରେ ଜନସଂଖ୍ୟା ଆହ୍ବାନର ମୁକାବିଲା ଜରୁରୀ। ଦେଶରେ ପ୍ରତିବର୍ଷ ୫୫ ଲକ୍ଷ ଶିଶୁ ଜନ୍ମ ହେଉଛନ୍ତି। ଏପରି ଜାରି ରହିଲେ ଆଗାମୀ ଦିନରେ ସ୍ଥିତି ଅଧିକ ଭୟଙ୍କର ହେବ। ଦେଶର ଲୋକେ ଶୀଘ୍ର ଜନସଂଖ୍ୟା ନିୟୋଜନ ଉପରେ ଧ୍ୟାନ ଦେବା ଆବଶ୍ୟକ ବୋଲି ସେ କହିଛନ୍ତି।
ବାଂଲାଦେଶ, ଟୁନିସିଆ, ମିଶର ଆଦି ମୁସଲମାନ ଦେଶ ନିଜ ନିଜ ଦେଶରେ ଜନସଂଖ୍ୟା ନିୟୋଜନ ଆଇନ ପ୍ରଣୟନ କରିଛନ୍ତି। ମାତ୍ର ପାକିସ୍ତାନରେ ଏନେଇ ବର୍ତ୍ତମାନ ସୁଦ୍ଧା କୌଣସି ଉପଯୁକ୍ତ ନୀତି ଅଣାଯାଇ ନ ଥିବା ସେ ଅଭିଯୋଗ କରିଛନ୍ତି। ଜନସଂଖ୍ୟା ବଢ଼ିବା ସହିତ ଦେଶରେ ଆବଶ୍ୟକ ସ୍ବାସ୍ଥ୍ୟ ସେବା ବିପର୍ଯ୍ୟସ୍ତ ହୋଇପଡ଼ିଛି। ଏହାର ନିରାକରଣ ପାଇଁ ଉପଯୁକ୍ତ ସରକାରୀ ଯୋଜନା ଜରୁରୀ ବୋଲି ସେ କହିଛନ୍ତି।