ଚେନ୍ନାଇ,୩ା୯(ପି.ଟି.): ଏଆଇଏଡିଏମ୍କେ ନେତୃତ୍ୱକୁ ନେଇ ବିବାଦ ଲାଗିରହିଥିବାବେଳେ ଇ.କେ. ପାଲାନିସ୍ବାମୀ ଦଳର ଶୀର୍ଷ ନେତା ବୋଲି ମାଡ୍ରାସ ହାଇକୋର୍ଟ ଶୁକ୍ରବାର ରାୟ ଦେଇଛନ୍ତି। ଅନ୍ୟପକ୍ଷରେ ଓ. ପନିରସେଲ୍ଭାମଙ୍କ ସପକ୍ଷରେ ଆସିଥିବା ଜଣିକିଆ ଖଣ୍ଡପୀଠ ରାୟକୁ ଜଷ୍ଟିସ ଏମ୍. ଦୁରାଇସ୍ବାମୀ ଓ ସୁନ୍ଦର ମୋହନଙ୍କ ଖଣ୍ଡପୀଠ ଖାରଜ କରିଦେଇଛନ୍ତି। ଗତ ଜୁଲାଇ ୧୧ରେ ଏଆଇଏଡିଏମ୍କେ ସାଧାରଣ ପରିଷଦ ବୈଠକ ବସି ବିରୋଧୀ ଦଳ ନେତା ପାଲାନିସ୍ବାମୀଙ୍କୁ ଦଳର ଅନ୍ତରୀଣ ସାଧାରଣ ସମ୍ପାଦକ ନିର୍ବାଚିତ କରାଯାଇଥିବାବେଳେ ପନିରସେଲ୍ଭାମଙ୍କୁ ଦଳରୁ ବହିଷ୍କାର କରାଯାଇଥିଲା। ଅଗଷ୍ଟ ୧୭ରେ ଜଣିକିଆ ଖଣ୍ଡପୀଠ ସାଧାରଣ ପରିଷଦ ବୈଠକର ନିଷ୍ପତ୍ତିକୁ ଅଗ୍ରାହ୍ୟ କରି ପୂର୍ବ ସ୍ଥିତି ବଜାୟ ରଖିବାକୁ ରାୟ ଦେଇଥିଲେ। ପୂର୍ବରୁ ପନିରସେଲ୍ଭାମ ଦଳର କୋର୍ଡିନେଟର ଥିବାବେଳେ ପାଲାନିସ୍ବାମୀ ଯୁଗ୍ମ କୋର୍ଡିନେଟର ଥିଲେ। ଶୁକ୍ରବାର ରାୟ ପରେ ପାଲାନିସ୍ବାମୀ ଏଆଇଏଡିଏମ୍କେର ସର୍ବୋଚ୍ଚ ନେତା ହୋଇପାରିଛନ୍ତି।