ଭଦ୍ରକ ଅଫିସ,୩।୧୨: ଇଚ୍ଛାଶକ୍ତି ଓ ଆତ୍ମବିଶ୍ୱାସ ଆଗରେ ହାର୍ ମାନିଛି ଅକ୍ଷମତା। ମନୋବଳ ଦୃଢ଼ ଥିଲେ ସବୁକିଛି ସମ୍ଭବ। ଏହାକୁ ପ୍ରମାଣିତ କରି ଦେଖାଇଛନ୍ତି ଭଦ୍ରକ ଜିଲା ବନ୍ତ ବ୍ଲକ ପୁରୁଷଣ୍ଢ ଗ୍ରାମର ଦିବ୍ୟାଙ୍ଗ ପଞ୍ଚାନନ ଜେନା(୬୩)। ଟ୍ରାଇସାଇକେଲରେ ଗଁା ଗଁା ବୁଲି ମାଛ ବେପାର କରି ନିଜ ପରିବାର ଚଳାଇବା ସହ ଅନ୍ୟ ପାଇଁ ସେ ଉଦାହରଣ ସାଜିଛନ୍ତି।
ପଞ୍ଚାନନ କହନ୍ତି, ଜମିବାଡ଼ି ନ ଥିବାରୁ ପିଲାବେଳୁ ସେ ପରର ମୂଲ ଲାଗିବା ସହ ପାଳିଆ ଭାବେ ବିଭିନ୍ନ ସ୍ଥାନରେ ପାଲା ପରିବେଷଣ କରି ପରିବାର ଚଳାଉଥିଲେ। ୩୦ବର୍ଷ ବୟସ ବେଳେ ବାଲେଶ୍ୱର ଜିଲା ଅଡ଼ା ନିକଟସ୍ଥ ଛବାଟିଆ ଗ୍ରାମକୁ ପାଲା କରିବାକୁ ସାଥିମାନଙ୍କ ସହ ରାତିରେ ସାଇକେଲରେ ଯାଉଥିଲେ। ବରଦା କେନାଲ ବନ୍ଧରେ ସାଇକେଲରୁ ପଡ଼ିଯିବାରୁ ଦୁଇ ଆଣ୍ଠୁ ମାଡ଼ ହୋଇଯାଇଥିଲା। ଚିକିତ୍ସା ଅଭାବରୁ ୨ବର୍ଷ ଅକର୍ମଣ୍ୟ ହୋଇ ଘରେ ବସି ରହିଲେ। ଏହା ପରଠାରୁ ସେ ଠିକ୍ ଭାବେ ଚାଲିପାରିଲେ ନାହିଁ। ବହୁ ଚେଷ୍ଟା କରି ଦିବ୍ୟାଙ୍ଗ ପ୍ରମାଣପତ୍ର ହାସଲ ପରେ ତାଙ୍କୁ ଭତ୍ତା ମିଳିବା ସହ ପ୍ରଶାସନ ପକ୍ଷରୁ ଟ୍ରାଇସାଇକେଲ ମିଳିଥିଲା। ମାତ୍ର କେବଳ ଭତ୍ତା ଟଙ୍କାରେ ପରିବାର ଚଳିବା ସମ୍ଭବ ନୁହେଁ। ଏଣୁ ସେ ହାର୍ ନ ମାନି ରୋଜଗାର ପନ୍ଥା ଖୋଜିଥିଲେ। କାହା ଉପରେ ନିର୍ଭର ନ କରି ଆଗରପଡ଼ା ବଜାରରେ ବେପାରୀଙ୍କଠାରୁ ମାଛ କିଣି ଟ୍ରାଇସାଇକେଲରେ ଆଖପାଖ ୧୦ ଖଣ୍ଡ ଗଁା ବୁଲି ବିକିବା ଆରମ୍ଭ କରିଥିଲେ। ସପ୍ତାହର ରବିବାର, ବୁଧବାର ଓ ଶୁକ୍ରବାର ସକାଳ ୫ଟାରୁ ବେପାରୀଙ୍କଠାରୁ ମାଛ ନେଇ ବାହାରି ପଡ଼ନ୍ତି ଗଁାକୁ। ଦିନକୁ ପ୍ରାୟ ୨୦ କେଜି ମାଛ ତାଙ୍କର ବିକ୍ରି ହୋଇଥାଏ। ଆଉ ସେଥିରୁ ପ୍ରାୟ ୨୦୦ରୁ ୩୦୦ ଟଙ୍କା ଲାଭ ହୁଏ। ପରିବାର କହିଲେ ସେ ଓ ତାଙ୍କ ସ୍ତ୍ରୀ। ଏହି ବେପାରରୁ ଯାହା ରୋଜଗାର ହେଉଛି, ସେଥିରେ ତାଙ୍କର ତେଲ ଲୁଣର ସଂସାର ଚଳିଯାଉଛି। ବୟସାଧିକ ଦିବ୍ୟାଙ୍ଗ ହୋଇ ବି ଅନ୍ୟ ଉପରେ ନିର୍ଭରଶୀଳ ନ ହୋଇ ନିଜେ ରୋଜଗାର କରି ପରିବାର ପ୍ରତିପୋଷଣ କରିଆସୁଛନ୍ତି। ଆଜିର ବେକାର ଯୁବ ସମାଜ ପାଇଁ ସେ ପ୍ରେରଣାର ଉତ୍ସ ପାଲଟିଛନ୍ତି ା