ସାକ୍ଷୀଗୋପାଳ,୧୭ା୬(କିଶୋର ମହାପାତ୍ର /ପ୍ରଶାନ୍ତ ବାରିକ) ପୁରୀ ଜିଲା ସତ୍ୟବାଦୀ ବକୁଳବନରେ ପୁଣ୍ୟାତ୍ମା ପଞ୍ଚସଖାଙ୍କ ସ୍ମୃତି ରକ୍ଷା ନିମନ୍ତେ ପ୍ରତିଷ୍ଠା ହୋଇଥିବା ପଞ୍ଚସଖା ସ୍ମୃତି ସମାଧିପୀଠ ଏବେ ଅବହେଳିତ ହୋଇପଡ଼ିଛି। ଅନାବନା ଲଟା ବୁଦାରେ ଏହି ପୀଠ ପରିପୂର୍ଣ୍ଣ ହୋଇଥିବାବେଳେ ସନ୍ଧ୍ୟା ହେଲେ ନିଶାଡ଼ିଙ୍କ ଆଡ୍ଡା ଜମୁଛି। ସୁରକ୍ଷା ବ୍ୟବସ୍ଥା ଓ ରକ୍ଷଣାବେକ୍ଷଣ ଅଭାବରୁ ଉନ୍ନୟନ କାର୍ଯ୍ୟ ଉଜୁଡ଼ିଗଲାଣି। ହେଲେ ଏଥିପ୍ରତି ପ୍ରଶାସନର ନିଘା ନାହିଁ। ସେହିପରି ଚଳିତ ମାସ ୧୮ ତାରିଖରେ ଉତ୍କଳମଣି ଗୋପବନ୍ଧୁ ଦାସଙ୍କ ଶ୍ରାଦ୍ଧ ଦିବସ। କିନ୍ତୁ ଏପର୍ଯ୍ୟନ୍ତ ପୀଠ ପରିସର ସଫେଇ କରାଯାଇନାହିଁ।
ସୂଚନା ଅନୁଯାୟୀ, ଏଠାରେ ପଞ୍ଚସଖାଙ୍କ ପାର୍ଥିବ ଶରୀର ଅନ୍ତିମ ସଂସ୍କାର କରାଯିବା ପରେ ସ୍ମୃତି ସମାଧି ଗଢ଼ି ଉଠିଥିଲା। ସତ୍ୟବାଦୀ ଯୁଗର ମନୀଷୀ ଉତ୍କଳମଣି ପଣ୍ଡିତ ଗୋପବନ୍ଧୁ ଦାସ, ପଣ୍ଡିତ ନୀଳକଣ୍ଠ ଦାସ, ପଣ୍ଡିତ ଗୋଦାବରୀଶ ମିଶ୍ର, ପଣ୍ଡିତ କୃପାସିନ୍ଧୁ ମିଶ୍ର ଏବଂ ଆଚାର୍ଯ୍ୟ ହରିହର ଦାସଙ୍କ ସହିତ ପଞ୍ଚସଖାଙ୍କ ଅନୁଗାମୀ ପଣ୍ଡିତ ଲିଙ୍ଗରାଜ ମିଶ୍ର ଓ ପ୍ରଚାରକ ଅନନ୍ତ ମିଶ୍ରଙ୍କୁ ନେଇ ମୋଟ ୭ଟି ସମାଧିପୀଠ ଏହି ବକୁଳବନ ପରିସରରେ ରହିଛି। ପୁଣ୍ୟାତ୍ମାଙ୍କ ଆବିର୍ଭାବ, ତିରୋଧାନ ତଥ୍ୟ ସହିତ ସେମାନେ ରଚନା କରିଥିବା କବିତା ପଂକ୍ତିର ଅଂଶବିଶେଷ ପୃଥକ୍ ପୃଥକ୍ ଭାବେ ମାର୍ବଲ ପଥରରେ ଖୋଦେଇ କରି ସମାଧିରେ ଶ୍ରଦ୍ଧାଳୁଙ୍କ ସୂଚନା ପାଇଁ ସ୍ଥାନିତ କରାଯାଇଛି। ସ୍ମୃତିପୀଠକୁ ଆକର୍ଷଣୀୟ କରିବା ସହ ବିକାଶ ନିମନ୍ତେ ପ୍ରାଚୀର, ପ୍ରାର୍ଥନା ନିମନ୍ତେ କଡପା ପଥରରେ ଚଟାଣ, ପାଥ୍ ଓ୍ବେ, ଫାଟକ, ଫୁଲକୁଣ୍ଡ, ଆଲୋକ ବ୍ୟବସ୍ଥା, ସଂଲଗ୍ନ ପକ୍କାରାସ୍ତା, ପୁଷ୍କରିଣୀ, ଫୁଲବଗିଚା ଆଦି ରାଜ୍ୟ ସରକାରଙ୍କ ଅନୁଦାନରେ ନିର୍ମିତ ହୋଇଥିଲା। ପ୍ରଥମେ ୧୯୯୬ରେ ସତ୍ୟବାଦୀର ତତ୍କାଳୀନ ବିଧାୟକ ପ୍ରସାଦ ହରିଚନ୍ଦନଙ୍କ ପ୍ରୟାସ ଓ ତତ୍ତ୍ୱାବଧାନରେ ଏହି ପୀଠର ପୁନରୁଦ୍ଧାର ସହ ଏହାକୁ ଏକ ମନୋରମ ଉଦ୍ୟାନରେ ପରିଣତ କରାଯାଇଥିଲା। ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଏହାର ଉନ୍ନୟନ କରାଯିବା ସହିତ କିଛିଦିନ ପାଇଁ ଅସ୍ଥାୟୀ ଭାବେ ରକ୍ଷଣାବେକ୍ଷଣ ଦାୟିତ୍ୱ ତୁଲାଯାଇଥିଲା। ପ୍ରତ୍ୟହ ସକାଳେ ଓ ସାରେ ଲୋକେ ଅବସର ବିନୋଦନ ନିମନ୍ତେ ଏଠାରେ ଭିଡ଼ ଜମାଉଥିଲେ। ଏପରିକି ମନୋରମ ପରିବେଶରେ ଆଲ୍ବମ୍ ଶୁଟିଂ କରାଯାଉଥିଲା। ମାତ୍ର ସୁରକ୍ଷା ଓ ରକ୍ଷଣାବେକ୍ଷଣ ଅଭାବରୁ ଏହା ଅବହେଳିତ ଅବସ୍ଥାରେ ପହଞ୍ଚିଥିଲା। ପୁନଶ୍ଚ ୨୦୧୪ରେ ଏହାର ନବୀକରଣ କାର୍ଯ୍ୟ କରାଯାଇ ଆକର୍ଷଣୀୟ କରାଯାଇଥିଲା। ହେଲେ ପୀଠଟି ଏବେ ଯଥାପୂର୍ବଂ ତଥା ପରମ୍ ଅବସ୍ଥାରେ ପହଞ୍ଚିଛି। ଅନାବନା ଲଟାବୁଦାରେ ଫୁଲବଗିଚା ଭରିଛି। ସଞ୍ଜ ହେଲେ ନିଶାଡ଼ିଙ୍କ ଆସର ଜମୁଛି। ଫାଟକ ମୁକୁଳା ପଡ଼ିଛି। ଫୁଲ, ଚନ୍ଦନ, ଦୀପ, ଧୂପରେ ଭରିରହିବା ଉପାସନା ସ୍ଥଳରେ ଏବେ ମଦବୋତଲ, ଦରପୋଡ଼ା ବିଡ଼ି, ସିଗାରେଟ୍, ଗୁଟ୍ଖା ପାଉଚ ଦେଖିବାକୁ ମିଳୁଛି। ପୁଣ୍ୟାତ୍ମାଙ୍କ ସ୍ମୃତି ସମାଧିପୀଠ ଅଲୋଡ଼ା ହୋଇପଡ଼ିଛି। ମହାପୁରୁଷଙ୍କ ଜୟନ୍ତୀ ଓ ଶ୍ରାଦ୍ଧବାର୍ଷିକ କାର୍ଯ୍ୟକ୍ରମ ଆୟୋଜନ କରୁଥିବା ସଙ୍ଗଠନଗୁଡ଼ିକ ଏହାକୁ ସଫେଇ କରି ବ୍ୟବହାର କରୁଛନ୍ତି। ଉକ୍ତ ପୀଠକୁ ଲାଗି ନିର୍ମାଣ କରାଯାଉଥିବା ଓଡ଼ିଆ ବିଶ୍ୱବିଦ୍ୟାଳୟ ଅଗ୍ରଗତି ସମ୍ପର୍କରେ ଅନୁଧ୍ୟାନ କରିବାକୁ ଆସୁଥିବା ବରିଷ୍ଠ ପ୍ରଶାସନିକ ଅଧିକାରୀମାନଙ୍କ ଦୃଷ୍ଟି ଆଢୁଆଳରେ ଏହା ରହିଯାଇଛି। ଏହି ପୁଣ୍ୟପୀଠ ପ୍ରତି ପ୍ରଶାସନିକ ସ୍ତରରେ ଅବହେଳାକୁ ନେଇ ସାଧାରଣରେ ଅସନ୍ତୋଷ ଏବଂ କ୍ଷୋଭ ପ୍ରକାଶ ପାଇଛି।