କେନ୍ଦୁଝର,୯ା୩(ସ୍ବ.ପ୍ର.): ପୌର ନିର୍ବାଚନ ପାଇଁ ବିଭିନ୍ନ ଦଳର ପ୍ରାର୍ଥୀଙ୍କ ମଧ୍ୟରେ ଜୋରଦାର ପ୍ରସ୍ତୁତି ଆରମ୍ଭ ହୋଇଛି। ବୁଧବାର ନାମାଙ୍କନପତ୍ର ଯାଞ୍ଚ ବେଳେ କେନ୍ଦୁଝରଗଡ଼ ପୌରପରିଷଦ ପାଇଁ ନିର୍ବାଚନ ଲଢୁଥିବା ବିଜେଡିର ୧୨ ନମ୍ବର ଓ୍ବାର୍ଡର କାଉନସିଲର ପ୍ରାର୍ଥୀ କରୁଣାକର ମାରାଣ୍ଡିଙ୍କ ବିରୋଧରେ ସଙ୍ଗୀନ ଅଭିଯୋଗ ହୋଇଛି। ସେ ପଞ୍ଚାୟତ ନିର୍ବାଚନ ବେଳେ ସାହାରପଡ଼ା ବ୍ଲକ ଦିଗପଶି ଗ୍ରାମର ୭ ନମ୍ବର ଓ୍ବାର୍ଡରେ ଭୋଟ ଦେଇଥିଲେ। ତାଙ୍କର ନାମ କେନ୍ଦୁଝରଗଡ଼ ପୌରପାଳିକାର ଭୋଟର ତାଲିକାରେ ସିରିଏଲ ନମ୍ବର ୫୧୫ ରେ ରହିଥିବା ବେଳେ ସାହାରପଡ଼ା ବ୍ଲକ ଦିଗପଶି ଗ୍ରାମର ୭ ନମ୍ବର ଓାର୍ଡରେ ସିରିଏଲ ନମ୍ବର ୨୧ରେ ରହିଛି। ସେହିପରି ତାଙ୍କ ସ୍ତ୍ରୀ ପାନମଣି ମାରାଣ୍ଡି ଚଳିତ ପଞ୍ଚାୟତ ନିର୍ବାଚନରେ ଦିଗପଶି ପଞ୍ଚାୟତର ସରପଞ୍ଚ ପ୍ରାର୍ଥୀ ଭାବେ ପ୍ରାର୍ଥୀ ହୋଇଥିଲେ। ଏଣୁ ତାଙ୍କର ନାମ କିପରି ଦୁଇଟି ସ୍ଥାନରେ ଭୋଟର ତାଲିକାରେ ରହିଲା ତାହାକୁ ନେଇ ଉପଜିଲାପାଳ ତଥା ନିର୍ବାଚନ ଅଧିକାରୀଙ୍କୁ ଭାଜପା ପ୍ରାର୍ଥୀ ଶିକର ମାଝି ଅଭିଯୋଗ କରିଛନ୍ତି। ଏନେଇ ଉପଜିଲାପାଳ ରାମଚନ୍ଦ୍ର କିସ୍କୁ କହିଛନ୍ତି, ନିର୍ବାଚନ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଅନ୍ୟପକ୍ଷରେ ବିଜେଡି ରାଜ୍ୟ ଯୁବ ଉପସଭାପତି ସୌମ୍ୟ ଶଙ୍କର ଚକ୍ର କହିଛନ୍ତି, ଅଭିଯୋଗର ତର୍ଜମା ପରେ କାର୍ଯ୍ୟାନୁଷ୍ଠାନ ହେବ।