ମୋରଡ଼ା,୯ା୯(ସ୍ମାରକ ମାଜୀ): କଥା କଟାକଟି ଓ ହୋହଲ୍ଲା ମଧ୍ୟରେ ମୋରଡ଼ା ପଞ୍ଚାୟତ ସମିତିର ଷଷ୍ଠ ବୈଠକ ଶୁକ୍ରବାର ଅନୁଷ୍ଠିତ ହୋଇଯାଇଛି। ଅଧ୍ୟକ୍ଷ ପୀଥନାଥ ସୋରେନଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକକୁ ବିଡିଓ ଜୟକୃଷ୍ଣ ପାତ୍ର ପରିଚାଳନା କରିଥିଲେ। ମୁଖ୍ୟ ଅତିଥିଭାବେ ସ୍ଥାନୀୟ ବିଧାୟକ ରାଜକିଶୋର ଦାସ, ସହକାରୀ ଯନ୍ତ୍ରୀ ମୋତିଲାଲ ତୁଙ୍ଗ,ଉପାଧ୍ୟକ୍ଷା ଜେମାମଣି ମହାନ୍ତ, ଜିଲା ପରିଷଦ ସଭ୍ୟା ମିନାକ୍ଷୀ ସୋରେନ, ଜିଲା ପରିଷଦ ସଭ୍ୟ ଅଭିରାମ ଭୋଇ, ଏମ୍ପିଙ୍କ ପ୍ରତିନିଧୀ ନଗେନ୍ଦ୍ରନାଥ ନାଏକ, ଜିପିଇଓ ରୁପେଶ ମାଝୀ ପ୍ରମୁଖ ଉପସ୍ଥିତ ଥିଲେ।
ଆରମ୍ଭରୁ ବିଭିନ୍ନ ପ୍ରସଙ୍ଗକୁ ନେଇ ବାଦ ବିବାଦ ଉପୁଜିଥିଲା। ବ୍ଲକ ଅଧୀନ ୨୦ଟି ପଞ୍ଚାୟତର ସରପଞ୍ଚ ବିଭିନ୍ନ ଦାବି ନେଇ ବିଡିଓଙ୍କୁ ଦାବିପତ୍ର ଦେବା ସହ ବୈଠକ ବର୍ଜନ କରିଥିଲେ। ସରପଞ୍ଚମାନଙ୍କଠୁ ଦାୟିତ୍ୱ ଛିନ୍ନ କରାଯାଉଥିବାରୁ ଲୋକଙ୍କ ସମସ୍ୟାର ସମାଧାନ ହୋଇପାରୁନାହିଁ ବୋଲି ସରପଞ୍ଚ ସଂଘର ସଭାପତି ରବି ସିଂ ଅଭିଯୋଗ କରିଥିଲେ। ସେହିପରି ୮ ମାସ ପରେ ବୈଠକ ହୋଇଥିବାରୁ ସମିତି ସଭ୍ୟାସଭ୍ୟମାନେ ମଧ୍ୟ ବୈଠକ ବର୍ଜନ କରିଥିଲେ। ତେବେ ବୁଝାଶୁଝା ପରେ ସମିତି ସଭ୍ୟମାନେ କିଛି ସମୟ ପାଇଁ ବୈଠକକୁ ଆସିଥିଲେ। ଉନ୍ନୟନମୂଳକ କାର୍ଯ୍ୟ ଚୟନକୁ ନେଇ ବିଧାୟକ ଦାସଙ୍କ ସହିତ ସମିତି ସଭ୍ୟାସଭ୍ୟମାନଙ୍କ କଥା କଟାକଟି ହୋଇଥିଲା। ଯାହାକୁ ନେଇ ବିଧାୟକ କ୍ଷୁବ୍ଧ ହୋଇ ପଡ଼ିଥିବା ଦେଖିବାକୁ ମିଳିଥିଲା। ଆଗକୁ କାର୍ଯ୍ୟ ଚୟନ ବେଳେ ସମିତି ସଭ୍ୟାସଭ୍ୟଙ୍କ ମତାମତ ନିଆଯିବ ବୋଲି ବିଧାୟକ କହିଥିଲେ ମଧ୍ୟ ସମିତି ସଭ୍ୟାସଭ୍ୟ ଯିଦ୍ରେ ଅଟଳ ରହିଥିଲେ। ସମିତି ସଭ୍ୟ ଲକ୍ଷ୍ମୀଧର ମାର୍ଣ୍ଡି ବିଧାୟକ ଦାସଙ୍କୁ କେବଳ ଜଣେ ସମ୍ମାନିତ ଅତିଥିଭାବରେ ସୀମିତ ରହିବାକୁ କହି କଡ଼ା ସମାଲୋଚନା କରିଥିବା ଦେଖିବାକୁ ମିଳିଥିଲା। ତେବେ ବ୍ଲକ ଅଧ୍ୟକ୍ଷ ପଦ ବିଜେଡି ହାତେଇ ଥିଲେ ମଧ୍ୟ ବିଧାୟକ ଦାସଙ୍କ ପ୍ରତି ଜନପ୍ରତିନିଧିଙ୍କ ସମର୍ଥନ କମୁଥିବା ଏହି ବୈଠକରେ ପ୍ରତୀୟମାନ ହୋଇଥିଲା।