ଜଗତ୍ସିଂହପୁର ଅଫିସ, ୨୬ା୨: ତ୍ରିସ୍ତରୀୟ ପଞ୍ଚାୟତ ନିର୍ବାଚନର ଫଳାଫଳ ଘୋଷଣା ଶନିବାରଠାରୁ ଆରମ୍ଭ ହେବ। ଜିଲାର ସମସ୍ତ ବିତରଣ କେନ୍ଦ୍ରରେ ସକାଳ ୮ରୁ ଗଣତି ଆରମ୍ଭ ହେବ। ପ୍ରଥମ ଦିନ ଜିଲାର ୨୬ଟି ଜିଲା ପରିଷଦ ଜୋନ୍ ମଧ୍ୟରୁ ୮ଟି ବ୍ଲକର ସମସ୍ତ ୧ନଂ. ଜୋନ୍ର ଫଳ ପ୍ରକାଶ ପାଇବ। ଏହି ଜୋନ୍ ଅନ୍ତର୍ଗତ ୬୬ଟି ପଞ୍ଚାୟତର ସରପଞ୍ଚ ଓ ସମିତିସଭ୍ୟ ଲାଗି ନିର୍ବାଚିତ ପ୍ରାର୍ଥୀଙ୍କ ନାମ ଘୋଷଣା ହେବ। ସେମାନଙ୍କ ମଧ୍ୟରୁ ଏରସମା ୧ନଂ.ର ୬, କୁଜଙ୍ଗ ୧ନଂ. ୯, ଜଗତ୍ସିଂହପୁର ୧ନଂ. ୯, ତିର୍ତ୍ତୋଲ ୧ନଂ. ୭, ନାଉଗାଁ ୧ନଂ. ୮, ବାଲିକୁଦା ୧ନଂ. ୭, ବିରିଡ଼ି ୧ନଂ. ୧୧ ଓ ରଘୁନାଥପୁର ୧ନଂ. ଜୋନ୍ ମଧ୍ୟରେ ୯ଟି ପଞ୍ଚାୟତ ରହିଛି। ସେହିପରି ୧୧୦୯ ଜଣ ୱାର୍ଡମେମ୍ବରଙ୍କ ଫଳାଫଳ ଘୋଷଣା କରାଯିବ। ଏନେଇ ପ୍ରମୁଖ ରାଜନୈତିକ ଦଳ ଯଥା ବିଜେଡି, କଂଗ୍ରେସ ଓ ଭାଜପା ନେତୃବୃନ୍ଦ ଅଙ୍କକଷା ଜୋର୍ଦାର କରିଛନ୍ତି।
ପ୍ରକାଶଯୋଗ୍ୟ, ବାଲିକୁଦା ବ୍ଲକର ୪ ଜିଲା ପରିଷଦ ଜୋନ୍ରେ ୧୮ ଜଣ ପ୍ରାର୍ଥୀ ହୋଇଛନ୍ତି। ବ୍ଲକର ୩୦ଟି ପଞ୍ଚାୟତରେ ୧୧୪ ସରପଞ୍ଚ, ୯୮ ସମିତିସଭ୍ୟ ଓ ୯୭୦ ୱାର୍ଡମେମ୍ବର ପ୍ରାର୍ଥୀ ରହିଛନ୍ତି। ଜଗତ୍ସିଂହପୁର ବ୍ଲକ ଅନ୍ତର୍ଗତ ୪ ଜିଲା ପରିଷଦ ଜୋନ୍ରେ ୧୬ ଜଣ ପ୍ରାର୍ଥୀ ହୋଇଛନ୍ତି। ଏହି ବ୍ଲକର ୩୦ ପଞ୍ଚାୟତରେ ୧୧୫ ସରପଞ୍ଚ, ୯୮ ସମିତିସଭ୍ୟ ଓ ୮୬୮ ଜଣ ୱାର୍ଡମେମ୍ବର ପ୍ରାର୍ଥୀ ଅଛନ୍ତି। ତିର୍ତ୍ତୋଲ ବ୍ଲକର ୪ଟି ଜିଲା ପରିଷଦ ଜୋନ୍ରେ ୧୫ ଜଣ ପ୍ରାର୍ଥୀ ହୋଇଛନ୍ତି। ଏଥିସହ ବ୍ଲକର ୨୯ ପଞ୍ଚାୟତରେ ୯୫ ସମିତିସଭ୍ୟ, ୧୧୬ ସରପଞ୍ଚ ଓ ୮୨୨ ୱାର୍ଡମେମ୍ବର ପ୍ରାର୍ଥୀ ନିର୍ବାଚନ ମଇଦାନରେ ଅବତୀର୍ଣ୍ଣ ହୋଇଛନ୍ତି। ବିରିଡ଼ି ବ୍ଲକର ୨ ଜିଲା ପରିଷଦ ଜୋନ୍ ସମେତ ସରପଞ୍ଚ, ସମିତିସଭ୍ୟ ଓ ୱାର୍ଡସଭ୍ୟ ପଦବୀରେ ୬୮୬ ପ୍ରାର୍ଥୀ ରହିଛନ୍ତି। କୁଜଙ୍ଗ ବ୍ଲକ ଅଞ୍ଚଳର ୪ ଜିଲା ପରିଷଦ ଜୋନ୍ରେ ୧୩ ଜଣ ପ୍ରାର୍ଥୀ ହୋଇଛନ୍ତି। ଏହି ବ୍ଲକ ଅନ୍ତର୍ଗତ ୨୮ ପଞ୍ଚାୟତରେ ୯୯ ସମିତିସଭ୍ୟ, ୧୧୪ ସରପଞ୍ଚ ଓ ୯୧୨ ଜଣ ୱାର୍ଡମେମ୍ବର ପ୍ରାର୍ଥୀ ନିର୍ବାଚନ ଲଢ଼ିଛନ୍ତି। ରଘୁନାଥପୁର ବ୍ଲକର ୨ ଜିଲା ପରିଷଦ ପାଇଁ ୭ଜଣ ପ୍ରାର୍ଥୀ ହୋଇଛନ୍ତି। ଏହି ବ୍ଲକର ୧୯ ପଞ୍ଚାୟତରେ ୭୧ ସମିତିସଭ୍ୟ, ୯୮ ସରପଞ୍ଚ ଓ ୩୩୭ ଜଣ ୱାର୍ଡସଭ୍ୟ ପ୍ରାର୍ଥୀ ରହିଛନ୍ତି। ନାଉଗାଁ ବ୍ଲକର ୨ ଜିଲା ପରିଷଦ ଆସନ ପାଇଁ ୬ ଜଣ ପ୍ରାର୍ଥୀଙ୍କ ମଧ୍ୟରେ ଲଢ଼େଇ ହୋଇଛି। ବ୍ଲକର ୧୬ଟି ପଞ୍ଚାୟତରେ ୫୦ ସମିତିସଭ୍ୟ, ୬୩ ସରପଞ୍ଚ ଓ ୪୪୫ ଜଣ ୱାର୍ଡମେମ୍ବର ପ୍ରାର୍ଥୀ ରହିଛନ୍ତି। ଏରସମା ବ୍ଲକର ୪ ଜିଲା ପରିଷଦ ଆସନରେ ୧୮ ପ୍ରାର୍ଥୀ ଅଛନ୍ତି। ଏହି ବ୍ଲକର ୨୫ ପଞ୍ଚାୟତରେ ୭୯ ସମିତିସଭ୍ୟ, ୯୫ ସରପଞ୍ଚ ଓ ୮୦୯ ଜଣ ୱାର୍ଡମେମ୍ବର ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରିଛନ୍ତି। ଶନିବାର ଏହାର ଗଣତି ଆରମ୍ଭ ହେଉଥିବାବେଳେ ପ୍ରାର୍ଥୀ, ନେତା, କର୍ମୀ ଓ ସମ୍ପର୍କୀୟଙ୍କ ମନରେ ଚିନ୍ତା ବଢ଼ିଯାଇଛି। ତେବେ ବିଜୟୀ ଆଶାରେ ଥିବା ପ୍ରାର୍ଥୀମାନଙ୍କ ପକ୍ଷରୁ ଉତ୍ସବ ପାଳନ ନେଇ ପ୍ରସ୍ତୁତି ଆରମ୍ଭ ହୋଇଯାଇଛି। ଫଳାଫଳ ବାହାରିବା ପରେ ହାତୀ କାହା ମୁଣ୍ଡରେ କଳସ ଢାଳୁଛି ତାହା ଜଣାପଡ଼ିବ।